ماھتاک اسپر ءِ سیمی تاک
نبشتہ کار: ڈاکٹر اللہ نزر
رجانکار: سرباز وپا
جھان ءَ داں انوں چوشیں سرجمیں انسان ودی نہ بوتگ کہ آ شری ءُ ھرابیانی گندگ ءَ پد زانتکاریں مردمے کسے ءَ شر یا ھراب بہ گْوش اِیت۔ گْوشگ ءِ مول ھمیش اِنت کہ ما راج ءِ بستار ءَ بلوچ چاگرد ءُ اِد ءَ زند گوازینوکیں راج ایشی ءِ میار بار نہ اِیں۔ منی راج ءِ تہ ءَ جتائیں تب ءُ کرد ءِ مردم ھست۔
بلوچ راج گوں چونیں جاوراں دیم پہ دیم اِنت اے میان ءَ دو زوراک وت ماں وت یکے دومی ءِ بگیری ءَ کار کنگ ءَ اَنت۔ بزاں یک نیمگے ءَ چہ پنجاپی زورگر ءَ پہ آجوئی ءَ مڑوک ءُ چہ نوک آبادکاری ءَ آجوئی لوٹوک اَنت، دومی نیمگ ءَ زورگریں پنجاپ ءِ نوک آبادکاریں نِزام ءِ تہ ءَ زند گْوازینوکیں مردم اَنت۔ گُڈّی ءَ ھما ٹولی کہ آ ریاست ءِ اے درسیں بھرگانی پلہ مرزی ءَ کن اَنت ءُ آئی پلہ مرزی ءِ جاہ ءَ وتی روزگار ءِ گیش کنگ ( بزاں جنگی لب واری) ءِ واھگدار ءُ پاکستانی پارلیمنٹ ءِ اولی لڑ ءَ ھوار ءُ نشتگ اَنت کہ بلوچ ءِ مڈّیانی لُٹّ ءُ پُل ءَ کنگ ءُ پہ وتی واجھانی وش کنگ ءَ نہ تیوک ءَ بے چاڑ اَِنت بلکیں چہ پنجاپیاں گیش پنجاپ ءِ وپادار اَنت۔
اے بلوچ پاکستان ءِ پارلیمنٹ ءَ نشتگ ءُ پہ آجوئی لوٹوکانی کُشّگ ءَ تیوک ءَ کانود جوڑ کنگ ءَ نہ اَنت بلکیں ھمے کودکیں بلوچاں آزار جاھاں بند کنگ ءُ زندگ ءَ کبر کنگ ءَ اَنت۔ اے پارلیمنٹ ءِ جوڑ کرتگیں کانود ءَ سرکار ءُ لشکر پہ وت ءَ نیمون جوڑ کنگ ءُ آجوئی لوٹوکیں بلوچانی بگیری ءَ کارگرگ ءَ اَنت۔ ریاست ءِ سیمی پدیانک آمیدگس اِنت ایشی ءَ سرجمیں جھان گندگ ءَ اِنت کہ پاکستانی آمیدگس ءُ آمیدگس ءِ نزام لشکر ءِ چیردست اَنت۔ ما اے گپ ءَ تچک ءَ گْوشت کن اِیں کہ اسمبلی ھمے ھونوار ءُ ناشریں کانودانی سر چمّگ اِنت آئی سرکار، لشکر ءُ آمیدگس کارمرز کنگ ءَ اَنت ءُ بلوچ پارلیمنٹ ءِ نندوک ھمے بلوچ کُشیں کانود ءِ جوڑ کنگ ءَ یک وڑ ءَ شریدار اَنت۔
دومی نیمگ ءَ آجوئی لوٹوکیں گل کار ءَ اَنت ءُ بلوچ ورنا پہ اے سرڈگار ءِ آجوئی ءَ مِڑگ ءَ اَنت ایشی نام بلوچستان اِنت۔ ھزارانی کچ ءَ مردم ریاستی ادارھانی دست ءَ بیگواہ ءُ درزنانی کچ ءَ ریاستی ادارھانی دست ءَ بیگواہ بوَگ ءَ اَنت۔ گپ ھمیش اِنت کہ آجوئی لوٹوکیں گل چہ ریاست ءَ گستا اَنت ءُ آیانی کرد چہ زورگر ءِ چانوگراں جتا اِنت ءُ جتا بوَگ ھم لوٹ اِیت۔ ھما مردم کہ زورگریں پاکستان ءِ بگیری ءُ پہ بلوچستان ءِ آجوئی ءَ مِڑگ ءَ اَنت چاگرد ءِ تہ ءَ آیانی یک جتائیں بستارے کہ آیاں وتی درست پہ آجوئی ءَ ببا داتگ۔ آجوئی لوٹوک ءُ زورگریں پنجاپ ءِ پلہ مرزانی میان ءَ اے بنیادی پرک ءُ اے دْرچ چہ دو دْھکاں برجاہ اِنت۔ بلکیں اے آجوئی ءِ جنگ جھان ءِ دْراجکشیں جنگاں شمار بہ بیت۔
