نِبشتہ کار: کوھی بلوچ
مرچی ائید اِنت بلے پہ بلوچ ءَ اِنّا، چی ءَ کہ بلوچ اے روچ ءَ دَگ ءُ چارراھانی سر ءَ پہ وتی گار ءُ بیگواھیں بچّ ءُ جنکاں توار چِست کنگ ءَ اِنت۔ اے روچ ءَ دُگنیا یک وشیں روچے منّ ایت، بلے اے روچ ءَ منی راج ءَ را کوتے اَکس گون ءُ چہ زوراک ءَ وتی بچ ءُ جنکانی آجوئی ءِ لوٹ کنگ ءَ اِنت۔ بہ گِندے مرچی سرجمیں دُگنیا اے روچ ءَ یک وشیں روچے گْوش اِیت، بلے من اِنّا! چی ءَ کہ منی چم وشی گِندگ ءَ نہ اَنت۔ منی چَمانی دیم ءَ بس منی مات ءُ گْوھار اَنت کہ دَگّانی سر ءَ اُشتوک اَنت، منی چمانی دیم ءَ ھما بچ ءُ جنک اَنت کہ مرچی آ تھاریں کوٹیانی تہ ءَ بندیگ ءُ سکّی سگگ ءَ اَنت۔
داں منی ھوش اِنت من ائید پہ چم نہ دیستگ، من یک روچے اُوں وتی راج پہ ائید ءَ نہ دیستَگ کہ آ بہ گْوش اَنت کہ مرچی ائید اِنت۔ ما پہ سیل ءُ سواد ءَ در کپ اِیں، اگاں منی چماں ائید دیستگ گُڑا آ منی مات، منی لاڈیں گْوھار، منی تنگویں برات ءُ آرپیں پِت بوتگ کہ اکس اِش گون بوتگ ءُ زار جنگ ءَ بوتگ اَنت، ءُ بلوچ ءَ را مُدام ائیدی آئی ءَ سالوکیں بچّ ءِ جون رستگ، آئی ءَ را آئی لاڑیں جنک ءِ جَنوزامی رستگ، آئی ءِ راج گوں ارسیگیں چماں رستگ ءُ آئی ءِ ائید ءِ سوگات تیر سُپتگیں جون ءِ بوتگ، گُڑا ائید پہ منی راج ءَ نہ اِنت!۔
اے ایوک ءَ مَرچیگیں ھبرے نہ اِنت کہ بلوچ راج گوں اے زند ءَ زِند گوازینتَگ ءَ اِنت، اے زُلم ءُ زوراکی ءَ را مرچی ھپتاد ءُ ھپت سال اِنت کہ گوں بلوچ راج ءَ سنگت اِنت۔ آئی ءَ را یک نہ کنت ءُ بلوچ راج پہ وتی اے سْیاد ءُ سنگت ءِ سِندگ ءِ ھاتِر ءَ جنگ ءَ اِنت۔ بلوچ راج ءَ گوں اے زُلم ءُ زوراکیاں مُدام جنگ کُتگ، بلوچ راج ءَ مُدام ھمے جُھد کُتگ کہ اے سنگت ( گُلامی ) اَچ من ءَ چہ بہ سِد ایت ءُ من آجو بہ باں۔ مرچی ریاست ءَ بلوچ راج لاچار کُتگ کہ وتی ساہ ءَ کُربان بہ کنت ءُ دُژمن ءِ ساہ ءَ بہ گیپت۔
بہ گِندے اے روچ ءَ تو مرچی گل ءُ شاتکامیں روچے سرپد بہ ئے، بلے من اِنّا! چی ءَ کہ اے روچ ءَ منی لاڑیں گْوھار ءُ مکھیں ماتی ءَ را اکسے گون ءُ وتی بچّ ءُ جنکانی آجوئی ءِ لوٹ ءَ چہ زوراکیں ءُ ھوکیں ریاست ءَ کنگ ءَ اِنت۔ اے روچ ءَ من ھما روچ ءَ یک وشیں روچ ءِ سرپد باں کہ منی ڈیھ ءُ منی راج آجو بہ باں، اگاں من بہ گْوش آں اے روچ پہ منی پُرسیگیں روچے من رَد نیاں، چی ءَ کہ ھمے وشیں روچ ءَ منی بچانی تیر سُپتگیں جون پہ منی راج ءَ سوگات کنگ بوتگ ءُ انگت اے جونانی چگل دیگ برجاہ اِنت.
مرچی ریاست ءَ یک برے پد ءَ وتی پندل مَٹ کُتگ اَنت ءُ جونانی سوگات کنگ گیش کُتگ، گُڑا ھما ریاست ءَ را اُوں پھمگ لوٹ اِیت کہ جون ءِ سوگات پہ ترا جونانی سوگات بیت ءُ بلوچ راج تئی اے داتگیں سوگاتاں بِھ نہ شموش ایت ءُ بیھال نہ کنت۔
