نبشتہ کار: شکّل بلوچ
جارج آرویل گْوش اِیت: ” یک چاگردے چہ راستی ءَ ھمنچو دور بوان بہ بیت آ چہ ھمنچو گیش راست گشوکاں گوں کست ءُ کینگ دار انت۔“
یک گلامیں چاگردے ءِ تہ ءَ مدام گوں راستیاں زِبھر بوگ کہ آئی ءِ زند ءَ ھچ مانا ءُ بستارے مہ بیت، بستار ءُ مانا نہ بوگ ءِ سبب اِیش اِنت کہ آ چہ وتی زانشتی واھگاں زبھر اِنت۔ زانت ءُ زانگ بنی آدم ءِ چماں رُژنا کنت، وھدے یک گلامے چہ وانگ ءُ زانگ ءَ دور بہ بیت گڑا آ الم چہ وتی بے سما ءُ سسائی ءَ ھچ پوہ نہ بیت، چمیشکا آ گیش ھما چاگرد ءِ تھ ءِ مردماں گوں نند ءُ پاد کئیت کہ آ چہ راستیاں پھک جتا اَنت ءُ دروگیں گپتاراں گوں ھمگرنچ بیت۔
دروگ ءَ راستی ءِ رنگ دیگ ءَ چہ یک گلامیں مردے ءِ نز ءَ وَ راست بیت اِنت، بلے آ کہ پھک ءُ پلگاریں راستی اِنت آ چہ ھکیگیں راستی ءَ زِبھر بیت۔ گیش گوں پہ لب ءُ لالچ ءَ وتی راستیں مانا ءَ پھم اِیت کہ زندگی بس پہ لاپ رودینگ بیت، بِلّے کہ راستی تئی پجّار ءِ بیگواھی بہ بیت، زبان ءِ مَرگ بہ بیت ءُ چہ وتی زمین ءِ واھندی مہ بیت، آزاتی بے مانا بہ بیت، بلے گپ کہ لاپ ءُ لب ءَ کہ بئیت آ راستی اِنت دگہ ھچ مانا نہ دنت۔ اے انسان ءِ کم سنچ ءُ کمبودی اِنت کہ پہ زر ءَ وت ءَ ءُ وتی راستیاں گُٹ ءَ گپت ءُ کُش اِیت۔
بلوچ ءِ سر ءَ ھمے جاور چہ زوراریں پاکستان ءِ نیمگ ءَ داں 77 سال اِنت کہ بوگ ءَ اَنت، اگاں انوگ ءَ ما بہ چار اِیں بلوچ ءِ لاپ چہ ھدائی نام ءَ بند کُتگ، شُد لاپی ءَ بلوچ چے جیڑ اِت کنت؟ اے یک پندلے ءِ بنیاد ءَ پاکستانی اسٹیبلشمنٹ ءَ وتی سِلیں کار بندات کُتگ داں کہ بلوچ منی گلام بہ بیت، منی پاداں بہ گپت، من بلوچ ءِ ھدا دگہ ھدا نیست، اے گناہ ءَ بلوچ داں 77 سال اِنت کنگ ءَ اِنت۔ بلوچ گناھگار اِنت، بلوچ چمیشکا گلام اِنت کہ بلوچ گلامی ءَ پہ زور پاکستان ئیگ ءَ بہ کنت۔
چوش کہ بلوچ ءِ مستریں جیڑہ لاپ ءُ ھک نہ اِنت، بلکیں بلوچ ءِ جیڑہ آزاتی اِنت کہ ناشرکاریں پاکستانی پوج بلوچانی گون ءَ کنگ ءَ اِنت۔ بلوچاں زورانسری بیگواہ کنگ، آیاں ماں جنگل ءُ گیابان ءَ دور دیگ کہ اے بلوچ راج ءِ کم بودی اِنت کہ پاکستان ءِ وڑیں رستریں ملک ءِ گلامی ءِ ھلاپ ءَ گھگیری نہ کن اَنت۔ تُرس آماچی مستریں گناہ اِنت، اگاں ھدا ھست گڑا بلوچ پرچا ناشرکاریں پاکستانی ریاست ءِ گلامی بہ کنت؟
بلوچ ءِ بس یک راھے، آ راہ بلوچستان ءِ آجوئی اِنت۔ بلوچستان ءِ تہ ءَ ھر ھما دلار کہ بلوچ چُکچینی ءَ کنگ ءَ اَنت، آیانی مَرگ ھر ھساب ءُ داب ءَ کنگی اِنت۔ مرگ ءُ زند اِنت کہ اے دلارانی جَنگ ءُ کُشگ بلوچ ءِ باندات ءَ سھرا کنت۔ بلوچستان شالا آجو بیت، اے بلوچ ءِ ایمان ءُ سِتک اِنت کہ پاکستان ٹُکر ٹُکر بیت۔
