بنگالی ءُ بلوچ راجی جنگ ءِ نزیکی!

ندکار: آئیشہ بلوچ

دُنیا ءِ ھر گُلامیں راجاں پہ وتی راجی آجوئی ءِ جُھداں راج ءِ لس مھلوک یکجاہ ءُ یکمُشت کُت اَنت، آیاں آشوب ءِ بُندری لوٹ پیلو کُت ءُ چہ دُژمن ءِ ھر نزوری ءَ بے کساس پائدگ اش زُرت گُڑا وتی راجی جُنز ءَ سوب مند بوت اَنت۔ نی ما چار ایں زاناں بلوچ راج وتی راجی آجوئی جُنز ءِ لوٹاں سرپد اِنت؟ زاناں راج ءِ رھشُون ءُ لس مھلوک ءَ سُدّ ھست کہ یک راجی آشوبے ءِ بُندری لوٹ چے اَنت؟ زاناں جُنز ءِ رھشُون ءُ راج ءِ لس بلوچ ءَ سرپدی ھست کہ دُژمن تئی کُجام کُجام نزوری ءَ بلوچ راجی جُنز ءِ بگیری ءَ کارمرز کنگ ءَ اِنت ءُ ایشی ءِ بگیری بلوچ راج ءَ چے کُتگ ءُ مرچاں چے کنگ لوٹ ایت؟ زاناں بلوچ راج ءِ مستریں نزوری چے اَنت ءُ راجی رھشُون ءُ راج ءِ آشوبی باسکاں پہ ھمے نزوریانی ھلاس کنگ ءَ چے کُتگ ءُ چونیں گامگیج زُرت اَنت؟

دُنیا ءِ ھر وڑیں راجی جُھد گوں لس مھلوک ءَ ھمگرنچ بنت پمیشکا باید اِنت بلوچ راجی رھشُون، نودربر، زُبان دوست ءُ راجدوستیں باسک اے وڑیں چیزانی سر ءَ ھم چمشانک بہ دے اَنت ءُ راج ءِ لس مھلوک ءَ راجی جُنز ءِ بابت ءَ گیشتر آگاھی ءُ سرپدی بہ دنت۔ وھدے کہ یک گُلامیں راجے ءِ پوریاگِر، دھکان ءُ لس مھلوک ءَ وتی بزگی ءُ گُلامی مار اتگ، راج ءِ ھمُک مرد ءُ زالبول، کماش ءُ ورناھاں زِد ءِ تہ ءَ دُژمن ءُ دُژمن ءِ زورگِریں زُبان ءِ سر ءَ زھر ءُ نپرت ودی کُتگ گُڑا بزان کہ گُلامیں راج یک روچے الم وتی آجوئی ءِ منزل ءَ سر بیت چو کہ دُژمن ءِ سر ءَ نپرت راجانی آجوئی ءِ بُنکی لوٹ اَنت۔ چوناھا بزگیں راج ءِ سر ءَ دُژمن ءِ ناھودگیں کُشت ءُ کوش، زُبان ءُ دودانی لگتمالی، زُلم ءُ زوراکی زیردستیں راج ءِ تہ ءَ وت نپرت ودی کنت گُڑا ھمے کست ءُ نپرت ءِ برکت ءَ گیرتمندیں ورناہ وتی راجی آشوب ءَ ھوار بنت۔

دُنیا ءِ بلاھیں آشوبی رھشُونانی رِد ءَ زورگِر ءِ زُلم ءُ ￶زوراکی وت زیردستیں راج ءَ پہ وتی راجی آجوئی ءَ یکجاہ کنت ءُ ￶آجوئی ءِ راہ پیشدار ایت۔ دُژمن ءِ سر ءَ زھر ءُ نپرت زیردستیں راج ءِ رھشُونی کنت ءُ نپرت ھما وھد ءَ ودی بیت وھدے کہ راج ءِ شیرزال راجی آجوئی ءِ جُنز ءَ ھوار گوں وتی بْراتاں ھمکوپگ بہ بنت۔ پہ بچّ ءَ زالبول ءِ نازینک وت دُژمن ءِ ھلاپ ءَ نپرت ودی کنگ ءِ بلاھیں سِلاہ اَنت پمیشکا گْوش اَنت بے زالبول ءِ جُھد ءَ ھچ راجی آجوئی ءِ جُنز سوب مند نہ بیت۔

