ڈیھ ءِ مُریدیں میرل

نبشتہ; ھلیل بلوچ

دھمی بھر

بلکیں لوگ ءَ وتی ناگماں درکپیت
میتگ ءَ مئے گنوکانی آباد کنت

سَباہ ءِ شھیدی ءِ ھال ءَ من ءَ تہ کُٹّ کُرتگ اَت۔ من تھنا دُوا کنگ ءَ اِت آں کہ اے ھال دْروگے بہ بات۔
بیست پروری ءَ جانان من ءَ Nimbuzz ءِ تھا ھال ھوال کُرت کہ ھاران ءِ سیاہ پادے ءِ اَکس گوں ھکّ نواز شِنگ اِنت ھالا بدئے چے بوتگ ئِے؟ اے گَپّ ءِ اِشکنگ ءَ گوں منی گڑتّی گیش بوت اَنت۔ من گوشت اَکس ءَ پمّن دیم دئے۔ آئی ءَ اَکس دیم دات کہ سَباہ ءِ چھرگ ءِ یک کپّے زاھِر اَت۔
دو روچ ءَ پَد سَباہ ءِ ھال رس اِت کہ زندگ ءُ سلامت اِنت۔ منی ھُدوناکی گیش بوتگ اَت۔ من کلوہ ءِ سرا کلوہ راہ دیگ ءَ اِت آں کہ سَباہ را بُگُش اِت گومن ھال ھوال بکن۔
انچو لھتیں وھد گوست یک روچے من پیسبُک ءِ تاک ءَ گْوازینان اِت آں کہ بلال بلوچ آئی ڈی ءَ چہ میسجے آھت۔ سَباہ اَت۔ ما تاں دیر ھال ھوال کُرت۔ من گْوشت “من اِرادہ کُرتگ ھمانگو کایاں، وڑ ءُ ھالات پیش ءِ وڑا نہ اَنت چو مہ بیت کہ مدگ ء بے ھون بہ باں تاوان بہ وراں۔” آئی ءَ من ءَ تسلّا دات ءُ گْوشت “تو لھتیں وھد وتارا ھمودا بدار کہ الیکشن آیگ ءَ اِنت، شھر ءِ تہ ءَ سنگت لازُم بیت، الیکشن ءَ چہ پَد ما شورّ ءَ بی ایل ایپ ءِ اوتاگ ءَ اڈّ دئے ایں گُڑا ترا لوٹائیناں۔”
آئی ءِ پھم سکّ تیز اَت۔ ھالتاں سکّ زوت سرپد بوت۔ پیسلہ ءِ تاگت آئی ءِ تہ ءَ است اَت۔ ھما شرّی کہ یک رھشونے ءِ ھاترا الّم اَنت آئی ءِ تہ ءَ است ات انت۔ نوں آئی ءِ نام بدل بوتگ اَت چہ سَباہ ءَ آئی ءِ نام میرل بوتگ اَت۔
2013 ءِ الیکشن ءِ وھد ءَ یکروچے میرل ءُ دگہ لھتیں سنگت کہ سئے موٹرسائیکل ءِ سرا چہ چارکوھان ءِ نیمگ ءَ شھر ءَ آیگ ءَ بنت کہ جوژّان ءِ دگّ ءِ سرا گوں ایپ سی ءَ ڈیکّ ور اَنت۔ آدگہ سینئریں سنگت وتی موٹر سائیکلانی دیم ءَ میدان ءِ نیمگ ءَ دئے اَنت بلے میرل ھمدا پیسلہ کَنت وتی سواری ءَ داریت ھمدا دگّ ءِ کش ءَ جُمپے ءِ بگل ءَ سنگر گیت۔ آدگہ سنگت کہ میرل ءَ گِندنت آ ھم سنگر گِرنت۔ گُڑا ایپ سی ھمودا دُور ءَ وتی گاڑیاں دار ایت۔ میرل ءَ سنگت جُست کن اَنت کہ تو پرچا چُش کُرت؟ گُڑا میرل پسّو دَنت “دیم ءَ دانکہ چمّ کار کن اَنت میدان اِنت اگاں ما میدان ءَ دور کُت ایں دشمن مئے سرا زوراک بوت کہ آ گاڑیانی سرا اِنت۔ اگاں جنگ کَنت من ءَ سِتک اِنت اے دو گاڑی مارا دْرستاں جَت نہ کنت۔”
پوج ایشاں گِند ایت کہ سنگر اِش گِپتگ گُڑا چہ ھمودا پَد دَنت ءُ رَوت۔ میرل ءِ پیسلہ ءَ چہ سنگت سکّ وشّ بنت کہ مُدام آئی ءِ ستا ءَ کن اَنت ءُ دنیگتہ آئی ءِ پیسلہ ءِ گْواہ اَنت۔
من ھم ھاران ءَ آھتگ اِت آں منی واھگ اَت کہ الیکشن ءِ وھد ءَ سنگتانی ھمراہ بہ باں۔ بلے میرل ءِ لمبر بند اَت۔ اے وھد ءَ مُلّا ابراھیم کوھا نہ شُتگ اَت برے برے ھاران ءِ دمکانی تہ ءَ گِندگ بوت۔ گُڑا من چہ ھاجی سبزل مُلّا ابراھیم ءِ لمبر گِپت ھال ھوال کُرت ءُ آئی ءِ گِس ءَ شُت آں لھتیں بی ایس او آزاد ءِ کتاب آئرا دات۔ چہ مُلّا ابراھیم ءَ من ءَ میرل ءِ ھال رس اِت کہ ھمدا دمگ ءَ اِنت۔

روان اِنت