نبشتہ کار: جھانزیب اللہ بکش بلوچ
سر ابدلھمید ءِ بیرانی ءَ پد مئے دل چہ گم ءَ گران انت۔ آ ایوک ءَ استادے نہ بوتگ بلکیں آ مئے زند ءِ تہ ءَ رھشونی کنوکیں رژنائی یے بوتگ۔ واجہ یک زُبان دوست ءُ راجدوستیں اُستادے بوتگ۔ آئی ءِ زانت ءُ مھر ءَ ھرکس ءَ وتی دل ءَ جت کہ آئی ءَ زانگ ءِ شرپ رستگ ات۔ سر ابدلھمید ءَ یک انچیں توانائی یے بوتگ کہ آ مارا وتی سرجمیں توانائی ءَ سر بوگ ءِ ھاتر ءَ دلبڈی بہ دنت۔ آئی ءَ مئے ھر یکے ءِ سر ءَ باور کتگ ات، ھما وھد ءَ ھم کہ ما وت ءَ باور کنگ ءِ جھد کتگ ات۔
آئی ءِ درس چہ کلاس روم ءَ دیم ءَ شت انت۔ آئی ءَ مارا ایمانداری، جُھد ءُ دگرانی کُمک کنگ ءِ ھاتر ءَ وانینتگ۔ سر ابدلھمید ءَ یک ھاسیں راہ ءُ درے بوتگ کہ آ وانگ ءَ وش ءُ وشھال کنت، گرانیں سرھال دلکشیں چیلنجاں بدل کنت۔ ما آئی ءِ ھبکّھی، آئی ءِ دلبڈی ءِ گپ ءُ ھما گرمائش ءَ کہ آئی ءَ مئے وانگجاہ ءَ آؤرتگ ات، مدام یات کن ایں۔
سر ابدلھمید ءَ ھم وتی نودربرانی سک باز دلگوش بوتگ۔ مئے جیڑہ ئِے گوش داشتگ ات اَنت ءُُ ھما شور ءُُ سلاہ ئِے داتگ ات کہ مارا شرتر بوتگ ات، واجہ مُدام سرپدی دات کہ وانگ ءُ زانگ ایوک ءَ گریڈانی بابت ءَ نہ اِنت بلکیں یک مردمے ءِ بستار ءَ دیمروئی کنگ ءِ بابت ءَ اِنت۔ آئی ءِ ھمایت مئے واست ءَ سک باز بوتگ ات ءُُ ما گوں وتی ھیالاں آئی ءَ شیئر کنگ ءَ وتی زند ءَ نکش ءُ دْرپ کُتگ اَنت۔
اکیڈمک ءَ ابید آئی ءَ بازیں کارے برجم داشت کہ مارا یکجاہ کت۔ توری اے کھیڈ، منازرہ، یا دودمانی مراگش، آئی ءَ مارا بھر زورگ ءُ مزہ کنگ ءِ ھاتر ءَ دلبڈی داتگ۔ اے ساھتاں مئے میان ءَ مھکمیں بندوک جوڑ کتگ اَنت ءُ ما ھما یاتاں پہ ابد زندگ دار ایں۔ زندگی ءُ وانگ ءِ ھاتر ءَ آئی ءِ شوک ءَ مارا وتی اسکول ءِ چاگرد ءَ گیشتر ھوار بوگ ءِ ھاتر ءَ سکین دات۔ واجہ ءَ مُدام گْوشت کہ وتی راجی زبان ءِ دَرونتاں ھم بہ وان اِت۔
اگاں آ دگہ مئے ھمراہ نہ اِنت بلے آئی ءِ میراس مئے دل ءُ دماگاں زندگ اِنت۔ ما ھما کدر ءُ ارزشتاں دیم ءَ بر ایں کہ آئی ءَ مئے تہ ءَ زرتگ اَنت ءُ آئی ءَ پھر کنگ ءِ جھد ءَ کن ایں۔ سر ابدلھمید ءِ یات ءَ مدام یات کنگ بیت بلے مئے زند ءِ سر ءَ آئی ءِ سان ھچبر ھلاس نہ بیت۔ ما کول کن ایں کہ ما آئی ءَ یات کن ایں ءُ آئی ءِ وانینگاں ھر روچ شرپ کن ایں۔
دیم ءَ روگ ءَ آئی ءِ کسہ ءُ تبک ءَ گوں آیوکیں پدریچ شیئر کن ایں۔ ما لوٹ ایں کہ دگر بہ زان اَنت کہ آ چوں ھاسیں مردمے بوتگ ءُ آئی ءَ مئے زند ءِ سر ءَ چے پیمیں دوزواھی کتگ۔ سر ابدلھمید بوت کنت کہ شتگ بلے آئی ءِ ارواہ مئے رھشونی ءَ برجاہ دار ایت۔ ما وتی شرتریں ورژن بوگ ءَ آئی ءِ یات ءَ زندگ دار ایں، انچوش کہ آئی ءَ مارا بوگ ءِ سکین داتگ۔
