نبشتہ کار: مھراج رھیم
سلام ءُ دْروت گُلیں راج امیت انت شما وش ءُ جوڑ اِت۔ گِند ئے مرچیگیں انٹرنٹ ءُ گْوانکو (موبائل) ءِ زمانگ ءَ ھم مئے راجی زبان پرچا دیمری نہ کنگ ءَ اِنت؟ اِے بابت ءَ مارا جیڑگ ءُ پھمگ لوٹ ایت۔راج ءِ تہ ءَ سرپدی ءُ آگاھی بہ بیت کہ مئے زبان چہ دُنیا ءِ دِگہ زُباناں پرچا پشکپگ ءَ اِنت۔ راستی وَ ایش اِنت کہ مئے زبان ءِ دیمروی ھمے واست ءَ نکنت کہ ما وتی زبان ءَ ارزشت نہ دے ایں۔ ما وتی وٹس ایپ ءُ پیبسکی وانگجاھاں مسکرا جاہ پھم این ءُ وتی وھد ءَ زیان کن ایں۔ بازیں باسک دلپروش انت کہ مارا ماں وانگجاھاں بلوچی وانینگ نہ بوتگ پمیشکا انی پہ ما بلوچی وانگ ءُ دربرگ ازبے۔
اے ھبر راست ءُ تچک انت بلے انوئیں انٹرنیٹ ءِ وھد ءَ اے گْوانکو مارا وت وانین انت۔ بلے بژن ءِ ھبر ایش انت مئے کوم انگت واب انت ھچ وانگ ءِ جھد ءَ نکنت۔ مارا ھمے زانگ ءُ منّگ لوٹ ایت کہ گْوانکو پہ من بلوچی کتابے باید اِنت ما پہ یک ھپتگے ءَ وتی گْوانکواں بلوچی کتاب بہ پھم ایں۔ گِند ئے مئے راجہ پہ دگہ راجانی زبان ءِ وانگ ءَ زر دے اَنت ءُ وان انت بلے وتی زبان ءَ پہ مپت ءَ نہ وان انت۔
البت ما پد ءَ ھم دلپْروش نہ ایں، مئے مرچی ئیں جُھدکار زبان ءِ سر ءَ کار ءَ انت ءُ مارا وانینگ ءَ انت بلے ما آیاں ھچ دلگوش نہ کن ایں کہ بلوچی گْران انت بژن اِنت کہ ما سرپد نہ بَہ ایں۔ اے ھبر راست ءُ تچک انت کہ ما بلوچ ایں گڑا پہ بلوچ ءِ بْرات ءُ گْوھاراں بلوچی سک آسان انت۔ تھنا پہ وتی زبان ءِ دربرگ ءَ اینچکیں جُھدے کنگ لوٹ ایت بلے کَس وتی زبان ءِ وانگ ءَ تیار نہ انت۔
مرچیگیں انٹرنیٹ زمانگ انت ءُ ھرچ کوم وتی زبان ءَ وانگ ءَ انت، تھنا پشتکپتگیں ما ایں، دومی ھبر ایش انت کہ ما گوں بلوچاں بلوچی نہ کن ایں گوں دری زبان ءَ گپ کن ایں۔ گڑا اِے وَ زاھر انت مئے زبان ءَ گار ءُ بیگواہ بیت۔ مرچی کہ آ دگہ زباناں دیمروی کتگ ھمے واست ءَ کہ آیاں وتی زبان ونتگ ارزشت داتگ۔ گڑا ما بلوچ ھم باید انت وتی زبان ءَ بہ وانین ءُ ارزشت بہ دے ایں۔ مئے بلوچی چہ آ دگہ زبان ءَ ھچ کمتر نہ انت مئے زبان یک پراہ شاھگانیں زبانے باید انت ما وتی زبان ءِ وانگ ءَ ھُب بہ ایں کہ ما وتی زبان ءَ دربر ایں بلے بژن ایش انت کہ مئے دو برات وٹس ایپی گَلّاں وانگ ءَ کیت دگہ چار پہ وھد ءِ زیان کنگ ءَ کیت اے چارینانی سبب ءَ آ دگہ برات ءُ گْوھارانی وانگ ھم نہ بیت
ما گوں راج ءِ ورناھاں دزبندی کن ایں شما وت بہ وان اِت ءُ وتی راج ءَ ھم بہ وانین اِت پرچا کہ زبان گوں وانینگ ءَ دیمروی کنت انو ما بہ چار ایں اردو یک مادری زبانے نہ انت زور جوڑ کنگ بوتگ ءُ راج ءَ وانینگ بوتگ ھمے اردو ھم چہ مئے پراہ شاھگانیں زبان ءَ دیم ءَ تر اِنت پرچا کہ آیاں ونتگ ءُ وانینتگ ما بلوچ ناں کہ وت وان ایں ناں کہ دگر ءَ وانین ایں اے وڑ ءَ مئے زبان ءَ ھچ وڑ ءَ دیمروی نہ کنت۔ گِند ئے راج ءَ دو تب ءِ مردم تاوان دنت۔ یکے ھمیش انت کہ زانت ءُ ھاموش انت دومی نہ زانت ءُ گپ کنت۔ ما گوں راج ءَ دستبندی کن ایں کہ وت بہ وان ات ءُ دومی ءَ بہ وانین اِت۔ شالا بلوچ راج وت ماں وت یکمُشت، ھمکوپگ ءُ ھمگام بہ بات۔ بلوچ ءُ بلوچی شالا دیمروی بہ کنات۔ سلامت بات اِت،
