شھید اُستاد درمان

 سیمی بھر

نبشتہ کار: امجد ناسر بلوچ

وھد گوزان ءُ دل ءِ درد ءُ گم گیشتر بْوان بوت اَنت، ھمے ساھت ءَ انزمان ءِ موبائل ءَ رنگے اتک ءُ اے رِنگ ناکو اِلاھی بکش ئیگ اَت۔ ناکو گْوشگ ءَ اَت کہ من ءَ پوجی ءَ پون کرتگ ءُ گْوشتگ یکے بئیت درمان ءَ بہ بارت، گڑا انزمان ناکو ءَ را پسو دات ءُ گْوشت ناکو ما یک مردمے چوں پند ءَ شُت کن اِیں؟ گُڑا ناکو ءَ گوشت من ھالے کناں ءُ پد ءَ شمارا ھال دے آں۔ ساھتے ءَ چہ رند ناکو اِلاھی بکش پد ءَ انزمان ءَ پون کُت، من ھال کُرتگ بلے نہ ٹھگ ءَ اَنت۔

انزمان گْوشت گڑا چے گْوشگ ءَ اِنت ناکو؟ ناکو ءَ گْوشت من باز مِنّت کُتگ، بلے آئی گُڈّی گپ ھمے بوتگ کہ انزمان ءُ اشرپ یک پرپٹے ءَ گوں من ءَ پون کناں ءُ بیا، انزمان گوشت شر ناکو گڑا من ءُ اشرپ روگ ءَ اِیں ءُ ناکو ءَ گوشت اللہ ءِ باھوٹ اِت۔ اشرپ ءُ انزمان روان بوت اَنت دیم پہ کوھڑو پوچیانی بنجل ءِ نیمگ ءَ

داں یازدہ ءَ ما ودار کُت، بلے اے نیاتک اَنت ءُ ما دُرا وپت اِیں۔

دومی سُھب ءَ گوربام ءَ منی چم پچ بوت آں چہ واب ءَ من دیست کہ درمان وتی نپادانی سر ءَ وپتگ اَت، من سک باز گَل بوت آں  ءُ چہ وتی نپاداں پاد اتک آں شُتاں دیم شُشت ءُ چاہ وارت۔ کمو رند ءَ پد درمان ھم چہ واب ءَ پاد اتک وتی جانے شُشت ءُ اتک بان ءِ تہ ءَ من ءَ گْوشتے امجد تو برو اما ءَ بہ گوش ماما گوش اِیت چاھاں بیار، من گوشت شر۔

 من شُتاں مات ءَ گوشت کہ اما ماما چاہ لوٹگ ءَ اِنت، اما ءَ گوشت تو برو من چاھاں آرگ ءَ آں۔ من واتر شُتاں بان ءِ توکا مات ءَ چاہ ھم آؤرت اَنت۔ درمان چاہ وارت ءُ من ءَ ھم گوشتےامجد تو کوپے چاہ ور من گوشت شر، گڑا ما چاہ وارت ءُ وتی سر رَست دیم پہ کوچگ ءَ روان بوت اِیں۔

من ناکو نور بکش ءِ مُلک ءَ جل اِت ءُ درمان شُت دیم پہ وتی مُلک ءَ، اے روچ ءِ وھد دوازدہ  بوت من ءَ ھم گرم ءَ گِپت۔ گڑا من شتاں سکی داد ءِ کِرّ ءَ دیوان ءِ گِپت، وھد یک بوت ءُ مات ھوا چاہ بِر کُت پہ ما بلے اے چاہ ءَ چہ پیسر سکی داد ءَ  انزمان پون کُت ءُ گوشت تو پتے مھمد، امجد ءُ وھید برو اِت وتی کارڈ ءُ موبائلانی رند ءَ۔ سکی داد گوشت شر، ما پتے مھمد توار کُت ءُ روان بوت اِیں، ما سئیں نالی کور ءِ تہ ءَ داں سر بوتاں مئے گوم ءَ وھید ھم ھوار بوت۔ ما چاریں روان بوت اِیں، ما شُت ءُ وتی کارڈ ءُ موبائل آؤرت اَنت دانکہ روچ شُت ءُ دیگر بوت۔

روان اِنت۔۔۔۔۔۔