نبشتہ کار: مھمد یوسپ بلوچ
راجی آجوئی زرمُبشت ءِ تہ ءَ باز کم گندگ بیت کہ سیاسی ءُ لیکھی جھد کار زالم ءِ سانکلاں گوں بندوکیں زندان ءَ وھدے آ آمیدگس ءَ پہ انساپ ءِ ھاتر ءَ وتی ھکانی لوٹ ءَ برگ بنت ءُ آمید گس ءِ جج کہ وت ریاستی دلار ءُ یک مُز (تنخواہ) وارے ءِ پیم ءَ انساپ ءُ کانود ءَ گُٹگیر کنت وتی واجکارانی زوراکیانی برجاہ دارگ ءَ پیلو کنت، گڑا آمیدگس ءِ در ءُ دیوار گوں آشوبی اوگاماں، گوں تْرندیں کندگ ءُ ٹھکاں ھبکہ بنت۔
آ کندگ ءُ ٹھکانی توار بلوچ راج ءِ شیر زالیں جنک ءُ بلوچ یکجھتی کمیٹی ءِ سروک بانک مھرنگ بلوچ ءِ کندگ ءُ ٹھک اِت اَنت کہ دژمن ءِ ناشرکاریں آمیدگس ءِ تہ ءَ وھدے گوں وتی لیکھی جھد کاریں ھمبلاں پُتر اُیت، بزاں آ گوں وتی کامریڈاں، کامریڈ گلزادی بلوچ، کامریڈ بیبو بلوچ، واجہ کامریڈ سبگت اللہ شاجی، کامریڈ گپار بلوچ ءُ کامریڈ بیبگر بلوچ ءِ گوں مھریں زمزیلاں دست بستگ اِت اَنت، بلے آشوبی اوگاماں آمیدگس سر ءَ زرت۔ کامریڈ گپار گوں مھکمیں زمزیلاں ءُ بستگیں دستاں وھدے وتی شیرزالیں جنک کامریڈ بیبو بلوچ ءَ آمیدگس ءِ دیم ءَ امبازاں زیر اِیت ءُ پیشانیگ ءَ ئِے بوسگ دنت ءُ کامریڈ بیبو بلوچ گوں بچکنداں وتی شیریں بابا ءَ امبازاں زیر ایت پہ آمیدگس ءَ پیشی ءَ رھادگ بنت۔
گْوں دژمن ءِ پرشتگیں سانکلاں مزاھمت زندگ بات ءِ اوگاماں گوں آمیدگس جکس ایت ءُ جھان ءَ آمیدگس نوکیں دروشمے ءَ پیش دارگ بیت، ھمے وڑ ءَ ڈاکٹر مھرنگ گوں ٹھک ءُ بچکنداں گْوشگ ءَ اَت کہ مرچی جج ءَ ھچ نہ گوشت ءُ “جَج تَتک” “جج تتک” اے ایوک ءَ یک آشوبی لبزے نہ اِنت، بلکیں یک سما ءُ آشوبی جُنزے ءِ جارے۔
دژمن ءِ آمیدگِس ءُ آئی ءِ ناانساپی، تُرس ءُ زُوراکی پدّر کنگ ءَ ات یک بلوچ زالبولے ءِ ٹھکانی دیم ءَ ریاستی بزدلیں جج پہ ترسگ ءَ لاچار اَت۔ ڈاکٹر مھرنگ بلوچ ھما شیرزالیں رھشون کہ چار ماہ ءَ گیش اِنت گوں وتی لیکھی سنگتاں دژمن ءِ زندان ءِ تھاریں ءُ یک کسانیں اوتاگے ءِ تہ ءَ بندیگ ءُ مجگی ءُ بدنی ٹارچرانی آماچ اَنت، بلے ریاست ءَ گوں زُلم ءُ زوراکیاں آیاناں پروش دات نہ کت۔ اے چاریں ماھانی تہ ءَ سکا بازیں تکلیپی ءُ ٹارچر، جُست ءُ پُرس، تُرسینگ ءُ بیھار ءَ پد ھم زمزیلانی تاگتاں بلوچ شیرزال ءِ پگر، زانت ءُ سما ءِ سوب ءَ گیشتر مھکم بیتگ، بلے وھدے کہ مرچی آمیدگِس ءَ پیش کنگ بیت گڑا چہ آئی ءِ دیم ءَ اے زوراکیانی مھکمیں سانکلاں پروش وارت ءُ اوشتات کت نہ کت ءُ شیرزال ءِ پْروش دیگ ءَ دُژمن سوبین نہ بیت، بلکیں ڈاکٹر بچکندگ ءَ اَت۔ انچوش بچکندگ ءَ اَت کہ زوراک ءِ ءُ انساپ نہ کنوکیں آمیدگس ءِ دیم ءَ گوں پرْشتگیں سانکلاں گوں بندوک ءُ اوشتاتگ اَت پہ گبزہ گیر ءِ آمیدگس ءُ ججانی دیم ءَ اے کندگ ءُ ٹھک یک ترندیں شھماتے ءِ توار اَت، بلکیں پہ آیوکیں بلوچ راج ءِ پدریچ ءُ جھدکارانی واستا دلجمی ءُ دلبڈّی ءِ مادنیں ّراہ ءِ برجاہ دارگ ءِ ھاتر ءَ یک آشوبی پیگامے اَت۔ بلوچ راجدپتر ءَ بھ چوش نبیسگ ءَ گِندگ نہ بیتگ کہ یک سیاسی بندیگیں آشوبی سروکے آمیدگس ءِ آیگ ءَ آئی ءِ تْرندیں اوگام ءُ جُستاں جج آمیدگس ءَ یلہ بہ کنت ءُ بہ تَچ اِیت۔
اے ایوک ءَ یک ٹھک ءُ بچکندے نہ اَت، اے زورگر ءِ بلوچ چُکچینی ءِ سرجمیں ناانساپی ءِ نزام ءِ دیم ءَ یک سیاھیں داگے ءُ دگنیا ءِ انساپ پسندیں راجانی دیم ءَ کہ آئی ءِ تہ ءَ گبزہ گیر ءِ زلم ءُ زوراکی ءَ ابید آ وتی بُزدلی ءُ نزوریاں وتی دیم ءَ داتگیں سیاھیں پردہ ءِ چارگ ءَ تُرسگ ءَ اَت۔ وتی سیاھیں پٹّی ءَ بندوکیں چماں کوریں آمیدگس ءَ چار اِت کت نہ کنگ ءَ اَت، وتی آرامیں کرسی ءَ پاد کئیت چہ اُود ءَ در روت۔
مرچی من دل ءَ جزماں سوب ءُ شاتکامی بلوچ راج ءِ نسیب ءَ انت، من ھر وھد ءَ بلوچ رھشون ڈاکٹر مھرنگ ءُ آئی ھمبلانی سر ءَ نبشتہ کناں ءُ چمشانک دیاں من ءَ الم ءَ نمیرانیں راجی رھشون شھید چیئرمیں گلام مھمد بلوچ ءُ راجی رھشون ڈاکٹر اللہ نزر گوں ھمبلاں گیر کاینت کہ گبزہ گیر ءِ زندان، زلم ءُ زوراکیاں پْروش دات نہ کت اَنت، نہ مروچی بلوچ سیاسی سروک ءُ جھدکارانی ھمت، پگر ءُ سسّا ءَ پروش دات کن اَنت۔ ھر وھد ءَ من بلوچ راجی رھشون ءُ جھدکاراں یک مزنیں رھشون ءُ ھستی سرپد باں۔ اے درگت ءَ ڈاکٹرمھرنگ، کامریڈ بیبو، گلزادی، سمی دین، ماھزیب بلوچ ءُ شیرزالیں نادیہ بلوچ ءُ کسانسالیں پاتمہ بلوچ ءَ دروت درشان کنگ ءَ منی کر ءَ چوشیں ڈولدار ءُ زیبائیں گال پہ ایشاں درشان کنگ ءَ نیست، بلے مرچی وھدے ماں آمیدگس ءِ تہ ءَ گیپتگیں چاگردی رسانکدر ءِ ویڈیو دیست کہ آ ٹھک دیگ ءُ سک کندگ اَت ءُ گْوشگ ءَ اَت کہ ٫٫ جَج تَتکگ ۔ گڑا من چیزے پْرشتگیں لبر ءُ گال بے ترامی ءَ کمات ءُ نبشتانکے ءِ دْروشم ءَ آؤرت، بس من ھمے جیڑ اِت کہ رھشون ءُ جھد کارانی پگر ءُ لیکہ مزن انت ءُ آ مھکمی ءَ گوں سسّائی بنت ، آ زوراک ءِ سانکلانی پروشگ ءَ ھم سوبمند بنت ءُ کامریڈ مھرنگ گوں ھمبلانی ھواری بلوچ راج ءَ وتی منزل ءَ سر کنگ ءَ سوبیں بیت۔