من ءَ یات اِنت کہ دو ھزار پنچ ءَ آئی ایس آئی رسانکدر ءَ بلوچ سرمچارانی بابت ءَ پندل سازی کنگ ءَ اَت کہ اے ورنا چاکلیٹ گوریلا ءُ زوت دمبر اَنت، بلے آجوئی لوٹوکاں دورچاری ءُ یکشلیں آجوئی ءِ جنگ برجاہ داشتگ ءُ نہ تھنا ریاست اِش باز مالی تاوان داتگ بلکیں ریاست ءِ بنیاد اِش جکسینتگ ءُ میان استمانی ادارھاں ھمے دلجمی دیگ ءَ سوبین بوتگ اَنت کہ بلوچستان ءِ آجوئی جنگ یک انچیں ھندی جنگے کہ چہ بلوچ سرڈگار ءَ چست بوتگ۔ زورگریں پنجاپی چہ میان استمانی ادارھاں پنڈگ ءُ وتی وتگڑ ءُ ناشریں ریاست ءَ ھلائینگ ءَ اِنت۔ بلے بلوچ آجوئی زرمبشت کہ پہ جوانیں ریاستے ءَ بوَگ ءَ اِنت ایشی ءَ ھکّ ھست کہ چہ جھان ءَ کُمک بہ لوٹ ایت۔
بلوچ سرمچارانی جنگ ءَ دُژمنیں لشکر، پارلیمنٹ ءُ سول بیوروکریسی انچوش دمبرائینتگ کہ آ مذھبی گالبندانی کُمک ءَ بلوچ آجوئی لوٹوکاں درامد گْوشگ ءَ اَنت کہ دُژمن ءِ سسّائی پْروش ءِ مستریں چیدگ اِنت۔ بلوچ راجدْروہ بزاں دُژمن ءِ دوست ءُ نپّ دوستاں ھم ھمائی زُبان ءَ گپّ کنگ بندات کُرتگ، بلے زورگر ھرچی توانمند بہ بیت پروش وارت۔ روس ءِ زار، ھٹلر ءِ نازی ازم بہ بیت یا تاج برتانیہ ءِ بادشاہ کہ روچ ھچبر برکت نہ بیتگ نوں کْوھنیں کسہ جوڑ بوتگ اَنت۔ بلوچ راج ءِ جنگی پِڑ بہ بیت کہ یا میان استمانی دژمن ءَ چہ نزیک ءَ چارگ ءَ اَنت ءُ آئی ءِ ھرچ پندل بےسوب کُتگ۔جھان ءِ گْوستانک ءَ بہ چارے لھتیں دوست رنگیں دژمن ھرچ زْرمبشت ءَ بیتگ۔
من چہ وتی راج ءِ دانشوراں ھمے لوٹاں کہ آ وتی راجی جنگ ءِ رھشّونی ءَ بہ کن اَنت، چی ءَ کہ بلوچ سرمچار یک ناگیگیں جنگے کنگ ءَ اَنت ءُ آجوئی جنگ نوں گیش ناگیگ بیان اِنت۔ ایشی تہ ءَ آجوئی لوٹوکاں وتی گام نرم نرم ءَ ایر کنگی اَنت ءُ پہ ھم سنتی ءَ باز جُھد کنگ لوٹ اِیت۔ آجوئی جنگ ءِ لوٹ بہ بیت یا سپارتکاری بہ بیت چہ دانشور ءُ زانوگراں ھمے اوست اِنت کہ آ پہ وتی سرڈگار ءُ میان استمانی جاورانی بابت ءَ آجوئی لوٹوکانی سروکی ءَ بہ کن اَنت۔ ھما بلوچ کہ دْرانڈیھ اَنت آ وتی راج ءِ سپیر اَنت، آیانی سر ءَ پرز اِنت کہ آ ھمک جاہ ءَ وتی راجی آجوئی ءِ راستی ءُ زورگر ءِ زوراکیاں دیم ءَ بیار اَنت۔
