نبشتہ کار: اَلی جما زامرانی
چاگرد ءِ تہ ءَ نبشتانکار ءِ مزنیں کردے بوگ لوٹ اِیت ءُ نبشتانکار بہ زانت کہ آ پہ چے ھاتر ءَ نبشتہ کنگ ءَ اِنت؟، آئی ءِ واھگ ءُ مراد چے اِنت؟ ءُ ھرچ نبشتانکارے وتی باتن ءَ جْوانی ءَ سرپد اِنت ءُ وتی ھیال، لیکہ، مارشت ءُ سسّایاں ماراِیت ءُ زانت کنت کہ آئی زانت چنچک ھد ءَ کار کنت ءُ زانتکار ءُ سرپد اِنت۔
باید اِنت نبشتہ کار ءُ ادیب وتی چاگرد ءِ تب ءَ سرپد بہ بنت، بہ زانت ءُ وتی راج ءِ تب ءُ مارشتاں بہ مار اِیت۔ وتی بزگر ءُ لاچار ءِ درداں وتی درد بہ زانت ءُ ھما سِلکاری ءُ بدیں ھیل ءُ آدت کہ چاگرد ءِ تہ ءَ زوراکاں آورتگ اَنت ءُ چاگرد ءِ لس مردماں تاوان دے اَنت آیاں آ بہ زانت ءُ سرپد بیت ءُ شون بہ دنت۔
ھرچ ھما سِلکاری ءُ بدیں جاور کہ راج ءِ تہ ءَ یا راجکاری ءِ تہ ءَ تاوان اَنت آ چہ ھمایاں وتی ند ءِ شھار ءَ شون بہ دنت ءُ چاگرد ءِ مردماں سرپد بہ کنت ءُ ھما چیزاں نبشتہ بہ کنت کہ پہ راج ءَ پائدگ اَنت نبشتہ کار اے چیز ءَ ھُجّت بہ زانت بہ مار اِیت کہ آ وتی نوکیں پدریچ ءَ بلوچی ءِ جْوانیں دودءُربیدگ ءِ سُکین ءَ بہ دنت چےءَ کہ سرجمیں جْوانی بلوچی دودءُربیدگ ءِ تہ ءَ ھست اَنت۔ بلوچ نبشتہ کار وت ءَ بلوچ سرپد بہ بنت ءُ بلوچ راج ءِ درداں بہ ماراَنت۔ وتی وتن ءِ درداں بہ ماراَنت وتی وتن ءِ بارو ءَ راج ءَ سرپد بہ کن اَنت۔ براتی، راج دوستی ءُ راستی ءِ درونت ءَ وتی راج ءَ بہ دے اَنت زوراکانی زوراکی ءَ راج ءِ دیم ءَ بیار اَنت۔
ھما راجکاری مردمے کہ بلوچ چاگرد ءُ بلوچیت ءِ تہ ءَ درآتکگ اَنت ءُ زوراکانی رند ءَ کپتگ اَنت ءُ بلوچ چاگرد ءُ راج ءَ پہ وتی آسراتی ءَ تاوان دیگ ءَ اَنت آیانی مکاریاں راج ءُ چاگردءِ دیم ءَ بیار اَنت ءُ سرپد بہ کن اَنت تانکہ چوشیں بدکردیں راجکاری مردماں مردم وت ءَ بہ پھریز اَنت ءُ وت ءَ دور بدار اَنت ھما راج دوست ءُ راج دوستیں راجکاری سروکانی ھمراہ بہ بنت کہ آ پہ راج ءِ باندات ءِ پگر ءَ اِنت ءُ وتی وت واجھی دوست بیت دومی نبشتہ کار گوں وتی جند، گوں وتی راج ءُ گوں وتی وتن ءَ ایماندار بہ بیت۔
لبزانک ءُ ادب ءَ سرپد بہ بیت ءُ دنیا ءِ چست ءُ ایراں سرپد بہ بیت ءُ مُدام راست ءَ چاگرد ءِ دیم ءَ بیار اِیت ءُ نبشتہ بہ کنت ءُ چار کلدار ءَ زوراکانی دست ءَ بھا مہ بیت۔
چہ ایشی ءَ ھوار نبشتہ کار ءِ مستریں زمہ واری ءُ کِرد ھمے بیت کہ چہ آئی ءِ نبشتانک ءِ وانگ ءَ وانوک ءَ تاھیر بہ رس ایت۔ آئی نبشتانک ءِ تہ ءَ بُنرھبندی رَدی مہ بنت پرچا کہ رَد ءُ بے رھبندی نبشتانکاں کَس نہ وان ایت، رَدیں نبشتانک وانوکاں تکانسری دے اَنت پمیشکا باید اِنت یک نبشتہ کارے بہ زانت کہ نبشتہ چے یے ءُ نبشتہ ءِ چُنت کاریچ اَنت؟ گُڑا اگاں ما بلوچی زبان ءِ نبشتہ کار بوگ لوٹ ایں گُڑا باید اِنت ما چہ دْرستاں پیسر بلوچی درونتاں وان این ءُ پد ءَ بزان ایں کہ نبشتہ چے یے ءُ نبشتہ ءِ چُنت کاریچ اَنت؟ اِے بابت ءَ بے تُرس بَہ ایں ءُ چہ وتی بلوچی زبان ءِ جُھدکاریں اُستاداں جُست بہ کن ایں کہ نبشتہ چے یے؟
بلوچ راج شالا وت ماں وت تپاک، یکمُشت ءُ ھمگام بات ءُ بلوچی شالا دیمروی بہ کنات۔
