اولی بَھر
نبشتہ کار:نودان بلوچ
بلوچستان ءِ زمین چہ ھرچ وڑیں کُدرَتی مڈیاں سَریچ اِنت کہ آ توری دھاتی مڈی بہ بنت یا توری زمین ءِ جھلی مڈی بہ بنت۔ ھر وڑیں مڈی بلوچستان ھَست اَنت ءُ درآیگ ءَ اَنت۔
اِے کُلیں مڈیانی واھند بلوچ اِنت بلے اِیشاں پاکستان کَشگّ ءُ بَرگ ءَ اِنت۔ بلوچستان ءِ مھلوک ءَ چہ وتی زمین ءِ مڈیاں ھچ رسگ ءَ نہ اِنت بژنیگیں گپّ اِیش اِنت کہ بیست ءُ یکُمی کِرن ءِ تَہ ءَ بلوچ انگت پہ چُنڈے نگن ءَ چمّدار اِنت ءُ لاچاریں زندے ءِ گوازینگ ءَ بے وس اِنت۔ بلوچ کوم ءِ بزگی ءُ لاچاری ءِ مستریں سبب ھمیش اِنت کہ آ گُلام اِنت ءُ آئی ءِ زمین پاکستان ءَ پہ زور ءَ گیپت ءُ بلوچ کوم اِیردست کُتگ ءُ چہ زندگ بوگ ءِ دراھیں آسراتیاں بےبھر ءُ زبھر کُرتگ ئِے۔
راستی وَ ایش اِنت کہ ریاستِ پاکستان ءَ کدی نہ لوٹ اِتگ ءُ ناں کہ لوٹ اِیت ھم کہ بلوچ کوم وشھال بہ بیت ءُ پُرایمنیں زندے بہ گوازین اِیت۔ پاکستان ءَ بلوچستان ءِ مھلوک ءِ پکار نہ اِنت بلکیں بلوچستان ءِ مڈیانی پَکار اِنت ئِے۔ پاکستان ءَ ھوار بازیں ملکے ءِ چم بلوچستان ءِ مڈیاں سَک اَنت۔
بلوچستان ءِ مڈیانی بابت ءَ پاکستان ءِ پولکار ءُ زانوگرانی گوشگ اِنت کہ بلوچستان ءَ کساس 500 کِسم ءِ زیر زمینی مڈی درآیگ ءَ اَنت بلے ڈاکٹر پاروک بلوچ ءَ وتی کتاب “بلوچ اور ان کا وطن” ءِ توک ءَ گْوش اِیت کہ بلوچستان ءَ کِساس ءِ 510 کِسم ءِ زیر زمین مڈی ھَست اَنت بلے اِیشانی پائدگ ءَ پہ بلوچ ءَ نہ اَنت۔ چہ اِے گپّ ءَ زانگ بیت کہ پاکستان ءِ پولکار مڈیانی کُلیں کَچ ءَ زاھر کنگ ءَ نہ اَنت۔
نو من وتی بُنگپّ ءِ سر ءَ، بزانکہ بلوچستان ءِ مڈیانی نیمگ ءَ کا آں کہ ھرچی کہ من ءَ نبشتھی دروشم ءَ دست کپتگ اَنت آ کُجام ءُ کُجام مڈی اَنت ءُ بلوچستان ءَ کجام جاہ ءَ در آیگ ءَ اَنت ءُ چوں کارمرد بوگ ءَ اَنت، ایشی ءَ ھوار اِیشانی ارزشت چی اِنت؟
ایلومینیم ءِ مزنیں مُچیں جاہ:(Reserves) زیارت ءُ کلات ءَ ھَست اَنت۔ اِیشی ءَ باکسائٹ(Bauxite) ءُ لیٹرائٹ(Laterite) گْوش اَنت۔
کرومائٹ: کرومائٹ مسلم باگ، ھُزدار ءُ لسبیلہ ءِ ھَند ءُ دَمگاں دست کپ اَنت بلے ایشی ءِ مُچیں جاہ بند اِنت۔
تانب: تانبا ءِ مزنیں مُچیں جاہ چاگی ءَ اِنت کہ ھود ءَ سیندک ءُ ریکوڈک ھم مزنیں مُچیں جاہ اِنت کہ پنچ ملیں ٹن یاکہ گیش ما گُشت کن ایں کہ اِد ءَ دری ملکانی کار ءُ باری کمپنیانی مزنیں پراجیکٹ ھَست اَنت۔
