کتاب سوانھ ھیات چیرمین گلام مھمد بلوچ

چشمانک: رزوان بلوچ

شھید چیرمین گُلام مھمد بلوچ 1 جنوری 1959 ءَ مند ءَ مھمد ایوب ءِ لوگ ءَ ودی بوتگ۔ اے ھما وھد بیت وھدیکہ بلوچ جنرل ایوب ءِ مارشل زُلم ءُ زوراکیانی دیمپان بیت۔ ھمُک روچ یک بلوچے ءِ جون دز کپگ اَت۔ چیرمین ءِ بنداتی نام نسیر اھمد اَت۔ بلے پد ءَ آئی ءِ نام مٹ بوت ءُ گُلام مھمد کنگ بیت۔ پرچا کہ چیرمین ءِ پِت وتی پِت ءَ واب ءَ گِند ایت ءُ ￶آ گُش ایت کہ چک ءِ نام ءَ گُلام مھمد بہ کن”
کسانی ءَ نادْراھی یے ءِ سبب ءَ چیرمین ءِ پِت آئی ءَ نادراھجاہ ءَ بارت۔ واتری ءَ آیگ ءَ بنت آ کبر ءِ سر ءَ پاتیا وان اَنت گُڑا چیرمین وتی پِت ءَ جُست کُنت کہ اے کئی کبر اِنت کہ تو پاتیا ونت؟
گُڑا پِت پسو دنت کہ اے شھید اِنت کہ انگریز ءِ پوج ءِ ھلاپ ءَ جنگ ئِے کُتگ پہ اے زمین ءِ ھاتر ءَ شھید بوتگ۔ چہ ھمد ءَ چیرمین گُلامی ءِ مارشت بیت۔ ھمے جیڑ ایت کہ من ھم پہ زمین ءِ آجو کنگ ءَ کربان باں۔ چیرمین ءَ چہ در کسانی ءَ شَیر نبشتہ کُتگ ءُ برے برے سوت ھم گشتگ ئِے۔ چہ کسانی ءَ چیرمین وتن دوستے بوتگ ءُ ھمے کوم دوستی ءُ وتن دوستی ءَ آئی ءَ وتی زند ءِ مکسد جوڑ کُت۔

چیرمین گُلام مھمد ءَ وتی بنداتی وانگ 1965 ءَ چہ گورنمنٹ مڈل اسکول سُورو مند بندات کُتگ ءُ گوں وھد ءِ ھمراھی ءَ چیرمین ءِ مجگ ھم گھتر بوان اَت۔ وانگجاہ ءِ استاداں ھر وھد ءَ شھید گُلام مھمد ءِ توسیپ کُتگ کہ یک بودناکیں نودربرے۔