باید اِنت راجی رھشُون ءُ نودربر بنگالی راجی جھد ءِ بابت ءَ چیزے بہ وان اَنت گُڑا چیزے سرپد بنت چے ءَ کہ بلوچ راج ءِ دُژمن ھم ھما یکین اِنت کہ پیسر ءَ بنگالی راج ءِ دُژمن بوت۔ مارا چیزے چہ بنگالی راج ءِ آجوئی جُھد ءَ دربرگ لوٹ ایت کہ ھما بنگالیاں پہ انگریز ءِ کاسگ چٹّی ءَ ھندوستان ءِ راجدوستیں سیاسی گل آل انڈیا کانگریس ءِ بگیری ءَ 30 دسمبر 1906 ءَ ڈھاکہ ءِ دمگ ءَ یک جُتائین ءُ وتگڑیں اسلامی مُلک بزانکہ پہ کوڑائیں پاکستان ءَ آل انڈیا مسلم لیگ ءِ پاٹی اڈ کُت۔ گُڑا زاناں 1971 ءَ چے بوتگ اَت کہ ھمے بنگالیاں جُتائیں مُلک بنگلہ دیش ءِ لوٹ کُت؟

اگاں ما بنگالی سیاستدان شیک مُجیب الرھمان ءِ بابت ءَ ھورت بِہ وان ایں گُڑا ما سرپد بَہ ایں کہ مُجیب لرھمان وت انگریز ءُ پد ءَ پاکستان سرکار ءِ مزنیں کاسگ چٹّے اَت۔ شیک مُجیب الرھمان ءَ 1940 ءَ نیکراھی گل آل انڈیا مسلم لیگ ءِ نودربری گل آل انڈیا مسلم اسٹوڈنٹس پیڈریشن ءَ باسکی زُرت ءُ پد ءَ 1943ءَ انگریز ءِ بنگالی دلار ھسن سھروردی ءَ ھوار بوت ءُ پہ پاکستان ءِ اڈ کنگ ءَ ھر وڑیں زھرشانی ئیں روانک ئِے ھم کَشائینت انت۔ ھمے شیک مُجیب الرھمان وت مھمد اَلی جِناہ ءُ آئی ءِ گْوھار پاتما جِناہ ءِ ھاسیں دپچٹے اَت۔ 1965 ءِ گچینکاری ءَ جنرل ایوب ءِ بگیری ءَ شیک مجیب الرھمان پاتما جناہ ءِ کُمک کُت بلے گِند ئے ھمے پاتما جناہ ءُ آئی ءِ بْرات مھمد الی جناہ ءَ بنگالی راجی زُبان ءِ جُنز(بھاشا آندولن 1948-1952) ءِ ھلاسی ءَ 21 پروری 1952 ءَ بنگالی زُبان دوست ءُ راجدوستیں نودربر، استاد ءُ شائِرانی کُشت ءُ کوش ءَ ھوار ات اَنت وھدیکہ آیانی بُنکی لوٹ ھمیش اَت پاکستان ءِ سرکاری زُبان بنگالی بہ بیت، پاکستان ءِ مستریں راج ما بنگالی ایں ءُ دومی مستریں راج پنجابی ءُ سَیمی سندھی اَنت، چارمی پشتو ءُ پنچُمی بلوچ اَنت گُڑا ھندی(اردو) چتور ءُ کُجام ھساب ءَ پاکستان ءِ سرکاری زُبان بیت؟