سیسہ ءُ جِست: اِے ھُزدار ءُ لسبیلہ ءِ ھند ءَ ھم ھَست اِنت۔
چاگی کہ ھود ءِ زمین چہ مڈی ءَ سریچ اِنت۔ چاگی ءَ وڑ وڑیں مڈی ھَست ءُ در آیگ ءَ اَنت۔ سیندک ءُ ریکوڈک ءَ چہ چاندی ءَ ابید بازیں چوشیں چیزے ھَست کہ ایشانی تہ ءَ یورینیم ءُ ٹنگسٹن(Tungsten) بزانکہ اِے دوئیں ھم ھوار اَنت کہ بالیگراب، توپ ءُ تپُنگانی واست کارمرد کنگ بنت۔
ٹنگسٹن ءِ سر ءَ بازیں چیزے جوڑ کنگ بیت پہ درور،توپُگ ءِ تیر ءُ پشنگ ”پُشّ” ءُ ٹیلی ویژن ءِ واست ءَ ھم کارمرد بیت دومی چہ ھمیشی ءِ کُمک ءَ ”آسوگیس” ھم جوڑ کنگ بیت ھمے وڑ ءَ یورینیم ھم اَنچیں چیزے کہ چہ آئی ءَ میزال ءُ دگہ مزنیں مواد جوڑ کنگ بنت
پلاٹینم گاڑی ءُ دگہ بازیں چیزے ءِ واست ءَ کارمرد بیت اِے ھم ھُزدار ءُ لسبیلہ ءِ ھند ءَ ھَست اَنت۔ ھمے پیما ٹالی ٹینیم ءُ ذرکن( Titanium & Zircon) رزانانی واست ءَ کارمرد بیت ءُ بالیگُرابانی واست ءَ ءُ راکٹ ءُ میزائلانی مواد ءِ واست ءَ ابید اسکرہ ءُ دگہ بازیں چیزے ءِ واست ءَ ھم کارمرد بیت۔ اِے مکُران ءِ گیشتر ریکیں جاہ ءَ بیت۔
منرلز ایلم چاگی ءُ کوہ سلتان ءِ تپتگیں کوھاں در کیت ءُ اِے رنگ ءِ ءُ چمڑہ ءِ واست ءَ کامرد کنگ ءِ کار ءَ کیت۔
ایس بسٹاس ژوپ ءَ درکیت.
بیرائٹ کوہ سلتان، چاگی، لسبیلہ ءُ ھُزدار ءِ ھند ءَ درکیت۔
فلورائیٹ گیشتر کلات ءُ دالبندین ءِ کشّ ءُ کِر ءِ ھند ءُ دَمگاں مزنین انبارے ھست اِنت
جپسم ہرناھی دَمگ اسپن تنگی ءِ نیمگ ءَ ھَست اِنت۔ چو چونّ ءِ پیمیں سنِگے بلوچستان سَک باز اِنت ءُ اِے سمنٹ ءِ جوڑکنگ ءَ کار دنت ءُ دومی اِے کشارانی واست ءَ ھم شَریں چیزے کہ دھکان وتی کشارانی دے اَنت ئِے۔ اِے بلوچستان گیشتریں دَمگاں ھَست اِنت چو کہ دکی،ب ارکھان، کوئٹہ، ہرنائی، شاہرگ، ھُزدار، کلات ءُ لسبیلہءِ ھند ءُ دمگاں بے ھساب ءَ اِنت۔
ڈولومائٹ کلات ءُ ھُزدار ءِ نیمگ ءَ گیشتر بیت۔ بلوچستان ءِ دراھیں مڈیاں پاکستان کَشّگ ءُ برگ ءَ اَنت، پنجاب ءَ کارجاہ ءُ کارگاھاں دیگ ءَ اِنت کہ ھود ءَ پد ءَ ھمیشانی سر ھما زلورت مندیں چیزاں جوڑ کن اَنت ءُ پد ءَ دیم ءَ سَپلائی کن اَنت اش۔ اَنچو کہ سجاوٹی سنگ اِنت ،ماربل ، نکس(Onyx)، سرپینٹیں(Serpentine)، گرینائٹ (Granite)، بسالٹ (Basalt)، رائیو لائٹ (Rhyolite) ءُ کوارٹزائٹ(Quartzite) اِے دُرست چہ بلوچستان ءَ درایگ ءَ اَنت۔ چاگی ءُ ھُزادر ءُ لسبیلہ ءَ مزنیں کچّے ءَ اِے پیمیں مڈی ھَست اَنت۔
روان اِنت۔۔۔
