نبشتہ کار: سنگت دودا بلوچ
گپ وَ سک باز انت کہ من شهید بلاچ جان ءِ بابت ءَ بکن اَن ءُ کسہ بیار آں۔ ما دو سال ءَ یکجاہ بوتگ ایں، نوک سر جھد ءِ تہ ءَ من ھوار کپت آں۔ من گوں سنگت ءَ هال ءُ اهوال کت کہ من ءَ دست ءَ بگر، گڑا سنگت ءَ من ءَ یک روچے ءَ اِے ڈس ءُ نشان دات کہ تو پلان جاہ ءَ بیا ءُ ما ترا دست گر ایں۔ پد ءَ من ھواری ءَ شُت ایں۔ من دانکہ سما کُت کہ گھیڑ ءِ پُشت ءَ یک مردمے دَر ءَ بوت کہ بالاد ءَ پَٹک اَت بلے چوں تپُنگ ءُ جباھ ءُ شوک چمے اَت۔
آَ منی گور ءَ آتک، سلام ءُ دْروت ئِے دات۔ بزانکہ پٹک بلادیں بچک ھدایت پنام بالاچ اِنت کہ منی گوں آئی ءَ اولی دیدار بوت۔ پد ءَ ما دیم ءَ جنزان کُت، اوتاک ءِ نیمگ ءَ شُت ایں کہ اود گوں کُلیں سنگتاں سلام ءُ دْروت بوت۔ پد ءَ گپ ءُ رپ ءَ همے وڑ ءَ روچ جنزان بوت۔
سال 2020 اَت، گُڑا پد ءَ ما مستریں کیمپ ءَ شت ایں کہ مارا اود ءَ ٹرین کنگ بیت۔ مئے ٹرین کنوک کماندار بالاچ اَ۔ نوکیں سنگت ما 5 اِت ایں، بلے مارا کیمپ ءَ سر بوگ ءَ کساس هپت روچ سپر کنگی اَت کہ سک دُور اِت۔ پد ءَ موسم ھم سک جمبری اَت بلے ما توکل کُت دانکہ ھمے وڑ ءَ ما وتی منزل ءَ سر بوت ایں پد ءَ مارا ٹرینگ دیگ بوت، کساس دو ماہ ءَ پد بالاچ ءُ اَدگہ سنگت دیم پہ سپر ءَ شُت ایں۔ چہ بالاچ ءِ روگ ءَ پد مارا هال دیگ بوت کہ دو سنگت انوں درکار اِنت گڑا من ءُ یک کوھنیں سنگتے آ جاہ شُت ایں کہ اود ءَ لهتیں کار ھست اِت اَنت۔ ما ھمے کار ھلاس کت ءُ پد ءَ من ءُ بالاچ یکجاہ بوت ایں۔ همے وڑ ءَ پند بُران کت۔ هلک، کوہ ءُ کوچگَ ءَ جنزان بوت ایں۔
وھدیکہ من ءُ بالاچ ھمے سپر ءَ یکجاہ بوتگ ایں پد ءَ زانگ بوت کہ بالاچ یک مھروانیں، ناتُرس ءُ راجدوستیں سنگتے اَت۔ آئی ءَ چہ وت ءَ گیش منی هیال ئِے پِر اَت۔ انچوش کہ یک توکلیں سپاھی یے اَت کہ چہ وت ءَ گیش وتی ھمراھانی پھازداری ءَ کنت ھمے وڑ ءَ گام گام ءِ سر ءَ آئی ءَ چہ وت ءَ گیش منی پھازداری کُت۔ بالاچ پہ جھد ءِ ھاتر ءَ بےسکون ءُ بے آرام اَت پمیشکا پہ شپ ءُ روچ پند ئِے بُر اِت ءُ گْوشت کہ واب ءُ آرام ءَ نوں راج ءَ بس اِنت مارا نوں شپ ءُ روچ یکشلّ ءَ گوں دژمن ءَ جنگ کنگ لوٹ ایت، اے سپر ءِ تہ ءَ تکلیپی ءُ جنجالی سک باز اِت اَنت، بلے بالاچ ءِ جپاکشی ءِ دیم ءَ اِے جنجالی ءُ تکلیپی ءَ ھچ مانا نیست اَت۔
گڑا بالاچ ءَ واکی ٹاکی ءِ سر ءَ گوں سنگت ءَ هال کُت کہ ترا تئی جند ءِ هلک ءُ شادیکور نیٹورک ءَ روّگ لوٹ ایت۔ سنگت ءِ کلوہ ءِ پد ءَ بالاچ ءَ سُھب کُت ءُ وتی سامان یکجاہ کت اَنت۔ گوں آدگہ سنگت ءَ سپر ءَ در کپت، همے وڑ ءَ پَد ءَ منی ءُ بالاچ جان ءِ هال نہ بوت۔
لھتیں روچاں پَد من نیٹورک ءَ آتک آں، داں گونکو پچ کُت ءُ منی سر ءَ یک مسیجے آتکگ اَت کہ هدایت اللہ پنام بلاچ شهید بوتگ۔ منی ھوش ءُ سَسّا گار بوت اَنت۔ گڑا من وت گوں شھید ھاسل پنام دودا ءَ هال کُت کہ ھال انت زاناں بالاچ پُل شهید کنگ بوتگ؟
گُوشت ئِے ھؤ شادیکور ءَ شھید کنگ بوتگ، بلاچ گوں دگہ یک سنگتے ءَ ھواری ءَ گوزگ ءَ بوتگ اَنت کہ دژمن ءَ راہ بستگ۔ بالاچ ءَ دژمن ءِ دیم ءَ جنگ داتگ ءُ دومی سنگت ءِ درکناینگ ءَ سوب مند بوتگ ءُ داں وتی ُگڈی تیراں گوں دژمن ءَ جنگ برجاہ داشتگ ءُ شھیدی وتی نام ءَ کتگ ءُ پہ راجدپترءَ مدامی نمیران بوت۔
بلاچ نمیران انت ءُ بلاچ سلاه بند انت۔