دومی بھر: سیاسی زندگی ءِ اولی مرحلہ

وھد روان اَت ءُ بلوچ ریاست ءِ زلمانی دیمپان اَت۔ بلوچ ءِ چُک چینی بوگ ءَ اَت ءُ دژمن ءَ چادر ءُ چار دیواری ءِ پامالی کُتگ اَت بلوچ زالبوالانی زلم ءِ آس ءَ مان کُتگ اَت۔ اے زلم ءُ زوراکی ءِ وھد ءَ بلوچ نودربری گل بی ایس او گوں جوانیں دْروشمے ءَ کوم ءَ یکمشت کُتگ اَت ءُ زلم ءِ ھلاپ ءَ جنزگ ءَ اَت۔ ھمے وھد ءَ 1974 ءَ شھید پِدا جان پہ سنگتانی سیاسی تربیت ءِ ھاتر ءَ مند ءِ دورہ ءَ شُتگ گُڑا چیرمین شھید پِدا ءِ چیر دستی یک جوانیں دابے ءَ کار ءَ اَت۔ ھمے ھاتر ءَ چیرمین مند زون ءِ جنرل سکیٹری گچین کنگ بوت۔1980 ءَ چیرمین ءَ میٹرک سورو مند ءَ کُت گیشتر وانگ ءِ ھاتر ءَ 1981 ءَ کراچی ءَ شُت۔ سندھ مسلم کالج ءَ وانگ بندات کُت ءُ چیرمین ءَ گوں کراچی ءِ بی ایس او ءِ سنگتاں نزیکی کُت۔پد ءَ ￴ وتی سیاسی چست ءُ ایر بندات کُت۔ چیرمین ءِ مھنت ءُ سیاسی زانشت ءِ سبب ءَ 1982 ءَ چیرمین گُلام مھمد بی ایس او ءِ کراچی زون ءِ جنرل سکیٹری گچین کنگ بوت۔ کراچی ءِ توک ءَ کارنر مٹینگ، وانگی، گردانک، روانک، ءُ چیزانی اڈ دیگ ءَ چیرمین ءَ جوانیں وڑے ءَ کار ءُ ￶امل ءِ ￵موہ رس اِت۔ بی ایس او ءَ سک پُرشت ءُ پروش ءِ آماچ اَت، شھید پِدا جان ءُ آئی ءِ سنگتانی مزنیں جھدے ءَ پد 1984 ءَ سرجمیں سنگت یک تلو ءِ چیر ءَ یکجاہ بوت اَنت۔ھمے سال ءَ بی ایس او ءِ کونسل سیشن اڈ دیگ بوت۔ کونسل ءِ سرکماشی شھید پِدا جان کنگ ءَ اَت ءُ پاگواجہ بلوچ گوریلا کمانڈر جنرل شیروپ مری اَت۔ چیرمین گُلام مھمد سٹیج سکیٹری اَت۔ کونسل سیشن ءَ پد چیرمین گُلام مھمد بی ایس او سندھ ءِ سوبائی سدر گچین کنگ بوت۔ چیرمین ءَ گوں سندھ ءِ دمگ ماں دمگ سرجمیں کوم پرست گلاں ھال ءُ اھوال بندات کُت، آیانی توک ءَ سندھی کوم پرست پلستینی، زپاری، نودربر ءُ دگہ بازیں گلاں ھوار اِت اَنت 1984 ءَ شھید گُلام مھمد اولی رند ءَ دزگیر کنگ بوت وھدے کہ آ زیاء مارشل کانون ءِ ھلاپ ءَ کراچی ءَ روانک ءِ کنگ ءَ اِت اَنت۔ ھپت روچ ءَ رند چیرمین یل کنگ بوت 1985 ءَ شھید گُلام مھمد سندھ مسلم کالج ءَ گریجویشن کُت ءُ گیشتر وانگ ءِ ھاتر ءَ شال ءَ اتک ءُ بلوچستان ءِ شاھدربرجاہ ءَ وانگ بندات کُت۔ پد ءَ 1986 ءَ بی ایس او ءِ ھشتمی مرکزی کونسل سیشن بوت۔ اے کونسل سیشن ءَ ڈاکٹر یاسین مرکزی چیرمین کھور ھان سینئر وائس چیرمین ءُ شھید گُلام مھمد جونیئر وائس چیرمین گچین کنگ بوت۔ بلوچ راج ءَ یک کومی سیاسی گل ءِ درکار اَت۔ بلے آ وھد ءَ نیست اَت۔ گیشتر ورناہ وانگ ءِ ھلاس کنگ ءَ پد یا کار ءُ روزگار ءِ نیمگ ءَ شت اَنت یا کہ پارلیمانی یاٹی ءِ پُشت ءَ کپت اَنت۔ اگاں کومی پاٹی بہ بوتیں گُڑا پاکستان ءِ کبزہ بلوچستان ءِ سر ءَ اینچو مھکُم نہ بوتگ اَت۔ ھمے کمی ءِ سرجم کنگ ءِ ھاتر ءَ شھید پِدا جان گوں سنگتاں آیانی تہ ءَ چیرمین ھم ھوار اَت۔ یک کومے سیاسی پاٹی ءِ بنھشت ایر کنگ ءِ جھد بندات کُت۔ بلے کھور ھان گوں وتی ھمراھاں اے گپ ءِ انکاری بوت گشت ئِے کہ گوں سردار ءُ نواباں یکجاہ بوگ ءُ سیاست کنگ بلوچ راجی سسا ءُ بی ایس او ءِ مراگش ءِ ھلاپ اِنت۔ بلے پِدا جان گوں سنگتاں ھم بید ء نواب ھیربکش مری ءَ دگہ سردارانی سر ءَ سِتک نیست اَت۔ ایشانی جھد ایش اَت کہ نام نھاد ءِ بلوچ کوم پرست پاٹی ءَ گوں نزیکی بکن انت۔ پد ءَ 1986 ءَ شھید گُلام مھمد ءِ آروس کُت۔ کھور ھان ءُ آئی ءِ سنگتانی پلیت ءِ پندلانی سبب ءَ 1987 ءَ بی ایس او یک رندے پد ءَ بھر ءُ بانگ بوت۔ ھمے وڑ ءَ 1987 ءَ کھور ھان جتا بی ایس او (سھب) جوڑ کُت۔