بزانکہ یک نیمگے ءَ بنگالی زُبان دوست، شائِر، نودربر، استاد ءُ لس راجدوستیں مھلوک پہ وتی راجی زُبان ءِ پھازگ ءَ زگریں ھوناں ریچگ ءَ ات انت گُڑا دومی نیمگ ءَ آوامی لیگ ءِ ھسن سھروردی، واجہ نزام الُدین، مھمد الی بوگرہ ءُ وت شیک مُجیب رھمان ءِ وڑیں کاسگ چٹّ گُنگ ءُ کَر پاکستانی پرستی ءَ اوشتاتگ اَت۔ ھمے بھاشا آندولن ءُ بنگالی زُبان دوست ءُ راجدوستانی کُشت ءُ کوش ءَ پد بنگالی لس راج ءِ تہ ءَ راجدوستی ءِ آشوبے ودی بوت گُڑا پہ ھمے زُبان دوستی ءُ راجدوستی ءِ دیمروی ءَ بنگالی اُستاد، نودربر، راجی شائِر ءُ شھزانتاں سک باز جُھد کنان ءَ بنگالی راج آگاہ کُت کہ پاکستان بنگالی راج ءِ دوزواھے نہ بیت گُڑا باید انت بنگالی راج پہ وتی راجی آجوئی ءَ تیار بہ بیت۔ بلے دومی نیمگ ءَ پاکستان ءَ نیکراھی جمائت اسلامی ءِ سیاسی گل ءَ ھوار دِگہ دمگی سروک ءُ سیاسی رھشون بنگالی راجدوستی ءِ بگیری ءَ تیار ءُ کارمرز کُتگ اَنت۔

وھدیکہ 1956-57 ءَ کاسگ چٹّ ھسن سرواردی پاکستان ءِ سر وزیر اَت گُڑا ھمے بے گیرتیں بنگالی ءَ وتی اردو زُبان ءِ گُشتانکانی دیگ یک انچیں درشاندابے ءِ جُھد کُت کہ بنگالی گالوار ءِ تام زاھر مہ بیت، بزانکہ کس ءَ مہ مار ایت کہ من بنگالی یے آں بلکیں من پاکستانی یے آں! متلب کہ کاسگ چٹّی ءِ گُڈی سیمسر چو کہ راجدْروہ سرپراز بُگٹی ءِ وڑ ءَ آئی ءَ ھم وتی جِند ءِ ماتی زُبان ءَ زھر ءُ نپرت انت۔

وھدیکہ 1970 گچینکاری ءَ مجیب الرھمان ءَ باج بُرتگ اَت گُڑا سندھی کاسگ چٹّ بُٹو ءَ گوں جنرل یایا ءَ ھوار مُجیب الرھمان ءَ سرکار اڈ کنگ ءَ نیلگ ءَ اِت انت۔ گُڑا بنگالی راج ءِ زُبان دوست، نودربر، اُستاد، شائِر ءُ راجدوستیں لس مھلوکاں اے موہ ءِ پائدگ زُرت ءُ وتی بزگیں راج پہ وتی راجی آجوئی ءَ یکجاہ ءُ یکمُشت کُت۔ گُڑا پاکستانی پوج شپ داں روچ ھمے آزاتی لوٹوکیں جُھدکاراں یکشل ءَ کُشگ ءَ اَت۔ بلے دومی نیمگ ءَ آوامی لیگ ءِ کاسگ چٹّاں مُدام ھمے لوٹ کنگ ءَ اَت کہ ما گچینکاری ءَ باج بُرتگ پمیشکا اے مئے ھَک انت کہ مارا پاکستان ءَ وتی سرکار اڈ کنگ ءِ موکل بہ رس ایت۔ کاسگ چٹّیں مجیب الرھمان ءَ مُدام ماں زھرشانی ءِ گُشتانکاں ھمے گْوشتگ کہ ما پاکستانی ایں ءُ مارا بِل اِت کہ ما وتی سرکار ءَ جوڑ بہ کن ایں۔