ڈاکٹر مھرنگ ءِ کندگ ءُ گھگیری یک بے تواریں آشوبے ءِ زھرشانی یے، یک پُرتواریں جلشکے پہ بلوچ پدریچ ءُ جھدکاراں۔ اے کسانیں گپے نہ ات کہ پد ءَ زِندان ءَ روگ ءَ اَت ءُ شیرزالیں رھشون دژمن ءِ آمیدگس ءَ ھمے وڑ ءَ بہ کند ایت وتی مھروانی ءَ پہ راج ءَ بہ شکسائیت، آ کندگ ءُ بچکندگ ایوک ءَ پہ آمیدگس ءَ ساڑی ئیں وکیل ءُ مردمانی واستا نہ ات، بلکیں پہ سرجمیں بلوچ ءُ ایردستیں راجاں یک آشوبی کُلوھے اَت کہ دژمن ءَ زور مان بلے دلجم نہ اِنت، توپک ھست، آمیدگس ھست، بلے ھَک ءُ انساپ نیست۔ آئی ءِ کلیں تاگت ءَ سما ءُ پگری ءُ لیکھانی دیم ءَ پروش وارت۔
ڈاکٹر مھرنگ ءَ گوں ھمبلاں اے گپ گوں وتی کرد ءُ کار ءَ پدر کتگ کہ سروک ایوک جزباتی تران ءُ اوگام ءِ نام نہ اِنت۔ سروک ھما اِنت کہ زوراک ءِ زلم ءُ زوراکی ھم آئی ءَ پروش دات مہ کنت پہ شان دژمن ءِ داتگیں ٹپاں گوں وتی پکر ءُ سسّا ءَ مَٹ بہ کنت۔ اے آشوبی جنز ءِ راہ انت، ھر وڑیں جنجال ءُ سکی ءُ سوری ءِ دیمپان بوت کن ات، دژمن ءِ سانکلاں پہ وت سَھت ءُ زیور سرپد بہ بہ اِت، وتی زند ءَ پہ راجی پجار ءُ گلزمین ءِ رکینگ ءِ ھاتر ءَ ندر بہ کن ات، گڑا یک سوبمندیں رھشونے جوڑ بیت کن ات۔ ھما سروک گوں سابکلاں دست اش ٹٹاتگ اَنت، بلے دژمن ءَ وتی سھریں چماں پیشدارگ ءَ اَت۔
ڈاکٹر مھرنگ تو دژمن ءِ پَردگ پاشک کُت ءُ پیشداشت کہ یک بلوچ زالبولے کہ وتی لیکہ ءُ پگر ءِ سر ءَ دلجم بہ بیت، گڑا جج ھم تچ اَنت، دژمن ءِ سیاھین ءُ کوریں کانود وتی مرگ ءَ مِر اَنت۔ تو مارا پیشداشت کہ تو ایوک یک زالبولے نہ ئے بلوچ ءِ تہ ءَ نوکیں زْرمبشتے ئے۔ تئی کندگ پہ بلوچ راج ءِ آگاہ کنگ ءَ توار اِنت، تئی مھکمی ءُ شیرزالی ءَ دژمن ءِ آمیدگسی نزام پروش دات۔
مرچی تئی ٹھک ءُ بچکند تئی گال دُرس پہ مُدامی راجدپتر ءَ نبشتہ بیتگ اَنت۔ اے ھما راستی اِنت کہ اِیشی ءَ ھچ آمیدگِس، ھچ زندان، ھچ ریاستی اِدارہ ھلاس کُت نہ کنت۔ تو پیشداشت کہ راجدپتر اِیوک ءَ گوں توپک ءُ پیسلھاں ءَ جوڑ نہ بنت، لھتیں وھد ءَ یک ٹھکے ھم سرجمیں بلوچ ءِ راجدپتر ءَ نوکیں دروشمے ءَ نبشتہ بیت، پہ آیوکیں پدریچ ءَ سبکے جوڑ بیت۔ ڈاکٹر مھرنگ تئی ٹھک پہ مدامی راجدپتر ءَ مان ایت، پرچا کہ آمیدگِس ءِ زواکیانی پروشگ ءَ تو باج بُرتگ ءُ اِیشی ءِ توار داں مدامی مان ایت ءُ پہ بلوچ راج ءَ تئی ٹھک ءُ بچکند پہ سوبمندی ءَ مستاگے ءُ تو دژمن تاچینت ءُ وتی راج ءَ گوں بچکنداں مھر دیان اِت ئے ءُ تھاریں کوٹیاں واتر بوت ئے۔
