نبشتہ کار: آلی مُراد
جنگ ءِ سوب ءَ تئی زمین ءِ ھرچ چیز سانمبند بیت، چی ءَ کہ جنگ تباھی کنت۔ جنگ ءِ سوب ءَ تئی ھر تبک ءِ مردم تکانسر بنت، ورنا ءُ کماش، زھگ ءُ زالبول، کجام ھم پڑ ءَ سیادی دار اِیت انسان ءَ ھوار تئی زمین ءِ جاندار ھم چہ زورگیر ءِ زُلماں نہ رکّ اَنت ءُ زوراکیانی آماچ بنت۔ جنگ دیاراں سوچ اِیت، جنگ ماتاں چہ چُکاں جُتا کنت، براتاں چہ گْوھاراں سِند اِیت۔ جنگ زَدیں زمین ءِ سر ءَ نشتگیں ھر مردم ءِ واستا ایمنی تھنا ھیال ءُ وابے بیت۔ جنگ زدگیں زمین ءَ نشتگیں مردمے بہ گْوش اِیت وتی اندر ءَ ھمے بہ جیڑ اِت کہ من جنگ ءَ گِستا باں ءُ وت ءَ چہ کُل چیزاں یک کر کناں کہ چہ جنگ ءِ تباہ کاری ءَ رکاں، بلے زمین ءِ سر ءِ جنگ ءَ ھما مردم ھم رک اِت نہ کنت۔ تھنا انسان وت، وت ءَ تسلا دات کنت، ھمے چیز پہ ھما مردم ءَ تھنا بس ھیال ءَ چہ گیشتر سوبین کُت نہ کنت۔
ایردستیں راج پہ جنگ ءَ ءُ وتی زمین ءِ سوچگ ءُ ویران کنگ ءَ پرچا ءُ کجام وھد ءَ لاچار بیت، اے جنگی تباھیاں ءُ مرگ ءَ ایردَست پرچا پہ وت ءُ پہ وتی مھلوک ءَ گچین کنت ءُ جنگ ءَ جوانتریں چیزے سرپد بیت؟ ایردَست بازیں جیڑگ ءُ ھیالاں پَد یک مھکمیں لیکھے ءَ گوں اے گامگیج ءَ زور اِیت۔ آ زورگر ءِ ھرچ زلم ءُ زوراکیاں گِند اِیت ءُ مار اِیت کہ منی راج ءُ زمین ءِ سر ءَ گوں توپک ءَ اوشتاتگیں زوراوریں دشمن ابید چہ توپک ءَ دگہ کجام ھم اَمَل ءَ سرپد نہ بیت، زیردَست پمیشکا جنگ ءَ پہ وت شرتر ءُ جوانتریں وسیلگے سرپد بیت ءُ زمین ءَ پہ مُدامی ایمنی ءُ وشھالی ءِ واستا یک تباہ کاریں جنگے زور گپت ءِ بگیری ءَ بندات کنت۔ زیردَست ھمے جنگ ءَ وتی ھرچ چیز ءِ تباھی ءَ ءُ وتی مھلوک ءِ شھادت ءَ، بے گِسی، در پہ دری ءُ کُل سکیاں سگّ اِیت ءُ برداشت کنت۔
آ ھمے پھم اِیت کہ جنگ اِنت کہ منی زمین ءَ چہ زورگر ءِ زُلم ءَ رکینت کنت ءُ پہ مدامی وشھال ءُ ایمنی ءِ کار اِیت، پرے واستا زیردَستیں راج ھر وھد جنگ ءَ مُھکم ءُ وت ءَ ساجو کنت۔ پرچا کہ ابیدے جنگ ءَ زورگپت ءِ پروش دیگ ءِ دگہ ھچ وڑیں وسیلگ نیست۔ چی ءَ کہ جنگ زیردَستیں راج ءِ تاکت اِنت۔ ھمے ھاتر ءَ جنگ ھمت اِنت، جنگ وشھال ءُ ایمنی، بے مٹّیں آجوئی ءِ مانزمان اِنت، چی ءَ کہ جنگ تباھی ءَ پد وشھالی یے کار اِیت۔ جنگ ءَ پَد پدمنتگ ءُ ریردَستیں راج وتی گلزمین ءَ پہ مُدامی آجو ءُ وشھال بیت، وتی زندگی ءِ ھرچ چیزّ ءِ گیش ءُ گیوار ءَ وت کنت۔
جنگ گوں تپاکی ءَ، جنگ گوں ھواری ءَ
بلوچستان زندگ بات، بلوچ گلزمین آجو بات
