

نبشت کار: کماش بلوچ
پِگر توانا بہ بیت مردُم الّم وتی مِنزل ءَ سر بیت پرچاکہ بالاد ءِ نزوری مردُم ءَ پِگری نزور کُرت نہ کنت۔ آئی ءِ لاگریں بالاد ءِ کسّہ ءَ مہ کن کہ مکھیں مات ءِ گماں ھُشک ترّ اِتگ۔ مروچی واجہ کے ڈی جان گوں لاگریں بالاد ءَ بلوچستان ءِ دْرچک، راسکوہ ءِ پْرشتگیں تَلار ءِ زُبان جوڑ بوتگ۔ منی زندگی چہ دُنیا ءِ پِگراں بے گم روان اَت، سُھب ءَ وانگجاہ ءَ شُت آں ءُ دگہ وھد ءَ پُٹبال ءِ گراؤنڈ ءَ پہ لیب کنگ ءَ من الّم وت ءَ ساڑی کُرت۔ ھر وھدے کے ڈی ھاران ءَ بیاتکیں گُڑا بیگاھاں الّم ھمود ءَ چارگے دات ئِے۔
کے ڈی چہ ھما وھد ءَ من ءَ سکّ دوست اَت، آئی ءِ ھون دِل ءَ لگّ اِت پرچا کہ آ سکّ ھاموش اَت، گوں کسّے ءِ کار ءَ کار ئِے نیست اَت۔ وتی دُنیا ءِ باگ ءَ وشّ اَت۔
یکروچے منی موبائل ءَ اُستاد ھمید شریپ ءِ شیرے چلگ ءَ اَت گُڑا کے ڈی من ءَ دیست گُشت ئِے “ھال کن ھیر اِنت مروچاں تو چوش کنگ ءَ ئے؟”
گُڑا من پسّو دات “جگر بس جُست ءَ مہ کن ھمے شیر من ءَ چَٹ دگہ دُنیایے ءَ بر اَنت، زمین ءِ مھر زندگ بنت۔”
گُڑا آئی ءَ کندگے جَت ءُ پہ مسکرایے گُشت ئِے “ھاں جْوان اِنت نو بیا اِد ءَ بہ نند کہ بال مہ کن ئے۔” من ھمود ءَ کش ءَ نِشت آن ئِے۔
پد ءَ من سوج کُرت “تو ھال کن اے وانگجاہ ءِ وانگ ءُ زانگ ءَ مارا چیزے رس اِیت ناں کہ تو چَہ من ماشاءَاللہ باز ونتگ۔”
گُڑا پسو ئِے دات “براس وانگ تئی زھن ءَ پَچ کَنت۔۔۔ ترا راہ ءُ راھبنداں نشان دَنت، ترا گُلزمینے ھست کہ گُلام اِنت، وانگ تئی تھا ھمے مارشت ءَ پیداک کَنت کہ تو گُلام ئے ترا جُھد کنگی اِنت کہ دُنیا ءِ دگہ مُلکانی بارو ءَ ترا سرپدی دنت۔”
پد ءَ من ءَ گُشت ئِے براس کوشست کن رازداری بکن ھر کارے کن ئے پہ بے تواری بکن ئِے کہ تو زاھِر مہ بَہ ئے۔
من پہ مسکرا گُشت “سر ئِے الّم چہ دُنیا ءَ روگ لوٹ اِیت گُڑا پرچا مردُم بے توار بہ بیت۔”
کندگے جت ئِے ءُ گُشت ئِے “یکّے دومی ءِ وھد زانگ نہ بیت بلکیں من وت ءَ شرتر سر کن آں۔”
ھمے گَپّ ءَ من ءَ شکّ بوت کہ ایشی ءَ وڑے ھست بلے من ھرچی کہ سر ءُ سوج کُرت ھچ ئِے نہ گُشت۔ لھتیں روچ ءَ پَد ما واتر ڈیک وارت گُڑا من پد ءَ سوج کُرت “لالا راست بُگُش وڑ ھست ناں من ءَ دیم دے ئے من رو آں۔”
گُڑا زھر گِپت کہ من تئی مردُم دیم دیوک آں گنوک مہ بَہ ئے، بس ودار کن۔ من پد ءَ گُشت کہ من چہ ھلک ءَ روگ ءَ آں گُڑا ما رُکست کُرت ءُ من رھادگ بوت آں آئی ءَ آواز دات “براس وشّ اِنت گُڑا ھوار اِیں۔”
من گُشت انشاءَاللہ سال اندازہ 2016 اَت من ءَ نوک بیست روچ بوتگ اَت کہ چہ ھلک ءَ شُتگ اِت آں کہ کلوے تالان بوت کہ سدام چِست کنگ بوتگ۔ من سکّ پریشان بوت آں، زمین پہ من تنگ بوت۔ شش یا ھشت روچ ءَ پَد چہ دشمن ءِ تھاریں کوٹیاں آجو بوت۔
