نبشتہ کار: بابا جی آر بلوچ
بولان ءِ کوہ ءَ چہ برزتریں پگر ءُ ھیالانی واھُند مدام چو کوہ ءِ البرز ءَ ھما دیمتر ءَ سرکش اَنت ءُ وتی راجی پرز ءَ پیلو کنگ ءَ ماں برے شور پارود ءَ، ءُ برے ماں بولان ءِ کوہ ءَ گوں بے گِھارے دژمن ءَ جنگ دے اَنت۔ وھدے سُپیان دابیں شھزانت ءُ مزن پگرانی باروا ھیال کناں، گُڑا بولان ءِ شیپ گپتگیں آپ ھم سکوت بنت ءُ بولان ءِ برز ءُ بالادیں کوہ ھم آئی ءِ جنگانی داستان ءَ ماں پُشتی ءَ آئی ءِ پسّو ءَ دے اَنت۔
اے دابیں ورنا چہ ھما گس ءَ ودی بنت کہ آ گس آشوب ءِ نام ءَ ماں بُن ءُ ازل رُشت زیران ءُ پیداگ انت، ھمے لوگمان ءَ پہ بلوچ ءُ بلوچستان ءَ مزنیں دیمونی ءُ کربانی داتگ۔ اگاں راجدپتر ءِ ھبر ءَ بہ سرین اِیں گڑا ھمے مردمانی تہ ءَ بلوچستان گوں ڈولداری ءَ نبیسگ ءُ ماں جھان ءَ آئی ءِ ڈولداری پیش دارگ بوتگ۔ اگاں جنگانی کسواں بیاریں گڑا مارا شھید الی شیر کُرد ءِ دابیں سنگتانی چھرگ ءَ سُپیان جان ءِ تہ ءَ گند اِیں، چے ءَ کہ الی شیر کرد چہ ھما بے بْرمشیں سنگتان اَت ءُ مدام گوں دژمن ءَ چیرجنگی ءَ جنگ دیان اَت ءُ تا لشکر ءَ وتی گس ءَ آوار جت ءُ شھید ئِے کُت۔
کماندار سُپیان ءَ الی شیر کرد ءِ بگل ءَ آجوئی ءِ بو چِتگ ءُ اے کَد ءَ سر بیتگ، وھدے سُپیان ءَ وتی چم پچ کرتگ اَنت گڑا آئی ءَ وت ءَ مدام ماں الی شیر ءِ کُٹّ ءَ دیستگ ءُ الی شیر ءِ ژانگولیں جون ئِے چم ء وت دیستگ، گڑا آ کجام داب ءَ گوں اِیمنی ءَ نشت کنت؟
سُپیان وھدے رُست ءُ مزن بوت پہ وانگ ءَ اسلام آباد ءَ شت، بلے آ وتی لیکہ ءَ سرپد اَت۔ آئی ءَ زانتگ کہ بلوچستان چہ بلوچ ءِ ھون ءَ ڈولدار بیت، بلوچستان بلوچ ءِ ھون ءَ لوٹ اِیت ءُ بلوچ ءِ ھون ءَ تنیگ اِنت۔ چہ ھمیشی ءَ چیئرمین شاشان زانت ءُ زانشت ءِ ھوری ءَ آجوئی ءِ سپر ءَ گوں مدام ھمگام اَت، چوشیں سر پہ مڑاہ گوں دژمن ءَ جنگ دے اَنت ءُ نمیرانی ءِ وشبوئیں پُل ءَ چو سْرپ اَنت۔
شھمیریں چیئرمین شاشان ءَ مدام ماں پاکستان ءِ بگیری ءَ جنگ داتگ، برے ماں اسلام آباد ءَ اول سرپ ءَ بیتگ ءُ برے ماں بولان ءَ، ءُ برے ماں شور ءِ مزنیں ماتبنداں۔ بلوچستان ءِ ھمک ٹِک اے گْواھی ءِ دیگ ءَ ساڑی اِنت کہ سُپیان مزن جگریں سرے بیتگ ءُ بلوچستان ءِ گم ئِے مدام دل ءَ بیتگ، تا گُڈّی ءَ کلات ءَ گوں دژمن ءَ دیم پہ دیمی جنگ دنت ءُ وت ءَ پہ بلوچستان ءَ نمیران کنت۔
انکلاب تا گُڈّی منزل ءَ۔۔۔۔