بزانکہ مجیب ءَ وتی گُشتانکاں پاکستان ءِ بگیری ءَ ھچ گپ نہ کُرت کہ ما بنگلہ دیش ءِ آجوئی ءَ لوٹ ایں پمیشکا داں روچ مرچی پاکستانی سیاستدان گْوش اَنت کہ 1971 ءَ پاکستان ءِ پْروش ءِ زمہ وار بُٹو، یھیا ءُ پاکستان ءِ پوج انت نَیکہ آوامی لیگ دگہ رھشُون ءُ شیک مجیب الرھمان اَت۔

دومی نیمگ ءَ 1971 ءَ نمیرانیں ایم۔ اے۔ اُسمانی، واجہ اے۔ ایم۔ راب، واجہ روہ الامین، واجہ جھانگیر، واجہ مُستپا کمال، واجہ ھمید الرھمان، مُنشی ابدُر راؤپ ءُ واجہ نور مھمد شیک ءِ وڑیں راجدوستیں اُستاد، نودربر ءُ لس بنگالی راجدوستاں پہ وتی راجی آجوئی ءَ سِلاھبندیں گل مُکتی بانی اڈ کُت کہ آیاں گچینکاری ءَ پیسر مُدام آوامی لیگ ءُ آئی ءِ رھشُوناں کاسگ چٹّ ءُ راجدْروہ ءِ نام دات اَنت۔ بزاں کَے گْوش ایت کہ مجیب الرھمان ءُ دگہ آوامی لیگ ءِ بنگالی سیاستدان بنگلہ دیش ءِ آجوئی لوٹوک ات اَنت؟ چہ ایشی ءَ ھوار ھمودالرھمان ءِ کمیشن ءَ ھم ھمے پدر کُت کہ بنگلادیش مجیب الرھمان آجو نہ کُت بلکیں بنگالی سرمچاری گل مکتی بانی ءُ پاکستان ءِ زلماں آجو کُت۔

بنگالی راجی سِلاھبندیں گل مُکتی بانی گوں پاکستان ءِ لشکر ءَ دیم پہ دیمی جنگ ءَ اَت بلے دومی نیمگ ءَ شیک مجیب الرھمان تاں مارچ 1971 ءَ پاکستان ءِ رکینگ ءِ گپ ءَ کنگ ءَ اَت۔ وھدیکہ 26 مارچ 1971 ءَ پاکستانی پوج ءَ مُجیب لرھمان دزگیر کُت گُڑا لھتیں آوامی لیگ ءِ رھشُوناں وت ءَ چیر کنان ءَ وت ءَ چہ جُھد ءَ دیر داشت ءُ لھتیں مُکتی بانی ءَ ھوار بوت۔ پاکستانی پوج ءَ راجی آزاتی لوٹوکیں مُکتی بانی ءِ سِلاھبندیں گل ءِ بگیری ءَ جمائت اسلامی ءِ بنگالی کاسگ چٹّ کارمرز کُت اَنت۔ پوج ءِ جنرالاں چہ جمائت اسلامی ءَ الشمش، البدر ءُ رزاکار ءِ وڑیں سِلاھبندیں راجدْروھیں گل تیار کُت اَنت کہ راجدوستیں بنگالی مھلوک ءِ گِساں ماندار اِت، جھدکارانی لوگ ءِ مردم ءُ سْیاداں بہ کُش اِت ءُ آیانی چیزاں لُٹ ءُ پُل بہ کن اِت۔

