نبشتہ کار بْرمش شاشانی
گِند ئے مرچاں ماں ٹَکراں بھر ءُ بانگیں(قبائلوں میں تقسیم) بلوچ راج ءِ یکجاھی ءُ یکمُشتی مئے راج ءِ وش بھتی اِنت۔ اِے دْراہ راجی رھشون ءُ راجی بامرد بابا ھیر بکش مری ءِ جُھد ءُ کربانی ءِ برکت اَنت کہ مرچاں بلوچ راج آجوئی ءِ نیمگ ءَ جُنزان اِنت ءُ زوتیں روچاں دنیا ءِ تہ ءَ بلوچستان یک آجوئیں ملکے زانگ بیت۔ گِند ئے بابا مری ءَ بلوچ پدریچ زِندگ کُت، نمیرانیں ھیر بَکش ءَ وَتی چَاگِرد زِندگ کُت، گُلامی ءِ ھلاپ ءَ جُھد ئِے کُت۔
واجہ ءَ مردُماں ھمے راھ ئِے پیش داشت کہ شُمَا بیا اِت وتی پدریچ زِندگ بِکَن اِت، گلامی ءِ ھِلَاپ ءَ جُھد کَنگ ءُ وتی پجّار ءَ بہ رکین اِت۔
بابا ھیر بَکش مری ءَ وتی پَنجگ پچ کُت اَنت، وَتی تُپنگ ئِے شان ءُ بُرز ءَ کُت ءُ پہ راجی آجوێی ءَ سرجمیں راج ئِے جَنگ ءَ پَاد کُت۔ پہ راج ءِ آگاھی ءَ لوگ ماں لوگاں شُت ء ھمے سَرپَدی دات ئِے کہ ما بلوچ وت یک سرجمیں راج ایں، مارا وتی زُبان، سرڈگار ءُ رواج ھست ما گوں پاکستان ءُ ایران ءَ ھچ سْیادی نہ دار ایں۔ ما گُلام ایں. باید اِنت وتی گلامی ءَ بہ مار اِت، بِیا اِت ءُ پہ بلوچستان ءِ آجوئی ء گوں ما ھوار بَہ اِت۔ اِے جنگ ماں ٹَکراں بھر ءُ بھانگیں راج ءَ نزیک کار ایت ءُ ھوار کنت۔ اِے جنگ راج ءَ یک پجّارے دنت۔
اِے جنگ سرجمیں بلوچ راج ئیگ اِنت ءُ اِے آجوئی ءِ جنگ کُربانی لوٹ اِیت۔ راجی بامرد بابا ھیر بکش ءَ گُشتگ اَت کہ اِے جَنگ مَارَا دِیم ءَ آرگ لُوٹ اِیت ءُ مَارَا وَتی جَنگَانی پَاسپَان بوَگی اِنت مَارَا وَتی جِِند ءُ بَچ کُربَان کَنگ لُوٹ اَنت۔ نمیران ءَ گُشتگ اَت کہ ما گلام ایں، مئے زبان ءُ سرڈگار. گلام اِنت اگاں ما گُلَامی ءِ ھِلَاپ ءَ جُھد نَہ کَن اِیں گُڑَا مئے پدریچ ءُ راجی ھستی زِندگ بُوت کُت نَہ کَن اَنت۔مُدام ھمے گْوشت ئِے کہ اگاں کَسّے گُلَامی ءِ ھِلَاپ ءَ جُھد نَہ کَنت گُڑَا آ وَت ءَ ھِچ زِندَگیں مَردُمے مَہ گُش اِیت مئے رَاجَانی تُوک ءَ کسّی کہ وَتی گُلَامی ءِ ھِلَاپ ءَ جُھد، توَار ءُ تُپنگ چِِست کُت نَہ کَنت گُڑَا آ چہ گُلَامی ءِ پنجگ ءَ ھِچ وَڑ ءَ آجُو بُوت کُت نَہ کَنت مَارَا اِے جَنگ دِیم ءَ بَرگ لوٹ اِیت مَارَا کُربَانی دَیگ لُوٹ اِیت وَتی وتی راجی زبان، بلوچ دودءُربیدگ ءُ سرڈگار آجو کنگی اَنت پمیشکا ھیر بکش ءَ ھوار دِگہ بازیں راجی رھشوناں پہ بلوچستان ءِ آجوئی ءَ وتی جان ءُ سَاہ کُربَان کُتگ اَنت۔ گُلَامی ءِ ھلاپ ءَ آیاں وَتی جَنگَانی ملپد زِندگ کُتگ اَنت مارا آیَانی جِِند ءُ راھ شوھَاز کَنگ لُوٹ اَنت آیَانی پَدگِیر مَا اِیں ءُ مارا اِے جَنگ ءِ ھَمتوَار بوگی اِنت مَارَا اِے راجی جَنگ ءِ جَنگجُو بوَگی اِنت۔ مارا بابا ھیر بکش مری ءِ پیشداشتگیں راہ ءَ جُنزگی اِنت۔ مارا سک وشی بیت کہ راجی بامرد بابا بیر بکش ءُ شھید نواب اکبر ءِ جنگ ءَ سرجمیں بلوچ راج پہ راجی آجوئی ءَ یکجاہ ءُ ھمگام کُتگ۔ رکشان ءُ مکُران ءَ بابا ھیربکش ءِ سرمچار دژمن ءَ پْروش دیگ ءَ اَنت۔ انی مارا کوہ سلیمان ءِ دمگاں کہ اود ءَ سرکار ءُ پوج ءِ گلامیں نواب، میر ءُ سردار بلوچی راجدوستی ءِ ھلاپ دژمن ءِ ھمراہ اَنت اود ءَ راجی جنگ برگ لوٹ ایت۔
سلامت بات اِت، شالا بلوچستان آجو بات، راجمستری بلوچستان شالا دیمروی بہ کنات۔ زبان دوست ءُ راجدوست بِہ بات اِت، بلوچ راج شالا یکمُشت ءُ ھمدست بات، بلوچ شالا دیمروی بکنات۔
