بلوچ یکجھتی کمیٹی ءُ بلوچ ءِ باندات

نبشتہ کار: میجر مجید

شَائرے گْوش اِیت کہ:

مئے سر ءَ میریں جلال ھان، چِل ءُ چار بولکیں

ھاکتوں “ھارین ءِ بندر” کیچ ءِ راستیں پلّویں

ھوت مکران ءَ نند اِیت، کوسگ ماں کیچ ءِ دِھیں

ھوت کورائی ھوار اِنت، اے ماں لاشار ءِ گڑیں

دْریشک ھوت مزاری، اے گوں رند ءَ یکسریں

رِند لاشاری ماں ملک ءَ، سیمّ گوں نیامگیں

مستریں لوگ ڈومبکی اِنت، گاج سْیاہ آپ ءَ سریں

اژ حلب چانڈیگاں، کلمتی لوگ پہ گْوریں

نوح نند اِیت ماں نلی ءَ، جَستکانی پہ گْوریں

پُژ میر عالی جتوئی، درست ماں سیوی ڈاڈریں

اژ بنیاد ءَ پُژ رِند اِنت، سر گوں میریں چاکریں

گولو، گوپانگ، دَشتی، رِند تالی ءَ دریں

نَشک دور پہ گور گیژاں، اے ماں تلّی ءَ دِھیں

تئی بلوچ باز بشاریں، درست ماں رِند ءَ مانئیں

رِنداں ماں شوران نند اِیت، لاشار ماں گنداوگیں

جو میتاپ بھر کنان ءَ، کُل سردار شیھکیں

اے منی پیرا ءُ رَندیں، اے بلوچ ءَ دپتریں

پیلوئیں سی سال جنگ ءَ، اے بلوچ ءَ شِدّتیں

شیھک ءُ شھداد رَند ءَ، لس سردار چاکریں.

(لانگ ڈیمز ورتھ ءِ کتاب پاپولر پوئٹری آُپ دی بلوچ۔۔۔ LONGWORTH DAMES)

بلوچ ءِ راجدپتر ءَ دو دَور وشیں گْوستگ، یکے میر جلال ھان ءِ دَور کہ میر جلال ھان ءَ چِل ءُ چار بلوچ ٹَک ءُ بولک تپاک ءُ ھمدست کتگ بزانکہ بلوچ ءِ ٹرائیبل کنپیوڈریشن جوڑ کتگ ءُ گوں اے درگت ءَ ھمے ٹک ءُ بولکانی ھمراھی ءَ بلوچ گلزمین ءُ گلزمین ءِ سیمسر پراہ ءُ شاھگان کتگ اَنت ءُ دریں راجانی دیم ءَ ھمے چِل ءُ چاریں ٹَک ءُ بولک گوں سگاراں مِک بوتگ اَنت ءُ وتی گلزمین اِش پھاز اِتگ، اے دَور ءَ بلوچ ءِ کومی پجّار، بلوچ ءِ جغرافیا بزاں بلوچ ءِ سیمسر، بلوچ ءِ رواج ءُ کارءُبار ءُ چاگردی دیمروی بوتگ ءُ بلوچ ءَ یک مھکمیں کومے جوڑ کنگ بوتگ۔

ءُ دومی وشیں دَور میر چاکر اعظم ءِ دَور بوتگ، میر چاکر ءَ ھم بلوچ ٹَک ءُ بولک چِتگ ءُ کماتگ ءُ یکدست ءُ تپاک کتگ اَنت، اد ءَ شائر گْوش اِیت کہ:

چِل ھزار رِند ءُ دہ ھزار راپچی

سی ھزار نوھانی مزن زھمیں

پنجاہ ھزار لاشاری بلند شانیں

چاکر ءِ بے راھیں سر ءَ گون اَنت

چاکر ءُ گْوھرام ءَ ھم بلوچ ءِ سیمسر داں سِندھ ءُ پنجاپ ءَ بُرتگ ءُ سر کتگ، دِھلی ءِ جنگ ءَ ھم تپاک ءُ یکجاہ بوتگ اَنت ءُ سوب اِش کتگ۔ بلوچستان ءُ میان استمانی ملکاں زانگ ءُ پجار بوتگ۔

اد ءَ شائر گْوش اِیت کہ:

اِمبری لانگواں گْوشوکیناں

کچّی ءِ ورنایاں مِڑوکیناں

آلم ءُ ملایاں پڑوکیناں

زھم جنیں گازیاں گڑوکیناں

اپسوز پہ راجاں ھمتپاکیناں

زیادھیں زورانی گلام باتاں

کہ بادشاھاں پہ ڈمبگ ءَ زیر اَنت۔

اد ءَ شائر بلوچ ءِ تاکت، ھکمت آملی ، تپاکی ءُ یکدستی ءَ ایڈول ءَ درشان کنت۔ اے دَور ءَ ھم بلوچ ءِ کارءُ￶بار ءُ رواج ءَ ردوم زرتگ۔

نی من وتی سرھال ءَ کایاں،

مروچیگیں سرھال اِنت:

بی وائی سی ءُ بلوچ ءِ باندات

بی وائی سی مروچی ھما وتی تاریخی رندپداں روان اِنت، اے واست ءَ ￴من لھتے تاریخی دروَر دات۔

بنپور گوں دراں گنجیناں

مرد گوں مرکباں سنجیناں

زال گوں زیوراں ھنجیناں

ورنایاں سلاہ سنجیناں

مروچی بی وائی سی ھم ھما جھد ءَ کنگ ءَ اِنت کہ 700 سال ءَ پیسر میر جلال ھان ءَ کتگ یاکہ 600 سال ءَ پیسر میر چاکر اعظم ءُ گوھرام لاشاری ءَ کتگ۔ تاریخ، راجدپتر ھرچ وھد ءَ وت ءَ کْوھن ءُ نوک کنت، مروچی ھم گْوستانک وت ءَ کْوھن ءُ نوک کنگ ءَ اِنت، بی وائی سی ھم کلیں بلوچ ٹَک ءُ بولکاں تپاک ءُ یکجاہ کنگ ءِ جھد ءَ دزگلائیش اِنت، برے گوادر ءَ مُچّی کنت، برے دالبندن ءَ، برے شالکوٹ ءُ کیچ ءَ، ءُ برے اسلام آباد ءَ. ءُ ما ءُ شما گندگ ءَ ایں کہ ھمُک مُچّی چہ دومی مچی ءَ گیشتر سوبمَند اِنت بزانکہ راج ءَ بی وائی سی ءِ توار ءِ پد ءَ لبیک کتگ ءُ داکتر مھرنگ ھم ھمے گْوش اِیت کہ یکبرے تپاک بہ بہ اِت۔ تپاکی ءَ پد گڑا ما وتی کِشک ءَ گچین کنیں، مروچی بلوچ راج سردار، نواب ءُ اوٹ پِنڈیں پاٹیانی ھمراہ نہ اِنت، بکشو ءِ دلار ءُ ربالانی ھَمراہ نہ اِنت، بی وائی ءِ سی ءِ ھمراہ اِنت۔ اے وت یک مزنیں انکلابی بدلی یے۔ ھدا بکنت کہ اے جنز دیمروی بکنت۔

تپاکی آجوئی ءِ مانزمان اِنت

بلوچستان آجو بات۔