من اِرادہ کُرت کہ ھال ءُ اھوال ئِے کن آں بلے وڑ نیست اَت۔ تھنا من ءَ ھال رس اِت کہ سدام سرزمین ءِ کُنگریں بچّانی ھمراھی ءَ بلوچ ءِ پناہ گاہ وتی ھنکین کُرتگ ۔
من سکّ ناگیگ بوت آں منی دل ءَ گُشت کہ ھال ءُ اھوال ئِے بوتیں من ءَ دست ئِے بہ گپتیں اگاں ناں دشمن من ءَ دزگیر مہ کنت۔ بس من وت پیسلہ کُرت اگاں کسّے گوں من ھال نکنت من چاکنگ کن آں الّم کسّے منی ھال ءَ گیپت۔ گُڑا من چہ بازار ءَ چار دانگ اِسپر ءِ گِپت لھتیں وھد منی کار ھمیش اَت۔ چاکنگ کُرتگ پد ءَ ودار کُت کہ اے ھال سدام ءِ کرّ ءَ سر بہ بیت بلکیں گوں من ھال ءُ اھوال بہ کنت بلے ھچ پہ ھچ۔ من سکّ دلپروش بُوان اِت آں بلے چہ ریاست ءَ منی نپرت کم نہ بوت ھما 2010 ءِ وڑ ءَ اَت۔
پد ءَ 2023 ءَ منی موبائل دو روچ ءِ واستا بند اَت من نوک سُھب ءَ مھلّہ موبائل دست ءَ کُرت چار اِت نوکیں لمبرے ءَ سلامے دیم داتگ۔ گوں من دُنیا ءِ مردُم ھال ءُ اھوال کَنت بلے اللہ زانت منی شکّ سدام جان ءِ سر ءَ شُت۔ من پسو دیاں کُرت پد ءَ وتی نام ئِے گِپت من سکّ وشّ بوتاں۔ من ھما مردُم کہ دو دو روچ پنچ روچ موبائل ءَ دست ءَ نہ کن آں نو چہ وشّی ءَ منی موبائل چہ دست ءَ ایر نہ بوت۔ من سکّ باز گلگ گلگ شونی کُرت شَپ ءُ روچ من ھال ءُ اھوال کُرت۔ من گُشت منی دِل سکّ باز شرتر ھراب اِنت کہ تو وَت شُتگ ئے من ءَ گوں وت نہ بُرتگ۔
من ءَ گُشت ئِے شرتر اِنت یک سوالے کن اِیں من ءَ ھمیشی جواب ءَ بدے ئے۔۔۔ کہ بچار میرل شھید بوت بلے من انگت ءَ زندگ ءُ سلامت آں، میرل ءِ توپک من ءَ بڈّ ءَ اِنت، باید انت مردُم ھر وھد کوہ ءِ سوچ ءَ مہ جنت شھر ءِ تھا کار ھم لازم انت، دومی تئی سسٹم من ءَ مالُوم انت کہ تئی سسٹم گِس ءِ نیمگ ءَ چے وڑ انت، پد ءَ من گُشت جگر ترا تئی مکھیں ماس دوست نہ انت کہ تو شُتگ ئے گُش ئے دوست اِنت بلے وتن ھم مکّھیں ماس انت ایشی ھم ھکّ باز انت، اگاں تئی دِل نہ منّ اِیت گُڑا ترا لوٹائیناں کمّو لھتیں وھد اوپار بکن۔
ھمے وھد ءَ من کمّو نادْراہ بوتاں۔ آئی ءَ تواربند کُرتگ اَت من کلو ءِ تھا جواب دات گُڑا من ءَ جُست ئِے کُرت ھال کن تواربند نہ کنگ ئے ھیر اِنت۔ من گُشت منی آواز چٹ شُتگ من ءَ کُلّگ ءَ گِپتگ۔۔۔
پد ءَ گُڑا پہ مسکرا من ءَ چیڑینت ئِے کہ ترا کُرونا ءَ گِپتگ نو ترا بہ لوٹائیناں اِد ءَ من ءُ سنگتاں گیپت۔ ترا وَت مالُوم اِنت من سیاہ زردوئی انت تو نو پمّن دگہ بیماری یے زورے کار ئے۔ پد ءَ گُشت ئِے جگر وت ءَ نشان بدے ئے تئی تب وشّ بوت گُڑا ترا لوٹائیناں۔ من الاج کُرت منی تب جوان بوت گُڑا کے ڈی ءَ ھال کُرت کہ جگر نو بچار منی توار ساپ اِنت۔ منی جِند چٹ برابر اِنت کدی بیا آں
