نبشتہ کار: آئیشہ بلوچ
مرچاں پاکستان ءِ ھلاپ ءَ بازیں جنگولی گلے دیم پہ دیم ءَ جنگ ءَ اَنت۔ اِے ھر جنگولی گلانی وتی نیکراھی ءُ راجی لوٹ اَنت ءُ ھر جنگولی گلے وتی ھساب ءَ پاکستان ءِ پْروش دیگ لوٹ ایت۔ اِے جنگ ءُ جدل ءِ میان ءَ آزات ھیال ءُ راجمستری منّوگریں بلوچ راج ءَ وتی راجی شیواری ءُ راج ءِ تہ ءَ آگاھی ودی کنگ لوٹ ایت پرچا نیکراھی جنگولی گل تھریکِ تالبان پاکستان پہ بلوچ راج ءِ رَد دیگ ءَ ھر دو یا سے ماہ ءِ سر ءَ بلوچی زبان ءَ تامُرے کَش ایت ءُ ماں وتی شوشل میڈیا سرگیج کنت۔ چہ ٹی ٹی پی ءِ اے کلوھانی چارگ ءُ دلگوش کنگ ءَ پد راج ءِ زانتکار ءُ سرپدیں مُردم ھیران بنت ءُ لھتیں سوال ھم چِست بیت انچوشکہ زاناں نیکراھی گل ٹی ٹی پی ءُ بلوچ راجدوست ءُ سرمچارانی پگر ءُ سسّا یک اَنت؟ زاناں بلوچ راج ءَ گوں ٹی ٹی پی ءَ چے سْیادی ھست؟ زاناں ٹی ٹی پی چہ آزادی لوٹوکیں بلوچ راجدوست ءُ سرمچاری گلاں ھاٹیگ دار ایت؟ سیمی جُست کہ بلوچ رھشُون ٹی ٹی پی داوت ءِ چے پسّو بہ دے اَنت؟
گِند ئے 9/11 ویل ءَ پد اوگان تالبان ءِ ھلاپ ءَ امریکہ، نیٹو ءُ پاکستان ءِ جنگ ءِ آسر ءَ ٹی ٹی پی 2007 ءَ اڈ دیگ بوت۔ ایشی ءِ جنگی مول ءُ مراد، اوگانستان ءِ تہ ءَ اوگان تالبان ءِ وڑ ءَ، ماں پاکستان ءَ ھم اسلامی کانود ءُ رھبندانی(شرھی کانون) رواج دیگ ئیگ اِنت کہ نیکراھی رھبنداں پاکستان ءِ تہ ءَ ھر راجے ءِ آئی ءِ ھک برابری ءِ بُنیات ءَ بہ رس ایت۔ چوناھا ٹی ٹی پی وت یکمُشتیں گلے ھم نہ انت بلکیں ایشی ءِ تہ ءَ جماھت الھرار، ھِزبِ الھرار، الکائدہ، لشکرِ جنگوی ءُ ھاپز گُل بھار ءِ وڑیں بازیں نیکراھی گل ھوار اَنت۔ چہ ایشی ءَ ھوار اِے گلانی تہ ءَ ھم دِگری ءُ جیڑہ ھست اَنت۔ اگاں گِند ئے اے ٹی ٹی پی پاکستان ءِ پْروش وَ نہ لوٹ ایت بلکیں لوٹ ایت کہ پاکستانی یک راستیں اسلامی مُلکے بیت انچوشکہ اے وھد ءَ پاکستان ءِ آمیدگِس انگریزانی وڑ ءَ اَنت، بینک، زر ءُ کار ءُ باری ترامگیجاں(مالیاتی اداراھاں) سود ءِ رھبند اَنت، زِنا ءُ دِگہ بازیں چیزے ماں پاکستان ءَ البار اِنت۔
ٹی ٹی پی لوٹ ایت کہ پاکستان ءِ تہ ءَ راجمستری (جمہوریت) ءُ آزات ھیالی مہ بیت، چوناھا پاکستان ءَ دْروگیں راجمستری انت۔ ھستیں وھد ءِ بُزدلیں کار ءُ باری پوج ھلاس کنگ ءُ نوکیں پوجے تیار کنگ بہ بیت۔ ٹی ٹی پی پاکستان ءِ ھلاپ ءَ ھچبر نہ انت بلکیں پاکستان ءِ دْروگیں راجمستری، نااِنساپی، سرکاری رھبند، دستور، پاکستان ءِ مُلکار ءُ پوج ءِ ھلاپ اِنت۔ ٹی ٹی پی پہ پاکستان ءَ نیکیں واھگے دار ایت، ٹی ٹی پی لوٹ ایت کہ پاکستانی اسلامی کانود ءِ رِد ءَ دیمروی بہ کنت۔
