راجی جُھد ءِ گْوستانکے

نبشتہ کار: آئیشہ بلوچ

گِند ئے بلوچ راج یکشل ءَ کالونیلزم ءِ زُلم ءُ زوراکیانی آماچ اِنت۔ انی ما راج ءَ سرپدی دے ایں کہ کالونیلزم ءِ لبزی مانا چے اِنت؟ کالونیلزم ءِ مانا یک زورگریں ریاستے نزوریں ملکے ءِ ھند ءُ دمگاں اُرش ءُ کبزہ کنت ءُ آئی ءِ مال ءُ مڈیاں لُٹ اِیت ءُ وتی دیار ءَ بارت اش۔ کبزہ گیر یکبارگی اُرش نہ کنت بلکیں پیسر وتی کاسگچٹانی کُمک ءَ یک دْروگیں سسایے ودی کنت، آئی ءِ سر ءَ وتی وانگی ربیت ءَ مُسلّت کنت۔ وامدار کنان ءَ آئی ءِ راجکاری، زر ءُ مالانی سر ءَ وتی اسرات ءَ مان کنت۔ اگاں ما وھد ءُ زمانگی کالونائزراں بہ چار ایں آ زمانگ ءَ لھتیں ملک بوتگ اَنت پہ دروَر روم، گِریس ءُ اِجِپٹ کہ اِے ھما ملک بوتگ اَنت ایشاں پہ وتی سیمسراں پْراہ ءُ دْراج کنگ ءِ واست ءَ آدگہ ایردستیں راجانی سرڈگار ءِ سر ءَ اُش ءُ پد ءَ کبزہ کرت۔

اگاں ما امریکہ ءِ گپ ءَ بہ کن ایں گُڑا امریکہ ءِ سینزدہ کالونی بوت اَنت کہ آ برتانیہ ءِ کبزہ ءَ بوتگ اَنت۔ آ سینزدھیں کالونیانی تہ ءِ مردمانی کِساس 2000 بوتگ اَنت، دیم ءَ چہ آجوئی ءَ پد آیانی کِساس 2.4 ملین بوت اَنت۔ اگاں ما دیمتر ءَ گپ ءَ بہ جن ایں برتانیہ یک تاگتوریں ملکے بوتگ ءُ پہ وتی سیمسرانی پْراہ ءُ دْراج کنگ ءِ واست ءَ بازیں دیار کبزہ کرت ئِے۔ پہ دروَر ساؤتھ اپریکہ، ساؤتھ ایشیا ءِ بازیں ملکے وتی کبزہ کرتگ اَنت۔ اگاں ما بہ چار اَیں ھندوستان ھم تاں دو سد سال ءَ برتانیہ ءِ چیردست بوتگ ءُ آئی ءِ گلام بوتگ۔

پُرتگیزاں ھم چہ برتانیہ ءَ پیسر ھندوستان ءِ سر ءَ اُرش ء کبزہ کرت۔ پرچا کہ کالونائیزر یک ملکے ءِ کبزہ کنگ ءَ پیسر ءَ وتی بیوپاریں مھلوک ءَ آ دیار ءِ تہ ءَ روان دنت، ھمے پیم ءَ پُرتگیزیاں کِرسٹوپس کولمبس ءَ پہ بیوپاری ءَ ھندوستان ءِ تہ ءَ روان دات۔ آئی ءِ مزنیں مول ءُ مراد ھندوستان مال ءُ مڈیانی برَگ بوت۔ رَند ءَ دری ملکانی راج سرپد بوت اَنت کہ ایشیا ءِ توک ءَ ھندوستان نامیں دیارے ھست کہ آئی ءِ تہ ءَ ابرمی مال ءُ مڈی سک باز اِنت بلے آئی ءِ مھلوک ناسرپد ءُ ناپوھیں مردم اَنت۔ وھدے کہ پرتگیزی ھندستان ءَ کا اَنت گُڑا پیسر ءَ گووا ءِ تیا(بِیچ) ءَ کبزہ کن اَنت، اِے جاہ تاں ھندستان ءِ آجوئی ءَ پد ھم پرتگیزیانی کبزہ ءَ بوتگ ءُ 1966 ءَ آئی ءَ ھندوستان ءِ ھوالہ ءَ کرتگ۔

