نمدی یے پہ اُستاد نئیم مومن ءَ

نبشتہ کار: ناسر واھگ

سلام ءُ دْروت اُستاد نئیم مومن، اُمیت کن آں کہ تو جوڑ ءُ وش بَہ ئے ءُ پاکیں ھاوند ترا مُدام وش ءُ سلامت بہ کنت۔

اُستاد نئیم مومن، تو ھر وھدے من ءَ گْوشتگ کہ شما پرچا وتی زُبان ءَ نہ وان اِت؟ من ھمے پِسو داتگ “من وان آن ءُ دیم راج ءَ ھم وانین آں۔”

پد ءَ یکروچے اُستاد مومن جان ءَ من ءَ  گْوشت کہ من چوناھا وتی شھدربرجاہ( University) دزگٹ آں  بلے شما لوٹ اِت ما وتی زُبان بہ زان ایں گُڑا من شمارا شمبے ءُ یکشمبے ءَ  بلوچی وانین آں۔

گُڑا من اُستاد مومن ءَ گْوشت شر اِنت، مارا بلوچی بہ وانین۔ چہ ھمے روچ ءَ پد مئے زُبان ءِ وانگ بندات بوت گُڑا کم کم ما وتی زُبان زانگ ءَ  اِت اِیں۔ اگاں مروچی ما چار لبز زان ایں گُڑا اِے اُستاد نئیم مومن ءِ نام ءِ برکت اِنت پرچا کہ ما پیسر ءَ ھچ نہ زانتگ کہ  مارا زُبانے ھم ھست! ھمے وڑ ءَ اُستاد ءَ مارا زُبان ءِ وانگ ءَ سوج دیگ ءَ اَت۔ اُستاد ءِ وتی شھدبررجاہ ءِ وانگ سرجم بوت گُڑا ما پد ءَ اُستاد ءَ ￴گْوشت کہ نوں مارا ھمک بلوچی روچ ءَ بہ وانین۔ گُڑا اُستاد ءَ مارا ھمُک روچ وتی زُبان ءِ وانینگ بندت کت، ھمے وڑ ءَ ما کُلیں سنگتاں جُنزان بوت ایں ءُ مئے زُبان دیم ءَ جُنزان بوت۔ اُستاد مومن باز جیڑگ ءَ اَت کہ مئے کسانیں پدریچ وتی زُبان ءَ بہ زانت ءُ بہ وان اِیت  اُستاد ھم پہ راجی زُبان ءِ سر ءَ باز جُھد کُتک۔ بلے ما وت نابود بوتگ اِین ءُ وت شریں وڑے نہ ونتگ بس وتی وھد ءِ پاس کُنگ ءَ شتگ اِیں۔من وتی راج ءِ ورنایاں ھمے گْوشگ لوٹ آں کہ شما انگرزی وانگ ءَ 1500 پکّار (fees) دیگ ءَ ھچ نہ جیڑ اِت بلے انگرزی ءِ وانگ ھراب نہ اِنت۔

البت مارا وتی بلوچی زُبان ھم وانگ لوٹ اِیت پرچا کہ زُبان مئے راجی پجار اِنت، زبان مارا نزیک کار ایت ءُ راج ءِ تہ ءَ یکمُشتی، ھمکوپگی ءُ ھمگامی ودی کنت پمیشکا اے مئے کسانیں بْرات ءُ گْوھارانی سر ءَ راجی ھک  ءُ زمہ واری اِنت کہ وتی زُبان ءَ بہ وان اَنت۔ اگاں ما انگریزی وانگ نہ زان اِیں ھچ نہ بیت بلے اگاں ما وتی زُبان وانگ نہ زانت اے لج ءِ گپے بیت کہ ما وتی جِند ءِ زُبان ءَ نہ زان ایں۔

گُڈسر ءَ من گوں راج ءَ ھمے دزبندی کنگ لوٹ آں توکل بہ کن ات ءُ وتی زُبان ءَ بہ وان اِت، مُدام بلوچی نبشتہ بہ کن اِت بل اِت رَدی بیت پرچا کہ مارا چہ وتی رَدیاں دربرگ لوٹ ایت۔ بلوچی دَرونت، بلوچی بُنرھبندی نکان(مواد)  ءُ ￶راجدوستی نبشتانکاں دلگوش بہ کن اِت۔ باید اِنت ما اِے راجی زبان ءِ جھد ءَ وت ءَ گوں پھر ءُ ناز ءَ بلوچی زبان ءِ جُھدکار پھم ایں کہ بلوچی وانگ ءُ دربرگ ءِ جُھد ءَ ￴دلپْروش مہ بَہ ایں گُڑا بلوچی زبان پہ شُما آسان بیت ءُ ￶ما وتی راجی زبان ءَ زیت دربر ایں۔

من تئی نابودیں نودربر ناسر واھگ آں۔

شالا بلوچی دیمروی بکنات، راج ءِ تہ ءَ بلوچی وانگ ءُ نبشتہ کنگ البار بہ بات۔ شالا بلوچ راج زبان دوست ءُ راجدوست بات۔