نبشتہ کار: چراگ بلوچ
شھید بالاچ جان تو چی ءَ چو اِشتاپ کُت ءُ شُت ئے، تئی روگ ءَ چہ رند من سَک تھنا آں۔ سَک مُلور آں، تئی روگ ءَ چہ رند من سک بے تاھیر آں، من ھر وھد ءَ اِیوک ءَ نند آں ءُ پہ ترا جیڑان ءُ ترا یات کن آں۔ تئی وش ءُ شوکیں بچکنداں یات کن آں، تئی وش ءُ زیبائیں گپاں یات کن آں، وھدے من پہ ترا جیڑاں گُڑا سَک بے تاھیر باں، تئی روگ ءَ چہ رند ھچ وش نہ اِنت، دْرستیں ھند ءُ دَمگ گْوش ئے ویران اَنت۔ ھَر نیمگ ءَ بے تواری اِنت، تئی روگ ءَ چہ رَند شاشان سَک ابیتک ءُ مُدام ترا یات کنگ ءَ اِنت۔
من ءَ یات اِنت کہ تو گوں مارا وانگجاہ ءَ وانگ ءَ اِت ئے، وھدے من ترا وانگجاہ ءَ دِیست تُو سَک بے توار اَت ئے، تو سَکّ مُلور اَت ئے، بلے من نہ زانت کہ تو چی ءَ چو مُلور ءُ بے تاھیر ئے، وھدے کہ وانگجاہ ءَ چہ موکل بوت گُڑا ھَرکس پہ وَشّی ءُ شادانی وتی لوگ ءَ روگ ءَ اَت، من ھرچ روچ ترا دیست کہ تو سَک پریشان اَت ئے، بلے من اے نہ زانت کہ تئی پریشانی چی اِنت؟ تو سَکیں مھروانے اَت ئے، تو ھَرکس مھر کُت ءُ ھَرکس دوست داشت، وھدے من تئی مھر ءُ مھروانیاں یات کن آں گُڑا یک برے من سَک پریشان بہ آں، بلے پد ءَ جیڑاں کہ من ءَ پریشان بَوُگی نہ اِنت، چی ءَ کہ تو پہ وتن شھید بوتگ ئے۔ تو زمین ءِ ھک اَد ءَ کُتگ، ترا وتی ماتیں زمین ءَ گوں مھر بوتگ ءُ تو پہ وتی زمین ءِ رکینگ ءِ ھاتر ءَ مُدام دژمن ءِ دیم ءَ چو کوہ ءَ مِک بوتگ ئے ءُ دژمن پْروش داتگ۔ تو وت ءَ راجدپتر ءَ نمیران کُت ءُ شت ئے، تو مُدام مئے دلانی توک ءَ زندگ ءُ ھَست ئے۔ چی ءَ کہ وتن دیوانگ نہ مِر اَنت، آ نمیران بنت ءُ مُدام راجدپتر ءَ زندگ مان اَنت۔
وھدے کہ من ءَ تئی شھیدی ءِ ھال اَتک ءُ سَر بوت گُڑا من سَک بے تاھیر بوت آں، چمانی اَرس ترمپ ترمپ ءَ ریچگ ءَ لَگ اِت اَنت ءُ بس من پہ ترا جیڑگ بندات کُت۔ تئی آ ھُشکیں لُنٹانی بچکند یات آیگ ءَ اَت اَنت، تو مارا سَک یات کائے، بیا اد ءَ ھچ وش نہ اِنت۔ تو بیا واتر بِہ کن پہ تو ما سکا پُرسیگ اِیں، تئی روگ ءَ چہ رند زند گْوش ئے دوزھے بیتگ۔
شھید بالاج نہ زاناں پہ ترا چے نبشتہ بہ کن آں، منی کِرّ ءَ لبز نیست کہ من کُجام وڑ ءَ تئی توسیپ ءُ ستا ءَ بِہ کن آں۔ وھدے من موبائل ءَ پَچ کن آں تئی اکس چار آں گُڑا من سَک جیڑ آں پہ ترا، تو گوں وتی کسانیں بالاد ءَ چی ءَ چو زوت مارا تھنا کُت ءُ شُت ئے؟
شھید بالاج جان من ءَ وھدے تئی کوہ ءِ روگ ءِ ھال اَتک ءُ سَر بوت، گُڑا پیسر ءَ باور ھم نہ بوت کہ تو کوہ ءَ شُتگ ئے۔ پد ءَ گْوشت بلکیں بوت کنت تو شُتگ ئے، چی ءَ کہ تو انچیں بے تواریں مَردُمے اَت ئے ءُ پمیشکا من ءَ تئی روگ ءَ باور بوگ ءَ نہ اَت۔ بلے پد ءَ من زانت کہ ترا گوں وتی زمین ءَ مھر بوتگ، ترا گوں وتی راج ءَ مھر بوتگ، پمیشکا تو اَجوئی ءِ جنگ ءَ کوھاں سَر کپتگ ئے۔ پہ وتی ماتیں وتن ءَ شھید بیتگ ئے۔
شھید بالاچ جان من زاناں کہ تو پہ ما واتر نہ بہ ئے، چی ءَ کہ تو وتی زمین ءِ ھاکانی باھوٹ ئے۔ منی گوں ھُداوند ءَ دُوا ھمیش اِنت کہ ترا باگیں جنت نسیب بِہ کنت۔