مئےسرڈگار بلوچستان ھم یک زمانگے برتانیہ ءِ کبزہ ءَ بوت۔ چہ بلوچستان ءِ کبزہ کنگ ءَ پیسر ءَ برتانیہ اوگانستان ءِ سر ءَ دو رَند ءَ جنگ کنت ءُ آئی ءَ کبزہ کنت، چہ اوگانستان ءَ رَند 18می سدی ءِ دھک ءَ برتانیہ بلوچستان ءِ سرڈگار ءِ سر ءَ اُرش کنت ءُ آئی ءَ کبزہ کنت بلے بلوچ راج ءِ ورنا گوں مھکمیں پِگرے ءَ برتانیہ ءِ لشکر ءِ بگیری ءَ جنگ کنت ءُ بازیں بلوچ ورنا اِے اُرش ءَ شھید کنگ بیت۔ آ وھد ءَ بلوچستان ءِ تہ ءَ چار ریاست بوتگ اَنت، کلات، ھاران، مکران ءُ لسبیلہ۔ پیسر ءَ برتانیہ ءِ لشکر گوں آدگہ سے ئیں بلوچ ریاستانی دلاریں سرداراں گوں گِند ءُ نِند کنت ءُ آ برتانیہ ءِ بالادستی ءَ منّ اَنت بلے ریاست کلات ءِ سروک نواب ھان مھراب ھان اَت کہ آ بلوچ سر ڈگار ءِ چیردستی ءُ کبزہ ءِ بگیری ءَ گوں برتانیہ ءِ لشکر ءَ مِڑ اِیت ءُ جنگ کنت۔

اِے وھداں بازیں دلاریں دمگی سردار، نواب ءُ میر گوں مھراب ھان ءَ دْروہ(دھوکہ) کن اَنت ءُ انگریز ءِ لشکر ءِ پلامرزی ءَ کن اَنت۔ بلے مھراب ھان وتی سرڈگار ءِ رکینگ ءِ ھاتر ءَ وتی زندمان ءِ گُڈی ساہ ءِ کشگ ءُ گوں برتانیہ ءِ زورگریں لشکر جنگ کنت، اِے جنگ ءِ تہ ءَ بازیں بلوچ ورنا وتی جان ءَ ندر کنت ءُ بازیں انگریز ءِ لشکر ءِ سپاھیگ ھم کُشگ بیت ءُ 13 گوبشان 1839 ءَ نواب ھان مھراب ھان گْوں وتی سرمچنڈیں سنگتاں دیم پہ دیمی جنگ ءَ شھید بیت ءُ ماتیں سرڈگار ءِ رکینگ ءَ وتی جان ءَ ندر کنت بلے وتی سرجھلی ءَ نہ منّ اِیت۔

ھمے پیم ءَ بلوچ راج داں روچ مرچیگ ءَ گجر ایران ءُ پنجابی پاکستان ءِ دیم ءَ ھچبر سرجھل نہ بوت، بلکیں شھزادگ ابدلکریم، بابو نوروز، بابا مری، نواب اکبر ھان بُگٹی تا مرچیگیں بلوچ راج ءِ وانِندھانی سروگانی ءَ راجی آجوئی ءِ جُھد گوں سوبمَندی ءَ دیم ءَ روان اِنت۔ یک گپے ءَ بِے سما مہ بَہ ایں مرچیگیں بلوچی راجی آجوئی ءِ جھد چہ سردار ءُ نوابانی دست ءَ شُت بلوچ وانندھیں بْرات ءُ گْوھارانی دست ءَ شُت۔

باید اِنت بلوچ راج رھشُون ءُ وانِندہ یکمشتی ءُ تپاکی ءِ جُھد بہ کن اَنت ءُ اے راجی آجوئی ءِ جنگ ءَ پہ بلوچستان ءِ آزاتی ءَ آسر بہ کن اَنت۔ بلوچستان آزات بات ءُ بلوچ راج یکمُشت ءُ راجمستری(جمھوری) بلوچستان دیمروی بکنات۔