نبشتہ کار: کامریڈ پاتمہ بلوچ
چوناھیا من وَ چوشیں نبشتہ کارے نیاں کہ کسے ءِ کرد ءُ زندمان ءِ سر ءَ چار لبز نبشتہ بہ کن آں، جاھے نہ جاھے ھما رستگیں مھر ءُ کربانی کیت ءُ دیم ءَ اُوشت اِیت کہ مردم وڑے نہ وڑے ءَ دل ءِ ھال ءَ درشان بہ کنت۔
مرچی من کہ ھما راجی آجوئی ءِ مَل ءُ مزاریں سرمچار ءِ واستا چار لبز نبشتہ کنگ ءَ آں آ راجی بامرد شھید مولانا ابدلھالک اِنت، شھید ابدلھالک وتی اندر ءَ یک سرجمیں سرمچارے اَت ءُ اے ھبر آئی ءَ گوں وتی کربانی ءَ سابت کتگ۔ شھید ابدالھالک جان بہ گندئے من تئی کردار ءِ توسیپ ءُ ستا ءَ کُت مہ کن آں، پرچا کہ تو یک انچیں راھے گپت ءُ رپت ئے۔ پرچا کہ آجوئی ءِ جنگانی تہ ءَ ھما سر کربان بہ اَنت ءُ آ ھرچ نگیگیں جاوراں پُشت ءَ نہ کنز اِیت، بلکیں ھمک سکّی سوریاں وتی بزّگیں راج ءِ پھریزگ ءِ ھاتر ءَ بدواہ ءِ دیم ءَ چو کوہ ءَ مک بیت ءُ سراں ندر کنت۔
مھروانیں ابدلھالک جان من زاناں تو انگت ءَ ھما جنگجاھاں نِدارگ کنگ ءُ گِندگ ءَ ئے کہ چوں دژمن پروش ورگ ءَ اِنت، تو ایشانی لگوری ءَ گِندگ ءَ ءُ شر ٹھک دیگ ءَ ئے۔ ھالک جان دژمن اے ھبر ءَ نہ کنت کہ من شمارا ھلاس کتگ پرچا کہ شما شُتگ اِت، بلے ھزاراں ھالک ءُ ساجد وڑیں ورنا ودی کتگ۔ چی ءَ کہ بلوچ راجدپتر ءِ تہ ءَ شھید ھالک یک گھگیری ءِ چیدگے اَت ءُ ھالک ءَ یک گھگیری یے بِنا کتگ اَت ءُ راجدپتراں ھما گھگیری وتی تہ ءَ یاداشت کتگ۔
شھید ھالک جان ءَ مدام وتی نودربراں سر ءُ سوج دیگ ءَ اَت ءُ مدام پہ وتی راج ءُ ڈیھ ءِ وشھالی ءِ واستا جھد ءَ ات۔ ءُ راجانی تہ ءَ لھتیں انچیں کرد بنت آ چو کوہ ءَ مک بنت ءُ ھچ وڑ ءَ ایرموش کنگ نہ بنت ءُ شریں کرد ءُ کربانی وتی واھند ءَ راج ءِ تہ ءَ زندگ دار اِیت۔ راج چہ شریں کردانی واھند ءَ کدی بے ھیال نہ بیت۔
