ڈیھ ءِ مُریدیں میرل

نبشتہ; ھلیل بلوچ

ھپتمی بھر

یک نیمگے دول ءُ سُرنا ءِ توار اَت کہ منی دِل ءِ تاراں سُرینگ ءَ اَت دومی نیمگ ءَ وشّی ھم بُوّگ ءَ اَت کہ راجی کارے کنگ ءَ اَت۔ وھدے ما دْرستیں کتاب کوٹیانی تھا دور دات اَنت ءُ واتر آھتیں دیوان انگت برجم اَت۔
من ءُ سَباہ آھتیں ھاران ءِ نودربرانی کش ءَ اوشتات ایں۔ مئے گروپ ھم برابر اَت کہ دومی نودربراں ھارانی دوچاپی ءِ پرمائش کُت۔ من سَباہ، اجاز ڈون، تارک ڈی ایس پی، جھانگیر شیرو ءُ دگہ سئے چار ءَ شرّیں درمّالے دات پورا گُش ئے منی دِل سرد بوت۔
ھارانی دوچاپی ءَ رند دیوان ءِ ھلاسی ءِ جار جنگ بوت۔ دیوان ءَ پَد ھر کس ءَ کہ وتی کوٹی ءِ دروازگ پچ کُرت بی ایس او آزاد ءِ لٹریچر آئی ءِ دیم ءَ ایر اَت۔
امل مردُم ءِ تہ ءَ اُمیت ءُ یکین پیداک کَنت چاھے آ امل سکّ ءَ کسان بہ بیت اول مردُم ءِ جِند ءِ تہ ءَ ￴ سِتک پیدا کَنت کہ آشوب کسان مُدّتی جُنزے نہ اِنت کہ یکپارگی آرگ بہ بیت ایشی ھاترا مدّان مدّان ءَ جُنزگ لوٹ ایت۔
سَباہ مُدام جُنزگ ءَ اَت پہ راج ءَ پہ جُنز ءَ کارا اَت۔ ماھے نہ گْوست کہ نودربرانی مسلھے ءِ سرا زھرشانی بُوّگ ءَ اَت گُڑا سباہ کاروان ءِ سرکماش اَت، من پیسر ءَ گُمان نہ کُرتگ اَت کہ سَباہ نودربر سیاست ءَ اینکہ ایکٹو اِنت پمشکہ سَباہ ءِ گُشتانک ءِ وھد ءَ من ھبکّہ ءُ ھیران اِت آں۔ من جھانگیر شیرو را جُست کُرت “سَباہ بی ایس او آزاد ءِ تہ ءَ اُگدھے داریت چون کہ زھرشانی کاروان ءِ دیم ءَ اِنت ءُ گُشتانک دیگ ءَ اِنت؟”
شیرو پسّو دات “ھو لومز یونی ءِ یونٹ سیکریٹری اِنت۔ بلے اے سادگے سرپد نہ بیت وتی جِند ءَ گْوازین ایت، مھلّہ یک چکّرے گِرگ بوتگ ایشی سرا دژمن ءِ چمّ سکّ اَنت باید اینکہ ایکٹو مہ بیت۔”
من ھِچ نہ گْوشت تھنا وتی دِل ءِ تہ ءَ پھر بَست کہ مئے دمگ ءِ ورناھے مروچی تیوگیں اوتھل شھدربرجاہ ءَ لیڈ کنگ ءَ اِنت۔
سَباہ چوناھا سکّ ءَ کابلیں سنگتے اَت۔ وھدے گَپّ سنگت ءُ سنگتی ءِ بیا اتکیں گُڑا سکّ ءَ مزاک ءُ مسکرا کُرت ئِے۔
یکبرے اوتھل شھدربرجاہ ءِ انٹری ٹیسٹ بُوّگ ءَ اِت اَنت گُڑا تُربت ءِ سنگتے آھتگ اَت کہ آئرا چہ ھمودا گاڑی یے گون اَت۔ انٹری ٹیسٹ ءَ پَد ما لھتیں سنگت ءَ گومائی ھَوار کراچی ءِ روگ ءِ پروگرام کُرت۔ سَباہ وتارا سکّ بزّگ کُرت ءُ نِشت بے توار اَت۔۔۔ نوکیں سنگت ءَ جُست کُرت “اڈے اے پرچا چو پریشان اِنت؟”
ڈی ایس پی پسّو دات “یار ایشی ھم انٹری ٹیسٹ داتگ بلے ایشی ٹیسٹ جوان نبوتگ اگاں ایشی سیٹ مہ بیت بزاں ایشرا گِس ءَ جاگہ نیست۔”
ھمد ءَ سَباہ ھم وتی بزّگی ءِ کسّہ آران کُرت اَنت کہ منی پِسّ ءَ منی سرا اینکہ زرّ ھرچ کُرتگ بلے من نہ وانتگ نوں منی ٹیسٹ ھم ھراب شُتگ من ھیران آں چون بکن آں۔
تیوگیں راہ ءَ ھمے نوکیں سنگت ءَ سَباہ کلاگ بَست ءُ چیڑینت۔ ما وتی کندگ دِل ءِ تہ ءَ ￴داشتگ اَت۔
وھدے نوکیں بیچ ءِ کلاس بندات بوت اَنت گُڑا ھمے تُربت ءِ سنگت ھم آھتگ اَت۔

روان اِنت