ڈاکٹر دین جان منی بابا

گپ ءُ ھبر سمّی دین جان

نبشتہ کار: منزور آدل
اولی: بھر

من نہ زان آں من گوں دین جان گوازینتگیں کجام ساھت ءُ یاداں لبزانی تہ ءَ زیبدار بہ کن آں، پرچا کہ گوں دین جان ءَ گوازینتگیں ھر ساھت وت کسّہ اَنت، من آ وھد کہ گوں دین جان ءَ گوازینتگ اَنت آ وھد ءَ من سک کسان بوتگ آں رند ءَ کہ چہ دین جان ءَ جتا بوت آں اے وھد ءَ ھم من اِنچو مزن نہ ات آں۔

بازیں یات بوتگ اَنت کہ وھد ءِ تینزیں رپتار ءَ گوں وت ءَ برُتگ اَنت آ منی مجگ ءَ چہ در اتکگ اَنت ءُ چو کاگد ءِ وڑ ءَ گوات ءَ گوں ھمسپر بوتگ اَنت ءُ چہ من ءَ گار اَنت،
بلکیں نوں من دین جان ءِ دروشم ءَ بےھیال کنان آں، بگندئے نوں من دین جان ءَ ءُ دین جان من ءَ بہ گندیت پجا میار ایت کہ اے منی جَنک اِنت ءُ من ھم آئی ءَ را شناس مہ کن آں کہ اے منی مھروانیں بابا جان اِنت، بلے انگت ءَ زھیرانی کتاب ءَ چُشیں باز یاد اَنت کہ آ چو نوک رُستگیں ٹپ ءَ انگت ھجگ اَنت ءُ ھر روچ وتی جتا جتائیں رنگے ءَ مئے دلانی سوزماناں گیش کنان انت۔۔

وھدیکہ من دین جان ءِ داتگیں ھمے یات ءُ زھیراں کپ آں گڑا اے یات ءُ زھیر پہ من چو کسّہ ءِ وڑ ءَ بنت یا چو واب ءِ دروشم ءَ چمّاں چُنڈ اَنت کہ ھود ءَ من گوں دین جان ءَ لھتیں ساھت گوازینتگ ات، ما گپ کنگ ءَ ات ایں کسّہ آرگ ءَ ات ایں، سیاست ءِ بابت ءَ گپ ءَ اتیں مشکے ءِ نلی ءِ مچّانی تہ ءَ کندگ ءَ اتیں، من واب گندگ ءَ آں پد ءَ وتی چمّاں پچ کن آں اد ءَ ھچّ نیست اِنت، یک تھاریں شپے ءُ نہ کٹوکیں لھتیں زھیر اَنت کہ کدی چہ دل ءُ مجگ ءَ آسر نہ بنت ءُ در نیا اَنت بس شپ ءُ روچ دردیگ کنگ ءَ اَنت آ یات یک زھگے ءِ یات اَنت آ یات یک بلوچی یے یات اَنت، آ یات یک گُھارے ءِ یات اَنت آ یات یک ماسے ءِ یات اَنت کہ پہ وتی سر ءِ ساھگ ءَ پہ ودار ءَ رھچار ات آ کدی کیت آ کدی واتر بیت آ کدی مئے لوگ ءِ نا سرجمی ءَ گوں وتی مھر ءَ سرجم کنت کدی اے رنجاناں شادمانی ءِ تہ ءَ مَٹّ کنت کدی مئے لوگ ءِ کوراسی ءَ رژن ءَ کنت کدی اے زھیرانی زندان ءَ چہ وتی دو جَنکّ ءُ وتی بچک ءُ وتی جنین ءَ آجو کنت ، ھمے ودار ءَ ھمے واب ءَ گوں زند ءِ روچ شپ ءُ شپ روچ بنت ماہ سال بنت۔

اگاں کسّے من ءَ دین جان ءِ بابت ءَ جُست بہ کنت یک بلوچے ءِ ھساب ءَ یک انسانے ءِ ھساب ءَ یک سیاسی نودربرے ءِ ھساب ءَ ، ھونی رشتھاں چے ابید من دین جان ءِ بابت ءَ ھمے گُش آں کہ ڈاکٹر دین جان یک بلاھیں ھستی یے واھنُد اِنت ڈاکٹر دین جان یک شرّیں ڈاکٹرے ءُ آئی ءَ گوں ھوار یک مزنیں زانتکارے ،یک مھروانیں دوستے ، یک مھروانیں سنگتے، آئی ءِ تہ ءَ سیاسی سنچ ءُ زانت سک باز ھست ءُ انسان دوستی ءُ راج دوستی ءَ ھم سرچکار انت۔۔۔

روان انِت