البت بلوچ راجی آجوئی لوٹوکیں گھیگری گل چہ ٹی ٹی پی ءَ چَپ(اُلٹ) اَنت۔ بلوچ گوں پنجابی ءُ پاکستان ءَ ھچ وڑیں سْیادی یے نہ دار ایت پمیشکا بلوچ راج چہ 27 مارچ 1948 ءَ وتی راج آجوئی ءُ وتی ڈیھ ءِ وتواجھی ءَ جُھد ءَ اِنت۔ بلوچ یک آزاد ھیال ءُ راجمستری ءِ منّوگِریں چاگِردے دار ایت، بلوچ دود ءُ رواج ءِ رِد ءَ بلوچیت وت یک سرجمیں رھبندے ءُ نیکراھی بنی آدم ءُ ھُدا ءِ نیکراھی سْیادی یے پمیشکا گوں راجکاری ءَ نیکراھی ھچ وڑیں سْیادی نیست پمیشکا اولی جُست ءِ پسّو ھمیش اِنت کہ نیکراھی گل ٹی ٹی پی ءُ بلوچ راجدوست ءُ سرمچارانی پگر ءُ سسّا جُتا اَنت۔ چہ ایشی ءَ زانگ بیت کہ دیمتر ءَ آزات ھیالیں بلوچ راج ءِ مستریں دژمن ٹی ٹی بیت پرچا سسّا یک نہ اَنت۔
ٹی ٹی پی ءِ جنگول گیشتری ءَ پشتون مُلا اَنت۔راجدوستییں پشتون ھم ٹی ٹی پی ءِ ھلاپ اَنت یا گُل ھان اَنت۔ البت بلوچ راجی سرمچار یک دو دمگ ءَ وَ اِنّا بلکیں سرجمیں بلوچستان ءَ جنگ ءَ اَنت ءُ سرجمیں بلوچ راج توری دُنیا ءِ ھر کُنڈے ءَ بہ بنت وتی راجی سرمچارانی سر ءَ پھر ءُ ناز کن اَنت۔ بلوچ راجی آشوب بلوچستان ءِ ھر میتگ ءُ ھنکین ءَ سر بوتگ۔ دُنیا ءِ دیم ءَ بلوچ راج ءِ سِلاھبندیں جُھد یک آزات ھیال ءُ وتوجھی ءِ جُنزے زانگ بیت بلے ٹی ٹی پی یک دھشت گردی پجّارے دار ایت۔ بلوچ یک جُتا ءُ سرجمیں راجے چہ 1948 ءَ پہ وتی راجی آجوئی ءَ جُھد ءَ اِنت آئی ءَ زی روچ ءِ وزیرستان ءُ باجوڑ دمگ ءِ ٹی ٹی پی وتی تہ ءَ ھوار کنگ ءِ لوٹ دیگ ءَ اِنت!باید اِنت ٹی ٹی پی ءَ پسّو دیگ بہ بیت کہ اگاں شُما پہ پاکستان ءِ تہ ءَ اسلامی رھبنداں آرگ ءُ اڈ دیگ لوٹ اِت گُڑا اول وتی جنگولی گل ءَ پنجابیاں گیشتر ھوار بہ کن اِت ءُ پد ءَ وتی جھاد ءَ پنجاب ءِ مزنیں شھر لاھور، سیالکوٹ، پیسل آباد، مُلتان، گجرانوالہ، راولپنڈی ءُ اسلام آباد ءَ سر بہ کن اِت کہ چہ شُمئے جنگ ءَ یکشل ءَ تھنا پشتون مرگ ءُ پشتون شھر ءُ میتگ تباہ بوگ ءَ اَنت۔ اگاں پنجابی ھوار نہ بوگ ءَ اَنت یا شُمئے جھادی جنگ پنجاب ءَ سر بوگ ءَ نہ اِنت گُڑا باید انت وتی سوڑگ ءَ بدل بہ کن اِت ءُ پہ وتی سرڈگار پشتونستان ءِ آجوئی ءَ پاکستانی سرکار ءُ پوج ءِ ھلاپ ءَ جنگ بہ کن اِت۔ چوناھا ما دْراہ (پشتون، تاجک، اُزبک ءُ بلوچ) دْراہ اوگان ایں۔ کابل ءِ دمگدار بلوچ، ولایت ھلمند ءُ ھرات ءِ گورنر ھم بلوچ، بلوچ ولایت نمروز ءِ گورنر پشتون ءُ دگہ بازیں درور بزان اے دْراہ بلوچ ءُ پشتون ءِ سْیاد ءُ نزیکی ءِ نشانی اَنت۔ بلوچ راج ءِ آجوئی ءِ جنگ چہ شما باز کْوھن ءُ گیشتر جْوان انت ءُ ما چہ 1948 ءَ یکشل ءَ پنجابی پوج ءِ زُلم ءُ زوراکیانی آماچ ایں۔ مئے سر ءَ بیتگیں زلم ءُ زوراکی ءَ پاکستان ءُ پنجابی ءِ ھلاپ ءَ نپرت ودی کُت ءُ اے نپرت مارا تھنا آجوئی ءِ نیمگ ءَ بارت۔
شالا بلوچ راج پہ وتی راجی آجوئی ءَ یکمُشت ءُ تباک بہ بات اَنت بلوچستان ءُ اوگانستان زِندگ بات۔