گُڑا گُش ئِے ترا ھال دے آں بزاں من تاں بیست روچ ءَ گیش ودار کُرت آئی ءِ ھمے ھال ءُ اھوال اَت مُدام کہ وت ءَ چہ دشمن ءَ پھریز اِت وت ءَ زوال مکن اِت اے جنگ الّم شُمئے کوپگاں کیت اے جنگ شُمارا دیم ءَ برگی اِنت، شُما کوشست کن اِت وت سرپد بہ بئیت وتی راج ءَ سرپدی بدے اِت کہ پہ چمداری ءَ چار کلدار ءَ اِزّت ءُ گیرت ءِ مَرگ ھزار درجہ بالاتر اِنت۔۔۔
پد ءَ من گُشت من ءَ انچو یکبرے بہ لوٹائین کہ من تئی لاگریں بالاد ءَ گِندگ لوٹاں، گُشت ئِے شرّ اِنت من ترا لھتیں روچ ءِ واستا لوٹائیناں۔۔۔ من سوچ جتگ اَت کہ اود ءَ شُتاں پد ءَ واتر نہ باں تھنا یکبرے ھمود ءَ سر بہ باں بلے واہ بھت ءُ نسیب۔۔۔
من آئی ءِ مُدام چیڑینت تنگ کُرت کہ تئی ماس پہ تو آروس ءِ تیاری کنگ ءَ اِنت تو چے گُش ئے آروس کن ئے نا۔۔۔ گُڑا آئی ءَ مُدام کندگے جت ءُ گُشت ئِے کہ بس دُوا بکن کہ من وتی منزل ءُ مکسد ءَ سابت کدم بہ باں آروس ھیر بیت۔۔۔
من گُشت اللہ بادشاھے انشاءَاللہ سر ب ئے پہ من دُوا کن کہ من ھمینچک ھمود ءَ سر باں دل ءِ درد کم بنت۔ گُڑا کے ڈی جان کندگے جَت ءُ گُشت ئِے کہ اِد ءَ دشمن اینچک تنگ نہ بیت گُڑا وتی درداں ھلک ءَ گوں دشمن ءَ کمّ کن۔۔۔
من گُشت اِد ءَ ھمے ھست کہ من بہ رو آں اںشاں پہ سِنگ بجن آں۔ گُڑا کندگے جَت ءُ وائسے دیم ئِے دات گُشت ئِے “دل ءَ مزن کن چہ من پد ھمے سنگت کہ راج ءِ واستا پند ءُ گُژن ءُ تُنّ اوپار کنگ ءَ اَنت ھمیشانی ھمراہ بہ ئے منی توپک ءَ جھل ءَ ایر کنگ ءَ میل اِت گُڑا بزان اِت من گوں شما یکجاہ آں۔۔۔ آشوب ءِ راہ ھمیش اِنت براسی ءُ راجداری راج دوستی ءِ (فلسفہ) ھمیش اِنت کہ یکّے دومی ءِ توپک ءَ زورگ ءُ دیم ءَ روگی اِنت۔۔
ھمے گَپّ ءَ من تسلّی بوت آں وت ءَ کمّو داشت۔ گُڑا الیکشن نزّیک بوان اِت اَنت گُڑا من ءَ سوج ئِے کُرت کہ ھلک ءَ کدی رو ئے۔ من گُشت نہ رو آں کہ پہ ووٹ ءِ پِنڈگ ءَ پاکستان ءِ دلاراں تاس دست ءَ اِنت
گُڈّی گَپ ئِے ھمے بوت کہ وت ءَ چہ دشمن ءَ سمبال اِت۔
اے ھمے وھد اِنت کہ بزان پہ بولان ءِ منزل ءَ تیاری اِش کُرتگ۔ من ءَ کلوے کُرتگ اَت ئِے کہ وتی دُوا نیک ءَ گون کن جگر ءُ وتی ھکّاں پھل کن کہ باریں پد ءَ ھال ءُ اھوال بہ بیت مہ بیت۔۔۔ گُڑا من گُشت منی سر پہ تو کُربان جگر تو چونیں گَپّ کنگ ءَ ئے وتی تواربند ءَ گوشدار۔ بلے آ چہ نیٹورک ءَ درکپتگ اَت۔
لھتیں وھد ءَ پَد ھال آھت کہ بولان ءَ مجید بریگیڈ ءَ آپریشن بندات کُرتگ گُڑا منی شَپ ءِ آرام شُت ءُ دُوا کُرت اللہ سنگتانی کُمک بہ بیت دومی روچ ءَ من چار اِت سنگتے ءِ کلو آھت کہ کے ڈی جان وتی راجی ھکّ ادا کُرت ءُ شھمیرانی لڑ ءَ ھوار بوت۔
اے گَپّ ءِ اشکنگ ءَ منی بالاد نزور ترّ اِت ءُ لرزگ ءَ لگّ اِتاں منی جان چَٹ ھلاس بوت من بس وت ءَ ھمد ءَ دور دات سرزمین ءَ ایر کُرت چمّاں پہ آزمان ءَ جَت اَنت۔۔۔ بلے منی درد کم نہ بنت کے ڈی جان ءِ دیدار نسیب ءَ نہ بوت نو تھنا اَکس ءُ یات اَنت گوں دِل ءَ بندوک اَنت۔
شھمیریں کے ڈی جان رُکست اُپّ ھواران سنگت۔۔