ایشی ءَ ابید 25 مارچ 1971 ءَ یونیورسٹی، کالج ءُ دگہ سرکاری کارجاھاں پاکستانی پوج ءَ بنگالی اُستاد، نودربر، شائِر، شھزانت، پوریاگِر ءُ دگہ راجدوستانی بگیری ءَ بدنامیں جنگی اُرش “آپریشن سرچ لائیٹ” بُنگیج کُت ءُ ھر جاھے ءَ بنگالی راج ءِ کُشت ءُ کوش ءَ ھوار زالبولانی گون ءَ بدکاری ءُ کمشرپ کنگ البار اَت۔ ھمے زوراکی ءُ زُلم ءَ بنگالی راج ءِ تہ ءَ پاکستان ءِ بگیری ءَ کینگے ودی کنان ءَ بنگالی راجی آشوب گیشتر مُھکم کُت۔ بنگالی راج ءِ وتی جِند ءِ راجدْروہ ءُ پنجابی پوج ءِ زُلم ءُ زوراکیانی بگیری ءَ جُھد کنان ءَ دسمبر 1971 ءَ بنگلہ دیش چہ پاکستان ءِ زیردستی ءَ آجو بوت گُڑا آجوئی ءِ اولی ساھت ءَ لس بنگالی راجدوستاں مُچی ءُ ٹولیانی دْروشم ءَ وتی راجدْروھانی سر ءَ اُرش کُت ءُ آیانی بازیں کچے ءَ گِس مانداشت اَنت ءُ بازیں راجدْروھے وت کُشت۔ پد ءَ بنگلہ دیش ءِ سرکار ءَ یک یکی ءَ جمائت اسلامی ءِ راجدْروھیں سر کماش ءُ کارمند پاھو ءِ سزا دات انت انچوشکہ یک نوک آجو بیتگیں راجے ءَ وتی راجدْروھاں لازم سزا دیگی انت کہ راج مُھکم بہ بیت ءُ راجدوستی ءَ ھاٹیگ بہ رس ایت۔ اگاں یک نوک آجو بیتگیں راجے وتی راجی دلار ءُ راجدْروھاں سزا مہ دنت گُڑا آجوئی ءِ جُھدکار دلپْروش بنت ءُ آ راج ءِ سرڈگار دِگہ یک زورگِرے ءِ زیردست بیت۔

اگاں بچار ئے گڑا بلوچ راج ءُ بنگالی راجی جُھد ءَ ھاسیں دگری وَ نیست۔ چو بنگالی راج ءِ بگیری ءَ دُژمن بلوچ راجی آجوئی ءِ جُنز ءِ بگیری ءَ ھم شپیک مینگل ءِ رنگ ءَ مزھب ءَ ھوار زبیدہ جلال، مینا بلوچ، کدوس بزنجو، جام کمال، سادک سنجرانی، یار مھمد رِند، ابدلرھمان کھتران، زُلپکار مگسی، سرپراز بُگٹی، جمالی، لیگاری، مزاری، کھوسہ، بزدار، جھکرانی، لھڑی، ڈومکی، رئیسانی، شھوانی، زھری، لانگو ءُ بازیں بلوچ راجانی ٹکری سروکاں بلوچ راجی آجوئی ءِ بگیری ءَ کارمرز کنگ ءَ انت۔ چوناھا بلوچ راج ءِ مستریں دُژمن ھمے پنجابی پرست دمگی سردار، میر ءُ نواب اَنت کہ آیاں وتی ٹک ءِ بلوچ گُلام داشتگ اَنت ءُ ھر کس وتی دمگ ءَ سرمچارانی بگیری ءَ سِلاھبند اِنت۔ ھر دمگی کوڑائیں میر ءُ سرداراں وتی دمگ ءِ لس بلوچاں بیھار دات کہ ھرکسے بلوچ راجی آجوئی سِلاھبندیں گل ءَ ھوار بوت گُڑا آئی ءِ گس ماندارگ ءُ آئی ءِ کھول لڈّینگ بیت۔ اگاں بچار ایں گڑا ھمے دمگی راجدْروھیں سرداراں بلوچ ماں ٹَکراں راج بھر ءُ بانگ کُت۔ دومی پاکستان ھم نہ لوٹ ایت کہ من سِلکاریں (کرپٹیں) بلوچ سرداراں زھر مہ دے آں چے ءَ کہ چہ سردار ءِ زھر گِرگ ءَ گُلامیں لس بلوچ پاکستان ءِ بگیری ءَ کینگ ءُ سِلاہ جست کنت ءُ ھمے دُژمن ءِ کینگ راجاں راجدوست ءُ دیم پہ آجوئی ءِ نیمگ ءَ بارت۔

