ندکار: اَلی جما زامرانی
راج چہ زانت ءُ مارشت ءَ دیم ءَ روت ءُ روان کنت ءُ وتی منزل ءَ سر بیت اگاں راجے ءِ سر ءَ گرانیں وھدے کیت گُڑا ھما راج ءِ زانتکار ءُ کواسیں مردم اَنت وتی راج ءَ چہ آ گرانیں وھد ءَ رکینگ ءِ جھد ءَ کن اَنت۔ آ زانتکار ءُ کواس کے اَنت؟ ءُ چونین اَنت؟ آزانتکار ءُ کواس راج ءِ ادیب ءُ شائر ءُ داکتر ءُ اُستاد ءُ نیکمرد( مُلا ءُ آالم )اَنت۔
او بلوچ راج انوگیں وھد ءَ راج ءِ گموار بانکیں گْوھار ڈاکٹر مھرنگ ءُ بانک سیمی دین ءُ واجہ مولانا شاجی ءُ آیانی ھمراہ انت۔ راجدپتر گواہ اِنت کہ ھما راج دیم ءَ شُتگ اَنت کہ آیاں وتی زانتکار، کواس ءُ ندکار، اَدیب، شائر، ڈاکٹر ءُ نیکراہ ءِ نیکمردانی اِزت کُرتگ ءُ چہ آیانی زانت ءَ بھر اِش زُرتگ ءُ دنیا ءِ چست ءُ ایرءُ پیچ ءُ تاباں سرپد بوتگ اَنت ءُ آیانی ھمراہ بوتگ انت ءُ وتی منزل ءَ سر بوتگ انت،
ھمے پیم ما بلوچ راج انونیگیں وھد ءَ وتی راج ءِ اِے بلاہ ءُ مزَنیں ھستیانیانی ھمراہ بِہ بَہ ایں، من گوں بلوچ راج ءَ دزبندی کن آں کہ وتی راج ءِ راج ءِ سیاسی، نیکراھی، اَدبی رَھشونان ءُ زانتکاراں چو وتی چماں دوست بہ دار ات پرچا کہ زرُمب ءُ تَھاریں زِند ءِ ڈَل ءُ ڈوک ءُ گَر ءُ گَٹّیں راھانی گیش ءُ گیوار کنوک ءُ چہ نہ گیگی ءُ ناچگیاں جانچُٹی دیوک ھمے رھشون اَنت.
اَگاں بَلاھیں گَلَگے مردُم شاگ ءُ بوجی ءَ سوار بہ بَنت ءُ چہ آ گلگ ءِ مردُماں ھچ کس اُوژناگ ءَ بََلَد مہ بیت گُڑا بیت کنت کہ آ وت وتی بوجیگ ءِ ناھُدا ءَ بد بہ گوش اَنت ءُ بہ جَن اَنت ءُ چہ وت آرا دل رنج بہ کن اَنت؟ و مہ بیت کہ مئے اے رھشون چہ ما دلرنج بہ بنت بلکیں ما آیانی ھمک گپانی منوک بہ بَہ ایں تاں آ مارا اے زوراکیں دھر ءِ زوراکیاں بہ رکین انت ما چہ آیانی زانت ءُ بھادری ءَ وتی منزل سر بہ بَہ ایں۔
راج ءِ راجی، سیاسی، ادبی ءُ نیکراھی رَھشون چو ھما شاگ ءِ سواریں گلگ ماں ھترناک ءُ جُھلیں زر ءِ سواریں مردُمانی ناھُدا ءِ داب ءَ اَنت. اگاں ناھُدا ءُ ویلے بہ گرایت شاگ ءَ سواریں مردُم گوں شاگ ءَ زِر ءَ بُڈّ اَنت ءُ گرک بنت۔ ھمے داب ءَ اگاں راج ءِ راجی سیاسی ءُ اَدبی ءُ نیکراھی ءُ آے دگہ تک ءُ پھناتانی زانتکاریں رَھشوناں راج ءَ گوں راجی اَڑ ءُ جنجالاں یلہ بہ کن اَنت راج ھم ھمے داب ءَ ناتُپاکی ءُ وت ماں وتی جیڑھانی آماچ بیت ءُ راجی دود ءُ رُبیدگ ءُ شھدیں زُبان ءُ آے دگہ توامیں ھستیاں گار ءُ یاں کمزور ءُ ناتوان بیت.
گُڑا ایشی ءِ بزانت ءُ متلب ایش انت کہ راج ءِ زانتکار، کواس، ادیب، شائر ءُ ندکار ءُ نیکمرد راج ءَ چہ ھرچ رد ءُ بلاہ ءَ رکّینگ ءِ سَوَب ءُ نیمون اَنت ءُ دوست دارگ ءِ لائک ءُ ھکدار اَنت پہ ھمے ھاتر ءَ باید اِنت کہ مردُم ایشاں چہ وتی جند ءَ ھم گیشتر دوست بہ دار اِیت۔
او بلوچ راج وتی راجی رشون بانکیں گوھار ڈاکٹر مھرنگءَ چو وتی ساہ ءَ دوست بدار ات چی ءَ کہ ھزاراں سال رند بلوچ راج ءَ یک زانتکار ءُ بھادریں رھشون رھدربرے رس اتگ، او بلوچ راج باور کن ات کدم کدم روان بہ بت ءُ بانکیں گْوھار ڈاکٹر مھرنگ ءِ ھمراہ بہ اِت۔
مئے راجی رھشون ڈاکٹر مھرنک بلوچ گوں وتی ھمراھاں زندگ بات۔بلوچ، بلوچی ءُ بلوچستان دیمروی بکنات۔
