نبشتہ کار: ادنان بلوچ
ما پرچا بلوچی وانگ ءُ نبشتہ کنگ ءَ نہ زان ایں؟ ما پرچا اینچو ناسرپد ایں؟ ما پرچا چہ وتی ماتی زبان ءَ بے سما ایں؟ ما انگت اِے گپّ ءَ پہ شانے گُش ایں کہ ما بلوچی وانگ ءُ نبشتہ کنگ ءَ نہ زان ایں۔ سک بژن بیت پرچا ما اِے گوانکوانی زمانگ ءَ انگت گُش ایں وتی ماتی زبان ءِ وانگ ءُ نبشتہ کنگ نہ زان ایں گڑا مئے اِے بلاھیں شومی ءُ بدبھتی یے کہ ما انگت چہ وتی ماتی زبان ءَ بے سما ایں۔
مارا گْوانکو دست ءَ اَنت بلے ما انگت وتی ماتی زبان ءِ وانگ ءُ دربرگ ءِ جُھد ءَ نہ کن ایں، گِند ئے ما وتی ماتی زبان ءَ وت گار ءُ بیگواہ کنگ ءَ ایں، گڑا مئے دْژمن گیش ءَ چہ گیش گَل بنت کہ بلوچ راستی ءَ سرپد نہ اِنت کہ مرچیگیں راجدوستی ءِ جُھد ءَ بلوچ چہ وتی زبان ءَ بے سما اِنت۔ گڑا باید اِنت ما نو وت ءَ بے سما مہ کن ایں، ما نو باید اِنت بے سمائی ءَ بس بہ کن این ءُ وت ءَ سما بہ کن ایں کہ اِے گوانکو مئے بلوچ راج ءِ واست ءَ وانگجاہ اَنت، گْوانکو مئے بلوچی کتاب اَنت۔ چوناھا بلوچی پہ بلوچ وانِندھاں سک آسان اِنت۔ اگاں ما بلوچی دَرونت ءُ راجدوستی نبشتانکاں وانان کن ایں گُڑا یک ھپتگے ءِ تہ ءَ بلوچی نبشتہ زبر بَہ ایں۔ اگاں مئے دل بہ لوٹ اِیت گُڑا چہ گْوانکو ءِ آسراتی ءَ مایک ماھے توک ءَ وتی ماتی زبان ءَ دربر ایں، وانگ ءُ نبشتہ ھیل کن ایں۔
بلے مئے اِے ناسرپدی اِنت کہ وتی زبان ءَ وت ھمے وڑ کنگ ءَ ایں۔ ما پہ اردو ءُ انگریزی ءِ وانگ ءَ برے یک ھندے ءَ رو اِیں۔ بلے مارا وتی ماتی زبان ءَ ھمد ءَ ھمے گوانکو ءِ تہ ءَ وانینگ بیت بلے ما انگت نہ وان ایں۔ تو پہ دری زبان ءِ واست ءَ سالانی سال جھد کن ئے، وتی ماتی زبان ءَ یک ماھے ءَ ھم نہ وان ئے رند ءَ گُش ئے کہ ما بلوچی وانگ نہ زان ایں گڑا اِے بژن ءِ گپّے۔ اگاں ما وت وتی زبان ءِ واست ءَ جھد نہ کُرت۔ ما وت وتی زبان دوست نہ داشت گُڑا دگہ ھم کسے مئے زبان ءِ سر ءَ جھد نہ کنت۔ گِند ئے مارا وتی زبان ءِ دربرگ ءِ واست ءَ چہ سرکار ءِ نیمگ ءَ ھم ھچ وڑیں کمُک رسگ ءَ نہ اِنت پرچا کہ سر لوٹ ایت بلوچ ءُ بلوچی گار بہ بیت پمیشکا مارا وتی زبان ءِ سر ءَ وت جھد کنگی اِنت ءُ تپاک بوگی اِنت۔ مارا وت وتی زبان وانگ ءُ دربرگی اِنت۔۔ مارا وت وتی آیوکیں پدریچ ھم وانینگی اِنت۔
منی برات ءُ گْوھاراں نوں وت ءَ سما بہ کن اِت، نو بے سمائی ءَ بس کن اِت۔ نو مارا یَکمُشت ءُ تپاک بوگی اِنت ءُ ماں رسانکدر ءَ ھوار جنزگی اِنت۔ پہ راجی زبان ءِ وانگ، نبشتہ کنگ ءُ راج ءِ وانینگ ءَ مارا یکتوار ءُ یکدست بوگی اِنت۔ سلامت بات اِت ءُ جنزان بات اِت۔
زُبان دوست ءُ راجدوستیں بلوچ بات اِت۔ وت ماں وت تپاک، ھمکوپگ ءُ ھمدست بات اِت۔ بلوچ راج، بلوچستان ءُ بلوچی دیمروی بہ کنات۔ شالا سوبین بات اِت۔
