آزمانک: واب

نبشتہ کار: میرک بلوچ

من مروچاں وابانی زر ءَ بُکو آن ءُ سک واب گِنداں، ھما تھاریں کوٹی ھما چِل ءُ گَند، ھما ابیتکی، ھما ازیت ءُ ھما نا شُناسیں رستر مُدام منی سر ءَ چو کھربان بَنت کھر کن اَنت۔

دوشی پد ءَ من واب دیست داں پوجیانی دو گاڑی اَنت کاینت من ءَ چہ واب ءَ پاد کن اَنت ءُ گِر کنان ءَ بَر اَنت، منی مات ءُ گوْھار باز واہ ءُ پریاد کن اَنت بلے ایشاں لٹ شاپ کنان بَنت من ءَ گاڑی ءَ سوار کن اَنت، منی
چم ، دست ءُ پاد بستگ اَنت ءُ من گاڑی توک ءَ ایشانی بُوٹانی چیر ءَ کپتگ آں، سماہ نیست کہ گاڑی کجا رؤگ ءَ اِنت بلے اے رستر گوں بُوٹاں من ءَ لگت جنان اَنت ءُ زاہ دیان اَنت، منی اوپار ءِ کُمب سَر ریتکگ بلے اپسوز کہ دست بند اَنت، کساس دو کلاک ءَ پد گاڑی اوشت ایت ءُ اے من ءَ گِر کنان ءَ کوٹی ءَ بر اَنت اے کوٹی ءَ سکّیں بدیں بوھے ھست ءُ یک انچیں گرمیں پاھارے کہ نپس پُر نہ بیت، من ءَ چو سماہ بُوتّ کہ اے کوٹی زمین ءِ چیر ءَ اِنت۔

اے تھارین ءُ بیم ناکیں کوٹی ءَ ھم آرام نیست اے رستر چو ھرے وڑ ءَ لٹ ءُ شاپ کن اَنت ءُ توسین اَنت وھدے بود کن ئے پد ءَ جنگ بندات کن اَنت، بس ھمے جُست کہ (تمہارا تعلق کس تنظیم سے ہے”؟ کَل جو فوجی کانوائے پر حملہ ہوا وہ کس نے کیا؟ تم بارود اور گولیاں کہاں سے لاتے ہو؟ علاقے میں تمہیں کون سپورٹ کرتا ہے؟ فوجی انفارمیشن تمہیں کون دیتا ہے)؟منی پد ءَ ھما یکّیں پسّہ بیت کہ “میں کچھ نہیں جانتا مجھے کچھ نہیں پتا”۔

تھنا جنگ ءُ چوپگ ءِ ازّیت نہ اِنت اد ءَ زھنی ازیت ھم بے کساس دیگ بیت، اے شُوم بے کساس ورگ وارین اَنت ءُ وھدے کہ تو باز ورگ ورئے گُڑا واب بیوار کنت ءُ اے واب نیل اَنت گُڑا دماگ ٹگل اَنت ھوش روت مردُم سک بیوار بیت۔

برے برے جھد کناں کہ وتا پاھو بہ دیاں بلے دست بند اَنت ھچ کُت نہ کناں۔

من مُدام ھمے واب ءَ گِنداں نہ زان آں وھم اِنت اگاں اے واب ءِ توک ءَ راستی یے ھست بلے اے واب ءَ من ءَ سک نگیگ کُتگ ءُ اے واب بے بزانت نہ اِنت۔

ایشی ءِ ھمراھی ءَ دگہ ھم واب گنداں کہ من گوں سنگتاں ھمراہ آں گو لشکر ءَ دوچار کپاں داں دیر ءَ جنگ دیاں پد ءَ ٹپّی بان ءُ گُڑا تیر ءِ لیکھے سر ءَ اَمل کناں َ شھادت نسیب بیت، برے۔

برے واب گنداں کہ مکّھیں مات ءِ کونڈ ءِ سر ءَ وش واب آں مات لیلو جنگ ءَ اِنت ءُ دست ءِ سر ءَ سمارتگ ءُ من واب آن ءُ بچکندگ ءَ آں۔