بی ایس او ءِ بھر ءُ بانگ بوگ ءَ پد شھید پِدا جان گوں چیرمین گُلام مھمد ھوار سنگت یکجاہ کُت اَنت ءُ BNYM ءَ 1987 ءِ بنھشت ایر کُت BNYM ءَ پارلیمانی سیاست رد کُتگ اَت ءُ بے پارلیمانی گوں سیاست ءِ بلوچ ءِ وتواجھی ءُ چہ پاکستان ءَ آزات کنگ ءِ مراگش گوں تچکی ءَ دیم آؤرتگ اَت۔ چہ شھید گُلام مھمد ءُ شھید پِدا جان ءِ سیاسی ءِ زانشت ءُ مھکمیں سروکی ءِ سبب ءَ بلوچ زالبول گوں جُنز ءَ ھمگرنچ اِت اَنت۔ بلوچ زالبول BNYM ءُ BSO ءِ روانک ءُ روانکاں ھوار اِت اَنت۔ 1 مئی 1988 تربت ءَ شھید کامریڈ پِدا اھمد بلوچ ءِ سروکی ءَ BNYM ءُ BSO ءِ مزدروانی روچ ءِ سر ءَ یک روانکے بوت کہ آئی ءِ تہ ءَ BSO ءِ سینئرل وائس چیرمین شھید گُلام مھمد گوں وتی سسائی سنگتاں ھوار اَت۔ روانک ءَ پد چیرمین گلام مھمد وتی لوگ ءَ بزاں مند ءَ شُت آ 2 مئی ءَ شھید پدا اھمد بلوچ کتابانی دکان شھید کنگ بیت۔ 1989 ءَ BNYM ءِ مرکزی کونسل سیشن شھید نواب نوروز ھان اسٹیڈیم کوئٹہ ءَ برجم دارگ بوت اے کونسل سیشن ءِ تہ ءَ پاٹی ءِ نام مٹ کنگ بیت ءُ چہ BNYM ءَ BNM (بلوچستان نیشنل موومنٹ) ایر کنگ بوت 1990 ءَ بی ایس او کونسل سیشن برجم دارگ بوت ءُ شھید گلام مھمد چیرمین گچین کنگ بوت چیرمین گچین کنگ بوت چیرمین بوگ ءَ پد شھید گلام مھمد ءِ دست ءَ جوانیں موھے اَت کہ آ ورناھاں شھید پدا اھمد بلوچ داتگیں سسا ءِ سر ءَ یکمشت بکنت تانکہ آ ایستان ءِ پلیتیں پندل ءَ چے پرک اِنت؟ ھمے ھاتر ءَ بلوچستان ، کراچی ، سندھ ءِ ￵تہ ءَ دمگ ءُ کوچ جات ءَ تاں بلوچاں یک پلیت پارمے ءَ آرگ ءِ جھد بندات کُت۔

1993 ءَ بی ایس او ءِ مرکزی کونسل سیشن برجم دارگ بوت ءُ واھد بلوچ چیرمین گچین کنگ بوت، چہ ھمے کونسل ءَ سیشن ءَ شھید گلام مھمد ءِ نودربر سیاست ءِ وھد ھلاس بوت۔ چیرمین ءَ 1973،74 ءَ نودربر سیاست BSO ءِ پلیت پارم ءَ بندات کُت ءُ 1993 ءَ سرجم کُت۔

