نبشتہ کار: مھرل بلوچ ءُ جمائتی بلوچ
مئے راج ءِ وانِندہ گْوش اَنت کہ بلوچی ناں وانگجاھاں وانینگ بیت ءُ ناں کہ بلوچی زبان ءِ شریں کتاب ھست اَنت گُڑا ما وتی راجی زبان ءَ چہ کُج ءَ دربر ایں؟ بازینے گْوش ایت “بلوچی گِران اِنت، من بلوچی راست نبیسّگ ءَ ھیل نہ آں۔۔۔۔، چہ من ءَ بلوچی وانگ نہ بیت”
گِند ئے اِے وڑیں دلپروش ءُ راج ءِ ناسرپدیں مھلوک ءَ سرپدی دیگ لوٹ ایت کہ بلوچی وَ ھچ گِران نہ اِنت بلکیں راستی وَ ایش اِنت کہ ما اشتاپ ایں۔ ما منّ ایں کہ مارا بلوچی ماں وانگجاھاں وانینگ نہ بوتگ پمیشکا ما بلوچی راست نبیسّگ ءَ ھچ نہ زان ایں ، راج بلوچی نبیسّگ ءَ سُست اِنت یا ھیل نہ اِنت۔ گِند ئے وتی ناسرپدی، نابودی ءُ سُستی ءِ تھمت بلوچی ءِ سر ءَ جنَگ راجی زُبان ءِ سر ءَ بلاھیں نااِنساپی یے۔ باید اِنت مرچیگیں دَور ءَ ما بلوچ نودربر ءُ لس وانِندہ وتی دستی گْوانگواں وتی راجی زبان ءِ کتاب بہ پھم ایں۔ وت ءَ بلوچی وٹس ایپی وانگجاھاں ھوار بہ کن این ءُ پد ءَ بلوچی درونت ءُ راجدوستی نبشتانکاں وانان ءَ وتی راجی زبان ءِ وانگ ءُ راست نبیسّگ ءِ جُھد بہ کن ایں۔ بلکیں بلوچی وانینگ ءِ جُھد بہ کن ایں پرچا کہ گوں وانینگ ءَ مارا وتی ونتگیں بلوچی درونت شر یات بنت ءُ مئے تہ ءَ ھمت ءُ بسہ ھم ودی بیت۔
سک بژن اِنت کہ ما اشتاپ ءُ دلپْروش ایں۔ ما پارسی، ھِندی ءُ انگریزی ءِ وڑیں دری زُبانانی وانگ ءُ دربرگ ءَ دہ سال جن ایں بلے بلوچی ءَ سے روچ ءِ تہ ءَ دربرگ لوٹ ایں! تاں دہ سال ءَ ما ھمے دری زُبانانی دَرونت ءُ کتاباں وان ایں بلے وتی جِند ءِ راجی زُبان ءِ وانگ ءُ دربرگ ءَ یک ھپتگے ھم نہ دے ایں! ما بلوچی ءِ ششیں دَرونتاں نہ وان ایں کہ اے ششیں درونت تھنا سے روچ ءِ تہ ءَ وانگ ءُ ھلاس کنگ بنت بلے ما تچک ءَ گْوش ایں بلوچی گِران اِنت۔ گِند ئے بلوچی مئے وتی جِند ءِ زُبان اِنت، وتی جِند ءِ زُبان پہ راجاں گِران ءُ گِران وَ نہ بیت پمیشکا ما گوں شما دزبندی کن ایں پہ بلوچی وانگ ءُ دربرگ ءَ ھچبر اشتاپ مہ کن اِت، تھنا ھر روچ یک بلوچی درونت ءُ یک زُبان دوستی نبشتانکے بہ وان اِت پد ءَ شما وت یک ھپتگے ءِ تہ ءَ بلوچی راست نبیسّگ ءَ ھیل کن اِت۔ بزانکہ راجی زُبان ءِ دربرگ ءَ اشتاپ نہ لوٹ ایت بلکیں توکل ءُ راجدوستی لوٹ ایت۔ مارا ھمے پھمگ لوٹ ایت کہ منی گْوانکو پہ من راجی زبان ءِ کتابے۔ پہ لھتیں روچاں وانگ ءُ دربرگ لوٹ ایت، زُبان دوستی ءُ راجدوستی ءِ مارشتاں لوٹ ایت۔
گُڑا باید اِنت ما چہ دُرستاں پیسر بلوچی دَرونت، زُبان دوستی ءُ راجدوستی نبشتانکاں وانان کن ایں کہ گوں وانگ ءَ سرپدی رس ایت ءُ دُنیا ءِ دِگہ راجانی وڑ ءَ ما بلوچ ھم دیمروی کن ایں۔ یک گپے گْوش آں کہ بلوچی گوں انگریزی آباں نبیسّگ ءَ مارا ھچ پائدگ نہ رس ایت بلکیں بلوچی گوں انگریزی آباں نبیسّگ وھد ءِ زیانی اِنت پمیشکا ما گوں شما دزبندی کن ایں کہ بلوچی ءَ گوں انگریزی آباں نبشتہ مہ کن اِت، بلکیں مُدام وتی راجی زُبان ءَ گوں بلوچی آباں نبشتہ بِہ کن اِت کہ شُمئے وتی زُبان ءَ آب ھست اَنت۔ اگاں ما بلوچی ءَ گوں بلوچی آباں نبشتہ کن ایں گُڑا ما کم کم ءَ بلوچی نبشتہ ھم ھیل کن ایں۔
ھر وھد ءَ چیزے نبیسّ اِت گُڑا وتی نبشتگیں لبز ءُ گالرِداں دوبر وت لازم بِہ وان اِت ءُ وتی رَدیاں راست بہ کن اِت۔ چوناھا دُنیا ءِ ھر شریں نبشتہ کار، کالج ءُ یونیورسٹیانی پروپیسر، شھزانت ءُ کارسر(آپیسر) بے چمشانک ءَ وتی کلوہ ءُ نبشتگیں چیزاں راہ نہ دے اَنت، بزانکہ اشتاپ نہ کنگی اِنت بلکیں مارا وتی رَدی وت راست کنگی اَنت، چہ وتی رَدیاں دربرگی اِنت، اگاں ما رَدیانی راست کنگ ءِ جُھد بِہ کن ایں گُڑا ما وتی راجی زُبان ءَ وت دربر ایں۔ اُمیت اِنت کہ اے وڑ ءَ شما ھر یکے وتی راج ءِ نودربر ءُ وانِندھاں ھم سرپدی دے اِت کہ مارا بلوچی پسبوک ءُ وٹس ایپی وانگجاھاں ھوار بیگی اِنت، وتی دزھُورکی ءِ وھد ءَ وتی راجی زُبان وانگ ءُ نبشتہ کنگی اِنت ءُ راج ھم وانینگی اِنت۔
سلامت بات اِت، شالا راجی زُبان ءِ جُھدکار ءُ ھزمتکار بِہ بات اِت، بلوچ راج شالا وت ماں وت تپاک، یکمُشت ءُ ھمدست بات، بلوچ ءُ بلوچی شالا دیمروی بکنات۔
