نبشتہ کار: چراگ شاہ
کوہِ سلیمان ءَ بہ گر تاں نیلبومیں تیاب ءَ آ سپر ءَ اَت۔ آ بیمار ءُ جان ءِ ھاٹیگ ءَ جواب داتگ اَت، چمے نزور تر اِتگ اِت اَنت۔ دو سئے براں چمّے آپریشن ھم کُرتگ اِت اَنت ءُ انگت شر نہ اِت اَنت، بلے سپر ءَ اَت۔ بازیں بیماری ءِ ھرچ ءُ درچاں آ تنگدست کُرتگ اَت، پمیشکا پہ نادلکشّی وتی چاردہ سالی ئیں کپتگیں اکسانی بھا کنگے لوٹ اِت۔
ھمے سبب ءَ تربت، کراچی ءُ بھرن ءَ وتی اکسانی اگزیبشن کُرت اَنت ئے۔ بازیں جنجالاں گوں سر ءُ چیر اَت، بلے انگت آ بلوچستان ءِ کوہ ءُ جنگلاں گردان اَت۔ بلوچستان ءِ زیبائیں نِدارَگاں ابید بلوچ ءِ بزگی ءُ پدمنتگی ءَ پیشدارگ ءَ اَت۔
کمانچر ءَ ھکیکیں مھر اَت گوں بلوچستان ءَ، کساس آئی ءَ توامیں بلوچستان دیستگ اَت بلے آ انگت پہ بلوچستان ءَ تُنیگ اَت۔ آ گْوش اِیت کہ: ”من ءَ مہ رس کہ تئی نہ رَسگ ءِ دُرائیں لِزّتانی تام ھلاس بنت۔“
نہ رستگیں واھشت سک ڈولدار بنت، دل ءِ تہ ءَ مھر ءِ ھکیکیں پاھار ءَ یل دنت ءُ مھر ءِ پاھار نہ رَستگیں لوٹ ءَ ڈولدار کنت۔ چی ءَ کہ ھر ھما لوٹ کہ مردم ءِ دست ءَ بہ بیت گُڑا آ وتی راستیں دْروشم ءَ یل دنت۔
بیماری مزن تر اِتگ اَت، نوں دل ءَ شومّک ءَ گور جتگ اَت۔ چہ آئی ءِ وس ءُ واک ءَ در اتکگ اَت، آ کراچی ءَ اِسپیتالے ءَ داکل اَت۔ گْوستگیں سال ءِ ھمے روچ ءَ (Apr 16) من کراچی ءَ ڈالمیا ءَ ھوٹلے ءَ نشتگ اِت آں گوانکو پچ کُرت چارگ ءَ لگ اِت آں کہ اے بدیں ھال دیم ءَ کپت۔
کمانچر ءَ اے کوڑھیں دگنیا یلہ دات ءُ پہ ابدمانی اَچ ما گستا بوت۔ ھال ءِ اِش کنگ ءَ پد جاہ ءُ دراں ابیتکی ءَ مانشانت۔ کمانچر من نہ دیستگ اَت، گوں کمانچر ءَ ڈیک ھم نہ وارتگ اَت، ناں کہ من ھال ءُ اھوالے کُتگ اَت، بلے من ءَ بے کساس دوست بوتگ۔ چی ءَ کہ من بلوچستان نہ دیستگ، اگاں دیستگ گُڑا آ تھنا کمانچر ءِ گپتگیں اکسانی منت ءَ۔
آ روچی کہ کمانچر نیست اَت آئی ءِ کُنٹ پہ وتی گُڈّی جاہ ءَ برگ بوگ ءَ اَت، آ روچ ءَ بلوچستان چو بانور ءَ سمبھ اِتگ اَت۔ شیپ ءُ کَوراں ھار کُتگ اَت ءُ کمانچر ءِ کُنٹ ءَ وش اتک کنگ ءَ اِت اَنت، بلے کمانچر تُرک ءُ نُک اَت۔ نہ گوں نزوریں چماں اے زیبائیں ندارگاں چاران اَت ءُ نہ گوں کیمرہ ءَ اے دلکشیں ندارگاں نزّ آرگ ءَ اَت، بس آ سپر ءَ اَت۔۔۔۔۔
”شَھم بچکندے ءِ بوسگانی جلِشک ھارے ءَ گون بنت
ھچ نہ مانیت بس بمبرے سَوت جنت“
کمانچر جان! تو ھر بلوچ ءِ دل ءَ جاگہ کُتگ، تو نمیران ئے سنگت۔
(16 کّرا (اپریل) 2024 ءِ بدیں روچ)