سیمی بھر: سیاسی زندگی ءِ زمانگ

1993 ءَ نودربری سیاست ءِ ھلاسی ءَ پد BNM ءِ چیردستی ءَ سیاست ئِے￸ بندات کُت۔ شھید گلام مھمد دمگ کیچ ءِ BNM ءِ سدر گچین کنگ بوت، کیچ ءِ ھر دمگ ءَ شھید گلام مھمد ءَ کار بندات کُت انت۔ آئی ءَ ھر وھد ءَ ھمے گشت کہ بلوچانی ھک ءِ رکینگ چہ بے پارلیمانی سیاست بوت کنت۔ اگاں ما چہ پاکستانی ادارھانی گلامی ءَ بکن ایں۔ گُڑا مئے پجّار ءِ جند گار بیت۔ 1994 ءَ پاٹی کونسل سیشن ءَ شھید گُلام مھمد مرکزی کمیٹی ءِ باسک گچین کنگ بوت۔ سے سال ءَ داں شھید گلام مھمد سنٹرل کمیٹّی ءِ باسک اَت۔ ھر وھد ءَ چیرمین ءَ پارلیمانی سیاست ءِ ھلاپ کُت ءُ پگر ءِ پد ءَ سر ءَ یکمشت بہ بنت۔ ھاسیں پرک گندگ نہ بوت۔ بلے چیرمین ءَ جُھد برجاہ داشت۔ پاٹی سربراھانی اے ھال شھید گلام مھمد ءَ دیست۔ گُڑا آئی ءَ وتی دلگوش بلوچ مھلوک ءِ نیمگ ءَ کُت۔ وتی سیاسی بودناکی ءُ زانشت ءِ سبب ءَ پاٹی ءِ باسکانی بروسا کُٹ اِت ءُ 1997 ءِ کونسل سیشن ءَ شھید گلام مھمد BNM ءِ مرکزی جونیئر نائب سدر گچین کنگ بوت۔ پد ءَ 1998 ءَ وھدے پونم (اکتر مینگل ڈاکٹر حئی ءُ مھمود ھان اچکزئی ءِ یک الائینسے اَت) بلوچستان ءِ تہ ءَ جلسہ ءُ روانک ءِ جار جت گُڑا شھید گلام مھمد کہ BNM ءَ گوں اے زھرشانی ءَ دست ءُ داوا نیست ءُ BNM ءِ باسک ایشی پلہ مرزء ءَ نہ کن اَنت۔ گُڑا پاٹی ءِ سکیٹری جنرل ءِ نیمگ ءَ چیرمین شوکاز نوٹس رس اِت۔

بلے چیرمین ءَ ایشی ءِ پرواہ نہ داشت۔ نو پاٹی ءِ تہ ءَ یک نیمگے بازیں سسائی سنگت بے پارلیمانی جھد ءَ بلوچ کوم ءِ آزاتی ءَ گندگ ءَ اِت اَنت گُڑا یک نیمگے گیشتر مردم پارلیمانی متلب زاتی پائدگی سیاست نشہ ءِ آماچ اِت اَنت۔ زر ءُ کدار ءِ گژن ءَ ایشاں انچوش گپتگ اَت۔ کہ کومی پائدگ سر ءَ ایشاں زاتی پائدگ گیشتر ارزشت داتگ اَت۔ ھمے سبب ءَ پاٹی ءِ مزنیں جیڑہ چلگ ءَ اَت ءُ ھمے ترس ھست اَت۔ کہ پاٹی دو بھر ءَ بیت۔

وھدے مزنیں جھد ءَ پد اے زاتی پائدگ لوٹوک کہ ایشاں زر ءُ مال ءِ گژن ءَ جتگ اَت۔ راہ ءَ نیاتک اَنت۔ گُڑا چیرمین گلام مھمد ءَ ایش اللہ ھاپز کُت ءُ گوں وتی سسائی سنگتاں BNM ءِ آرگنائزنگ باڑی جوڑ کت۔ ایشی ءِ توک ءَ شھید لالا منیر، شھید رسول بکش،مینگل واجہ مھمد ھسین بلوچ ءُ دگہ بازیں سنگت گون اِت اَنت۔ بلوچ آجوئی ءِ جنز ءِ جار لوگ لوگ ءَ رسینت۔ 2002 ءَ BSO AZAD جوڑ کنگ بوت۔ دومی نیمگ ءَ جنگولی جھد جنزگ ءَ اَت۔

