اِیوکی

نبشتہ کار: امجد رھیم

تو کدی مار اِتگ ایوکی چے یے؟ تو کدی ایوک ءَ نِشتگ ءُ جیڑ اِتگ منی زندگی ءِ مول ءُ مراد چی اَنت؟ تو کدی ایوک ءَ جیڑ اِتگ من ءَ چے دوست بیت چے نہ بیت؟ اگاں ترا ایوکی دوست بِیت بلے چی ءَ دوست بیت؟ اِشی ءِ دوست بوَگ ءِ مول چی اَنت؟ منی ھیال ءَ اے جُستانی پسّہ مئے وتی توکا بِہ بیت ءُ ما وتارا ھمے جُست بہ کن اِیں، مارا چی ءَ ایوکی دوست بیت؟

چوناھیا من ءَ وت ءَ ایوکی دوست بیت، بلے من وت نہ زان آں ایوکی ءِ جِند چی یے؟۔ من وت سرپد نہ آں ھمیشی سبب چی اِنت، بلے من ءَ دوست بِیت۔ بہ گندئے ھرچ ورنایے ءَ ایوکی دوست بیت، بلے کُل نہ زان اَنت ایوکی چے یے۔ وھدے ما ایوک بہ اِیں، گُڑا مارا ایوکی ءِ باروا پگر ءُ سسّا کنگ لوٹ اِیت۔

گِندئے ایوکی ھما مردُم ءَ را دوست بِیت کہ ھما مردُم ءَ گم ءُ رنج دیستگ، بزاں ھما مردُم ھمے چیزّ ءِ آماچ بوتگ اَنت۔ وھدے تو تیاب ءِ کَش ءَ نندے گُڑا ترا ھما مردُم یات بیت کہ ھما مردُم ءَ تئی واستا وتی ساہ کُربان کنگ ءِ ارادہ کُتگ، ترا ھما مردُم ءِ ھما ساھت ءَ گیش ءَ چہ گیش گِیر کئیت اِنت۔ وھدے مردُم ایوک بیت، گُڑا دومی مردُم ءَ را یات کار اِیت ءُ ھما مردُم ءِ تْرانگ ءَ کپ اِیت۔ یک مردُمے ءَ را دل ءَ دوست دارگ ءُ آئی پگر کنگ ھم باز گْران اِنت، وھدے کہ تو ایوک بہ ئے گُڑا تو ھما مردُم ءَ گِیر کارے کہ ھما مردُم ترا چہ ساہ ءَ دوست بیتگ ءُ ترا چہ ایوک بوَگ ءَ رکّینتگ۔

ایوکی ءِ توکا مردُم دو چیز یات کنت، یکّے وتن ءُ دومی وتی آشک ءَ۔ ایوکی ھما ورناھاں دُوست بیت کہ آ وتن ءِ دوستی ءَ کن اَنت ءُ آ وتی وتن ءِ اِشک ءَ گَنوک بِیتگ اَنت ءُ انگت گنوک اَنت۔ آیان ءَ گوں وتی وتن ءَ مھر اِنت، ھما ایوک بوَگ لوٹ اَنت۔ دومی آشک ھما بیت وتی لاڑُکیں آشک ءَ یات کار ایت، گُڑا ھما وتی رنج ءُ گماں ایوکی ءَ گوں وت ءَ درشاں کنت۔ ایوک بوَگ تھنا ھما مردُم ءَ را پرمائیت کہ مدام سکّی ءُ سُوریانی توکا وتی زندگی ءَ گْوازینگ ءَ اِنت۔ بہ گندے رنج مردُم ءَ ایوک کنت، بلے ایوکی مردُم ءَ را رنج دنت۔ پمیشکا ایوکی بازینے ءَ را توریت۔ گیش ورناھاں ایوکی دوست بِیت چی ءَ، پرچا کہ آ وتی زندگی ءِ باروا پگر کن اَنت ءُ منی نزّ ءَ آیان ءَ کنگی اِنت۔ مردُم ھما وھد ءَ ایوک بیت کہ آئی وتیگ آئرا یل کن اَنت، گُڑا ھما ایوکی مردُم ءَ را توریت ءُ دل رنج کنت۔ آدگہ ایوکی ھما اِنت وھدے کہ تو وت ءَ ایوک بوَگ لوٹ ئے، تو ھمے لوٹ ئے کہ من دُرستیں مھلوک ءَ چہ دور بہ باں وت ءَ یک کِرّ ءَ بہ کن آں۔ ھمے مارشت ءِ نام ایوکی ءُ بازیں کسے ءَ ایوکی پمیشکا دوست بیت، بلے پہ ھرکس ءَ نہ۔۔۔۔۔۔۔۔۔