ڈیھ ءِ مریدیں میرل

بیست ءُ یکّمی بھر:

نبشتہ کار: ھلیل بلوچ

لس مردُم ءِ زندگی ءَ بُرزی ءُ جھلی کئیت، برے انچیں دردناکیں روچ کاینت کہ مردُم ھمے سما کنت نوں زندگی ءِ وشی ھلاس اَنت۔ جوانیں روچانی اُمیت گِندگ ءَ نیا اَنت، بلے گْواچن ھمیش اِنت کہ سیاھیں شَپ الّم ءَ بام دنت ءُ رُژنائیں روچ وتی بْرانزاں مرزبوم ءِ سر ءَ تالان کنت۔ پمیشکا انسان ءَ را وتی اُمیت زندگ دارگی اِنت۔

اگاں گپّ سرمچار ءِ کئیت گُڑا سرمچار ءَ را گیشتر مُھکمی ءَ گوں اُمیتانی دامن دارگی اِنت، پرچا کہ سرمچار جُنزگ ءِ تہ ءَ اِنت۔ سرمچار وتی راج ءَ زندگ دارگ ءِ جُھد ءِ تہ ءَ اِنت، سرمچار ھون ریچگ ءَ اِنت۔ سرمچار گر ءُ گٹّانی تہ ءَ چہ ھید ءَ میچّل اِنت، ھمے پند ءُ ژند آئی ءِ رُژنائیں باندات ءِ مستاگ اِنت۔

میرل ءُ سنگتانی روگ ءَ پد بی ایل ایپ ءِ من ءُ ھاجی پش کپتگ اِت اَنت۔ ٹکّری چو کہ ھما دمگ ءِ سنگتے اَت، پمیشکا برے اوتاک ءَ اَت برے مھلوک ءِ نیمگ ءَ درکپت۔گُڑا من مُدام وداریگ اِت آں کہ کد میرل گوں بلاں کئیت، چوش کہ ودار چوناھیا سکّ گْران اِنت۔ اے کوہ ءُ گٹّانی تہ ءَ دلدوستیں سنگتانی ودار پورا نَپس ءَ گینّ ءَ کار اِیت۔

ھو! برے برے کہ شھید ساتک بہ اتکیں گُڑا ھما روچ پورا گْوش ئے ڈُکّال ءِ پد کرّائی ءِ وڑ ءَ اَت، پرچا کہ ساتک منی موڑ ءِ ھساب ءِ سنگتے اَت۔ آ کہ بہ اتکیں مئے مجلس ءُ دیوان، کندگ ءُ مسکرا اَت۔

ماھے گْوست میرل ءُ آئی بیلانی درکّ نیست اَت، مارا سواری ھم نیست اَت کہ ما بے بلا نیٹورکے ءَ ھالے بہ گپت اِیں۔ مئے چمّ گوں ٹکّری ءَ داروک اِت انت، گُڑا ما تنگ کُرت کہ ھر چون کن ئے مُترے وڑ کن تھنا یک روچے ما نیٹورک ءَ رو اِیں ءُ کا اِیں۔

ٹکّری مارا تسلّا دات ءُ درکپت، دومی روچ ءِ بیگاہ ءَ اتک ءُ گْوشت ئِے: “من مُترے آؤرتگ۔ کُرّئی ءِ گٹّ ءَ ایر اِنت، شُما باندا نیٹورک ءَ بُرو اِت۔”

من ھما بیگاہ ءِ وھد ءَ پہ نیٹورک ءَ تیار اِت آں، بلے ھاجی ءَ مکن کُت۔ گُڑا ما آدگہ سُھب ءَ پہ نیٹورکے ءَ درکپت اِیں، نیٹورک ءِ سر بوگ ءَ گوں من پہ میرل پیامے دیم دات چاراں میرل ھم لین ءَ اِنت۔ ھال ھوال کُرت، گُڑا میرل گوں پُر اُمیتیں گَپّاں مارا تسلّا دات کہ دگہ پنچ روچ ءِ تہ ءَ ما وتارا سرکن اِیں۔ ما اوتاک ءِ جاگہ ھال دات ءُ چہ نیٹورک ءَ درکپت اِیں۔

سئے روچ ءَ پد 15 نومبر 2015 ءِ بیگاہ ءَ ما مرکزی جُگّ ءِ کش ءَ نشتگ اِت اِیں ءُ چاہ مئے دیم ءَ ایر اَت کہ واکی ٹاکی ءِ تہ ءَ گنٹی ءِ توار اتک۔ واکی ٹاکی جُگّ ءِ تہ ءَ ٹنگوک اَت، من کِمار نہ کُرت کہ مئے ءُ بی ایل اے ءِ سنگتانی چینل یکّین اَت کہ ھمروچ گنٹی ءِ توار آتک گوں وت ءَ گَپّ اِش کُرت۔ ھاجی ءَ گْوشت: “کماش ءِ سنگتاں آرام نیست۔” بلے ٹکّری سرپد بوت گْوشت ئِے: “ھرکس اِنت ھمے نزّیک ءَ چہ گنٹی دیگ ءَ اِنت، دورینے نہ اِنت۔”

گوں ٹکّری ءِ گپّ ءَ منی ھیال تچک ءَ میرل ءُ بارگ ءِ نیمگ ءَ شُت، من دْرِکّ کُرت ءُ جُگّ ءِ تہ ءَ چہ واکی ٹاکی زُرت ءُ توار جَت “ھیلو گنٹی ھیلو۔”

روان اِنت۔۔۔