بی ایس او آزات ءِ مکسد ناں تھنا بلوچستان ءِ آزاتی راجمستری جُنز ءَ پلہ مرزی کنگ ءَ اَت۔ بلکیں جنگولی جد ءُ ￶جھد ءَ یک اھم ءِ زلورت اِش ھساب ءَ چار اِت۔ یک آشوبی نودربر گل ءَ پد بلوچ ءَ یک جْوانیں آشوبی پاٹی ءِ درکار اَت۔ گُڑا اے کمی چیرمین شھید گلام مھمد گوں وتی سنگتاں پورہ کت ءُ BNM ءَ یک کوم پرست ءُ آشوبی پاٹی ءِ شکل ءَ دیم ءَ آؤرت 2004 ءِ کونسل سیشن ءَ بلوچستان نیشنل موومنٹ BNM ءِ نام مٹ کُت۔ ءُ پاٹی ءِ نام بلوچ نیشنل موومنٹ BNM کت پاٹی ءِ مکسد بلوچ کومی آزاتی بے پارلیمان سیاست بلوچ سرمچارانی پلہ مرزی ءُ بلوچ کوم ءَ سسائی ءُ ￶آگاھی ءَ یکمشت کنگ ءَ اَت۔ BNM ءِ مچی ءُ روانک ءُ بلوچ راج یکمشتی وھدے پارلیمانی زر ھرید ءَ دیست گڑا ایشی ءَ آیاں وتی سیاسی مرگ پھم اِت۔ ھمے ھاتر ءَ شھید گلام مھمد ءَ کبزہ گیرھستان ءِ آمیدگِس ءَ اشتھاری مجرم کرار دات۔

گُڑا پاٹی ءِ مرکزی کمیٹی ءَ پیسلہ کت کہ چیرمین مکران ءِ رائیگ ءَ بند بکنت پرچا کہ جاور نگیگ اَنت۔ چیرمین ءِ واست ءَ گُڑا چیرمین ءَ 10 جون ءَ 2005 ءَ بہ گر داں 2014 اگست ءَ 2006 ءَ داں کراچی ءُ بلوچستان ءِ باکی دمگ ءَ پاٹی ءِ کار کُت اَنت۔ مکران ءِ زمہ واری دیگ ءَ سنگتاں دات اَنت 3 دسمبر ءَ 2006 ءَ BNM ءِ جلسہ کراچی ءَ ھور سبب ءَ کینسل کنگ بوت۔ اے مُچی ءَ سلیمان داوؤد ھان ءُ سنا اللہ زھری آیگی ات انت بلے کینسل نہ بوگ ءِ سبب ءَ آیاں گوں تو گند ءُ نند ءِ واھشت زاھر کُت
ملاکات ءِ جاہ ءَ وھدے تو سر بوت اے زر ھرید وَ نیتک انت بلے پولیس، ایجنسی ءِ مزنیں ماڑی اتک ءُ شھید گلام مھمد ءُ شھید شیر مھمد دزگیر کنگ بوت اَنت۔ گُڑا کراچی بہ گر داں سرجمیں بلوچستان ءَ مچی ءُ روانک ءِ ھتم نہ بوگ ءِ سلسلہ ءِ بندات بوت پریس کلبانی دیم ءَ کیمپ جنگ بوت بھوک ھڑتال کنگ بوت زالبول مزنیں کساسے ءَ مُچی ءَ روانکانی بھر بوت اَنت 20 دسمبر 2007 ءَ شھید گلام مھمد ءُ شھید شیر مھمد ریاستی ایجنسی ءَ پولیس ءِ دست ءَ دات اَنت 23 دسمبر ءَ پولیس ءُ چیریں ادارھانی چیر دستی ءَ شھید گلام مھمد ءُ شھید شیر مھمد تربت تھانہ ءَ چہ زمانت بوت اَنت۔
2008 ءَ BNM ءِ مرکزی کونسل سیشن کراچی ءَ برجم دارگ بوت گیشتر باسکانی مشورہ ءِ سبب ءَ چیرمین گلام مھمد یک رندے پد ءَ مرکزی سدر گچین کنگ بوت نائب سدر ڈاکٹر امداد بلوچ مرکزی جنرل سکیٹری واجہ ھلیل بلوچ گچین کنگ بوت۔

