نبشتہ; ھلیل بلوچ
یازدھمی بھر
مُلّا ابراھیم کاروان ءِ ھمراہ اَت۔ ھاران ءِ کش ءُ کرّ ءِ چیریں جاگھاں سنگتاں اوتاگ کُرتگ اَت۔ من زانتگ اَت کہ سنگتانی کرّا مُلّا ءِ روگ ءُ آھگ ھست، من مُلّا ءَ را تنگ کُرت کہ من ءَ سنگتانی کرّا بر گوں۔ اول مُلّا ءَ وتارا نا سئی کُرت پدا مجبور بوت گوشت ئِے میرل ھمدا ھاران اِنت۔ من ءَ میرل ءِ لمبر ئِے دات۔
من گوں میرل ھالوال کُرت۔ میرل گوشت باندا گُڑا تیار بئے من ترا جاگھے لوٹائیناں۔ تیوگیں روچ من سکّ گل اِت آں۔ پورا گوش ئے ھوشام زدگیں مردُمے پہ آپ ءِ شوھاز ءَ در پہ در بہ بیت ءُ پَدا آپ ءِ ڈسّ ءُ نشان ئِے بہ رسیت۔
دومی روچ ءَ پیشیم ءِ وھد ءَ میرل ءِ میسج آھت کہ جوژّان ءِ ٹینکی ءِ کش ءَ من تئی ودارا نشتگ آں۔
مزنیں وھدے ءَ پَد من ءُ میرل مجلس ءُ دیوان اِت ایں۔
الیکشن ءَ پَد من تیاری کُرتگ اَت کہ سنگتانی ھمرائی ءَ رواں۔ بلے بی ایس او آزاد ءِ سی سی ممبرے دمگ ءَ آھتگ اَت گُڑا من ءُ مُلّا ابراھیم ءَ زمہ داری دیگ بوت کہ سنگتاں بہ سمبھالاں۔ اے سنگت آھت ءُ شُت گوں ایشی روگ ءَ مُلّا ابراھیم ھم گار بوت۔ لمبر ئِے ھم بند اَت۔ من زانت کوہ ءَ شُتگ گُڑا میرل ءِ ھما پیسبک ءَ میسج پہ میسج کُرت۔
داں کہ میرل ھم یکروچے لائن ءَ آھتگ اَت۔
چہ میرل من ءَ مالُوم بوت کہ جیکسن ءُ الی جان ءُ دگہ سنگتانی گروپے چہ بی ایل اے ءَ درآھتگ ءُ بی ایل ایپ ءَ آھتگ اَنت ءُ شورّ ءَ بی ایل ایپ ءِ اوتاگے اڈّ دیگ بوتگ۔ میرل شَپ ءُ روچ تگ ءُ تاچانی تہ ءَ اِنت ءُ بارگ چہ مکّران ءِ اوتاگاں ھاران ءِ سنگتاں آرگ ءَ اِنت۔
اے دمگانی تہ ءَ اگاں بی ایل ایپ چو راسکوہ ءِ تلاراں مُھکم اِنت گُڑا گَل ءِ مُھکم کنوکانی اولی سرپ ءِ تہ ءَ میرل ءِ نام ھوار اِنت۔ وھد ءِ زوراکیں چیلّ ءُ پتارانی تھا بازیں کسے ءِ پِگر چِست ءُ جھل بوتگ بلے میرل ھما اولی روچ ءِ میرل بوتگ، توانا پِگر، مشکل ءُ مسلھاں گوں بِچکندگ برداشت کنگ، ژند ءُ پنداں پَد وتی زمین ءَ سُجدہ کنگ ءُ پہ اَرمانے وتی راج ءِ بزّگ ءُ واراں دِل ءَ آرگ۔ کدی ھم آئی ءِ دَپ ءَ مایوسی ءِ گَپّے کسّے ءَ ھم نہ اِشکُتگ۔
پدا مزنیں وھدے گْوست آئی ءِ ھال ھوال نبوت ھمے وھد ءَ منی دو سنگت بیگواہ کنگ بوت ءُ میرل ءِ ھال ھوال نیست اَت۔ من جھاؤ ءِ اوتاگ ءَ شُتگ اِت آں میرل لائن ءَ آھتگ اَت گوں سنگتے ءَ پمّن کلوھے دیم داتگ اَت کہ ھر وھد ئِے ھمینگو نزّیک آھت ئے گُڑا من ترا شورّ ءَ براں۔
اے وھد ءَ میرل ءَ نوک آروس کُرتگ اَت من ھم ھاران ءِ نزّیک ءُ کش ءَ اِتاں بلے میرل ءَ وھد رسگ ءَ نہ اَت۔ من سکّ تنگ اِتاں کہ تھنا اِت اِت آں گُڑا لمبر ھمے یکّین اَت برے میرل ءَ گون اَت برے مُلّا ابراھیم ءَ برے جیکسن ءَ
یکروچے من سکّ تکانسر اِتاں من شھری سنگتے لوٹائینتگ اَت کہ سواری ءِ وڑے بہ کنت ءُ منا جاگھے سرپہ کنت۔ من ءُ سنگت نشتگ اِت ایں کہ میرل پون کرت ءُ گوشت ئِے باندا سنگتے ترا دست گیپت ءُ کاریت بلے سُھب ءَ مھلّہ وتارا ڈیری پارم ءِ دیم ءِ نیمگ ءِ واٹر سپلائی ءَ سر کن۔۔۔۔۔۔۔
روان اِنت