بلوچ راجی آجوئی ءِ جُنز ءَ ھم چو بنگالی راج ءِ وڑ ءَ لس بلوچ راجدوست دیم ءَ برگ ءَ اَنت۔ اگاں بنگالی راجی آجوئی ءَ مُکتی بانی اَت گُڑا اد ءَ بلوچستان ءِ راجی آجوئی ءَ ھم بلوچ سرمچار دیم ءَ بران اَنت۔ دگری تھنا ھمیش انت کہ بنگالی راج ءِ آجوئی ءَ ھمساھِگ ھندوستان دیم ءَ آتکگ اَت بلے پہ بلوچ راجی آجوئی ءَ ھچ مُلک ھمے داب ءَ تیار نہ انت۔

البت پاکستان ھم ھما 1970 ءِ وڑ ءَ امیریں پاکستان نہ انت، پوج ءُ سیاستدانانی کرپشن، وت ماں وتی سیاسی جیڑہ، ٹی ٹی پی ءُ بلوچ راجی چیرجنگ ءَ پاکستان سک بزگ کُتگ۔ مرچاں پاکستان 138 بلین ڈالر ءِ وامدار اِنت ءُ پاکستان ءِ ایکونومی ھر روچ کپان اِنت، پاکستان ءِ لس مھلوک گُژن ءِ آماچ انت، دُنیا ءِ تہ ءَ پاکستان اولی مُلک انت کہ پوڈ انپلیشن ءِ آماچ انت۔ ایران ءُ اسرائیل جنگ ءِ گُمان، اوگانستان ءِ جاور باریں پاکستان ءَ کُجام نیمگ ءَ بر اَنت ھچ گْوشگ نہ بیت۔

شھزادگ ابدلکریم ءَ بِگر داں بابو نوروز ھان، ھیر بکش مری ءُ داں مرچیگیں جُھد ءَ بلوچ یکشل ءَ پہ وتی راجی آجوئی ءِ جُھد ءَ اِنت۔ چو بنگلہ دیش ءِ وڑ ءَ پاکستان ءِ یکشلیں زُلم ءُ زوراکیاں وت بلوچ راج ءِ تہ ءَ دُژمن ءِ بگیری ءَ زھر ءُ کینگ ودی کُتگ چو کہ راجی آجوئی جھد ءِ بُنکی لوٹ دُژمن ءِ بگیری ءَ کینگ انت۔ چوناھا اے گپ ءَ نجم سیھٹی وڑیں بلاھیں پنجابی زانتکار ھم منّ اَنت کہ بلوچستان چہ پاکستان ءِ دست ءَ شُت۔ واجہ الی اھمد کُرد لاھور ءَ ماں یک دیوانے ءَ گُشتانک دیان ءَ پنجابیاں تچک ءَ گْوش ایت ”ھاک مُشت ءِ تہ ءَ دارگ نہ بنت ھر ھاکے چہ لنککاں درکپان بیت، پنجابی ءِ زُلم ءُ زورانسری ءَ بلوچ ءُ بلوچستان چہ پاکستان ءَ آجو کتگ”

باید انت بلوچ راج ءِ دمگی سروک پہ راجی پائدگ ءَ راجدْروھی ءَ یل بہ دے اَنت، پہ بلوچستان ءِ آجوئی ءَ راج ءَ یکمُشت بہ کن اَنت۔ دومی باید اِنت بلوچ راج وتی راجی زبان براھوئی ءُ بلوچی وانگ ءُ دربرگ ءِ جھد بہ کن اَنت کہ زبان دوستی راجی آجوئی ءِ مستریں بھرے پرچا کہ زبان مارا نزیک کار ایت ءُ بلوچ راج یکجاہ ءُ یکمُشت کنت۔ بلوچ زِندگ بات ءُ بلوچستان آجو بات۔ شالا انچوش بات۔