یک پر آشوب ءِ وھدے اَت کہ دژمن ءِ زلم وتی گڈی ھدّ ءَ سر اَت۔ اے وڑیں کونسل سیشن برجم دارگ بلوچ جھد آجوئی ءِ سوبمندی ءِ نشانی دنت۔ چرمین ءَ وتی تران ءِ تہ ءَ گشت کہ BNM ءِ سیاسی ءُ انکلابی مراگش ھر بلوچ ءَ سر کنگ مئے پرز اِنت۔ ھمے ھاتر ءَ ما وتی شپ ءُ روچ ءَ یک کن ایں کرد ءَ ادا بکن انت۔ چیرمین شھید گلام مھمد گش ایت۔ کہ تھنا مئے ڈیھ ءِ آجوئی یا دنیا ءِ نکش ءِ سر ءَ بلوچستان ءِ نام ءِ سر ءَ مئے شناکت اے راج ءِ جیڑہ ھل نہ اِنت۔ مارا انچیں بلوچستانے لوٹ ایت۔ کہ آئی ءِ تہ ءَ ھمک مردم آزات بہ بنت۔ کس کسی چمدار مہ بیت مارا انچیں بلوچستانے لوٹ ایت کہ آئی ءِ تہ ءَ مئے آوؤکیں پدریچ وشھالی ءُ دیمروی بہ کن اَنت۔ 26 پروری 2009 ءَ مند ءِ جلسہ ءَ شھید گلام مھمد وتی تران ءِ تہ ءَ گش ایت۔ کہ ھستان زلم ءُ زوراکی کنت۔ ءُ گلام مھمد ءَ کشت کنت۔ بلے آزاتی ءِ ھما پگر کہ مروچی ھمک بلوچ ءِ دل ءُ مجگ ءَ اِنت آئی ءِ ھتم کنگ ناممکن اِنت۔

چارمی بھر: شھیدی ءُ شھیدی ءِ پد ءِ ￵ویل

3 اپریل ءَ 2009 ءَ وھدے شھید گلام مھمد شھید شیر مھمد ءُ لالا منیر آمیدگِس ءَ یک پیشی ءَ ھلاسی پد ءُ پیشی ءِ ودار ءَ کچکول الی ایڈوکیٹ ءِ دپتر ءَ کہ نشت اَنت گڑا ساھت ءَ پد ساد ءَ پوشاک ءِ تہ ءَ ریاستی ایجنسی ءِ مردم کچکول ایڈوکیٹ دپتر ءَ اتک انت ءُ شھید گلام مھمد گوں ھمراھاں گپت۔ ءُ وتی گاڑیانی توک ءَ کرت ءُ برت اَنت۔ اے ھبر سرجمیں بلوچستان ءَ چو جنگل ءِ آسان ءَ تالان بوت۔ گُڑا سرجمیں بلوچستان ءَ بہ گر داں کراچی ءَ مچی ءُ روانکانی ھتم نہ بوگ ءِ سلسلہ بندات بوت۔ ءُ 9 اپریل ءَ 2009 ءَ آکر کار کبزہ گیر ریاست ءَ شھیدانی جون مرگاپ ءِ دل بند ءَ چگل دات اَنت۔ شھید گلام مھمد گوں ھمراھاں پہ زمین ءَ وت ءَ کربان کت ءُ تاں ابدمان نمیران بوت اَنت۔ شھید لالا منیر وتی ھنکین پنجگور ءَ دپن کنگ بوت ءُ شھید گلام مھمد ءُ شھید شیر مھمد مند سورو ءَ دپن کنگ بوت اَنت۔ وھدے کہ شھید گلام مھمد ءِ جون آئی ءِ مات ءَ پیشدارگ بوت۔ گُڑا چیرمین شھید ءِ مات ءَ پھر بَست پہ وتی بچ ءِ سر ءَ گش ایت کہ: گلام مھمد تو اے زمین ءِ ھک ادا کُت ءُ دیمتر ءَ گش ایت کہ دریگتیں من ءَ سد دگہ زھگ بوتیں من پہ زمین ءَ ندر بہ کُتین اِت اَنت چیرمین ءِ شھیدی ءَ پد واجہ ھلیل بلوچ گش ایت کہ شھید ءِ کمی ءَ ما پورو کت نہ کن ایں بلے چیرمین شھید گلام مھمد یک انچیں مزنیں کارے کُتگ۔کہ تیوگیں بلوچ راجدپتر ءِ تہ ءَ مارا گندگ نئیت آ بلوچ کومی تحریک ءَ ادارتی شکل ءَ دیگ ءَ انت۔ ھمے مزنیں کار شھید گلام مھمد بلوچ ءَ یک مزنیں لیڈرے کنت۔۔