نبشتہ کار: میجر مجید
بلوچی گالانی رد کارمرزی
نبشتہ کار: میجر مجید
سید گْوش اِیت کہ:
دژمن پہ تئی راج ءُ زبان ءَ اگرب ءُ پور اِنت
تو بے وتیں دَیندار ئے تئی دَینکار
مروچاں ما گندگ ءَ اِیں کہ لھتے نبشتہ کار، شائر ءُ رم نویس لبزاں رد کار گرگ ءَ اَنت، پہ دروَر چوش کہ: جنگول، سنگت یا کامریڈ ءُ دگہ بازیں بازیں گالاں گوش ءُ پونز کن اَنت کہ اے پہ زبان ءَ مولّیں تاوانے، ءُ ھمے گال دیمتر ءَ رواج گِر اَنت ءُ مردم ایشاں نبشتہ کن اَنت ءُ گْوش اَنت کہ رد اَنت، پہ دروَر: جنگول ءِ گال، ھمے جنگول ءِ گال ءَ مروچاں پہ سرمچار ءَ کارمرز کنگ ءَ اَنت کہ پھک ءَ رد اِنت، سرمچارانی ارزشت ءَ نزور پیشدار اِیت، سرمچار جنگول نہ اَنت، چوش کہ کْوھنیں گالبندے کہ:
جنگ ءَ روئے او سرمچار
ساہ ءُ سر ءِ اڈ ءَ مدار۔
سرمچاراں وتی سراں کپن بستگ ءُ پہ یک مکسدے ءَ جنگ ءَ اَنت، مئیگ ءُ تئی رُوژنائیں باندات ءِ واستا جنگ ءَ اَنت، ءُ وتی سرانی کُربانی ءَ دیگ ءَ اَنت۔
چوناھیا جنگول بزاں ھما دلوت ءَ گْوش اَنت کہ آ دائم ءَ جنگ ءَ کیھو اِنت، جنوک اِنت چوش کہ: گْورانڈ، پاچن، گوک بلے پد ءَ ھم لھتے جنگولیں دلوت کسانیں چک یا گوں زالبولاں جنگ نہ کن اَنت ءُ جنگولیں دلوت بے مکسد ءُ مراد ءَ جنگ کنت، نی ایشی ءَ گوں سرمچاراں چتور جنگول گْوشت کن ئے؟ سرمچار پہ بے مکسد ءَ وَ جنگ ءَ نہ اَنت۔
نی اِد ءَ بیا چاریں کہ دگہ گالے ”سنگت یا کامریڈ“
مروچاں لھتے نبشتہ کار بلوچ شیرزالانی نام ءِ دیم ءَ سنگت یا کامریڈ نبشتہ کن اَنت، انچوش کہ سرمچار یک گالے کہ مئے گال گنج ءَ ھست اِنت، ھمے داب ءَ پہ زالبولیں جھدکاراں شیرزال کارمرز بیت، ناں کہ سنگت یا کامریڈ۔ پہ مردین آدم ءَ سرمچار ءُ پہ زالبول ءَ شیرزال کارمرز بیت، سنگت یا کامریڈ ءِ گال پہ زالبول ءَ چوناھیا مئے دیم ءَ نہ گوستگ، بلوچ دودمان ءُ رھبند ءِ ھلاپ اِنت، پد ءَ ایش اِنت کہ تئی گْور ءَ جْوانیں گالے کہ ھست چے ءَ رُنگراھاں سرجنان ئے؟
من وتی واجھیں نبشتہ کاراں دسبندی کناں کہ گالانی گچین کنگ ءِ وھد ءَ سک ھیرتچاری بہ کن اَنت، یک گالے کہ تئی گْور ءَ ھست اِنت گڑا تو دری زبانانی چے ءَ مِنّوارئے؟ ھاسکن من آشوبی گلاں چوش کہ زرمبشت یا ایدگہ آشوبی گلاں دسبندی کناں کہ اے گالانی زیرگ ءَ ھیال بہ کن اَنت، اگاں اے ڈولیں ردیں گالانی گِر ءُ دار مہ بیت گڑا دیمتر ءَ رواج گر اَنت۔
بلوچی زبان سبز ءُ میزران بات۔۔بلوچستان آجو بات۔
رمس: 24 جون 2025
