نبشتہ کار : سمّو بلوچ
من کہ اے ساھت ءَ وتی لوگ ءِ دیم ءَ ایوک ءُ تھنا نشتگاں وھد ءُ پاس شپ ءِ دہ ءُ نیم اِنت، من لوٹاں چیزے نبشتہ بہ کناں بلے انچش سما بیت کہ منی نبشتہ کنگ ءِ بود ءُ ھاٹیگ ءَ من ءَ دْروہ اِتگ۔
گپ چش اِنت کہ من زُھر ءَ چہ واب ء َ پاد اتک آب، من کہ گوانکو دست ءَ کت چاراں داں سنگتے ءَ اکسے دیم داتگ ، من کہ اکس پچ کت ، اکس ءِ سر ءَ نبشتگ ات پدائی *رزوان بلوچ پنّام ھمل* ، مں گوں اکس ءِ گندگ ءَ ھشک ءُ سیاه بوتاں گش ئے دنیا منی چمّاں تھار بوت۔
رزوان چوناھا مئے نزیکیں مردمے بوتگ ، آئی ءِ مئے گوما نند ءُ نیاد باز بوتگ ، رزوان مئے چمّانی دیم ءَ رستگ ءُ مزن بوتگ ، آئی ءِ باز یات ءُ کسّہ انت کہ گوں ما پشت کپتگ اَنت ۔
رزوان دوھزار سَے ءَ وتی بُنکی ھنکین دشت درابول کُھدہ سادک بازار ءَ واجہ مولابکش ءِ لوگ ءَ ودی بوتگ ، رزوان ءَ وتی کسانی ءِ بھرے ھمود ءَ گوازینتگ ، پد ءَ واجہ مولا بکش ءَ لّڈ اِتّگ ءُ پانوان ءَ شتگ ، ھمود ءَ جهمنند بوتگ ، بلے رزوان ءِ سیادی چہ ھنکین ءَ نہ سستگ ،آ مدام ھپتگ ءُ ماه ءُ سالانی سر ءَ وتی ھنکین ءَ شتگ ، کدی داں ماھے کدی ھپتگے ھمود ءَ جلِّ اتگ ۔
رزوان چہ کسانی ءَ تیز ءُ چالاک ات، رزوان رنگ ءُ دروشم ءَ زردچکیں ورناھے ات ، کد ءُ بالاد ءَ پٹک ءُ زیبا ات ، نرم ءُ کاشیں مید ئِے سیاه ءُ بز اَت اَنت، رزوان ءِ پت واجہ مولابکش سکیں گریب ءُ شریپیں مردمے کار ءُ مُز ئِے مزوری اِنت، پمشکا رزوان کہ بٹورُک بیت آئی ءَ پہ وتی پت ءِ کوپگانی سبک کنگ ءَ مزوری کت، آئی ءَ بندات ءَ دریا ءَ جانشوئی کت ءُ پد ءَ ناھدا بوت نو آئی ءِ لوگ ءِ جاور کمیں گھتر بوتگ ات اَنت ، پد ءَ ھمے نیام ءَ یکرندے گجرے ءِ تیرگواری ءَ رزوان ءِ پاد ءَ تیرے لگ اِت ،داں سَے ماه ءَ کراچی ءِ نادرھجاہ ءَ الاج ئِے کت، پد ءَ پانوان ءَ اتک ، شش ماه ءَ پد آ پد ءَ وتی مدامی وڑ ءَ وتی مزوری ءَ مشگول بوت۔
ھمے نیام ءَ رزوان جان زامات بوت ، پدا سانگ بھری بوت ئِے
رزوان ءِ سور ءِ تیاری بندات بیتگ ات انت ، مات ءُ گھار پہ رزوان ءِ سور ءَ مرادیگ ات انت ، بلے رزوان ءَ گوں وتی زمین ءَ مھر اَت ، رزوان انچوش زمین ءِ شیدائی اَت کہ آئی ءَ وتی دراھیں ارمان پہ زمین کربان کت اَنت ، مات ءُ پت ، گھار ءُ برات سیاد ءُ سنگت ، ھلک ءُ میتگ ، دراہ پہ زمین ءَ کربان ئِے کت اَنت ءُ کوہ ءَ شت ، مرچی بیست ءُ شش اگست ءَ بیلو ءَ دژمن ءِ مزنیں بنجل ءَ بمب ءُ ٹوپاں پُرّیں گاڑی یے میڑینت ءُ آپریشن ھیروپ ءِ بندات ئِے کت ءُ وتی نگرھیں جان پہ زمین ءَ کربان ئِے کت، پہ مدامی نمیران بوت
رزوان ناز ، رزوان بلوچ پنّام ھمل بوت ، مرچی پد ءَ ھمل ءِ جیھند ءِ پاگ ءِ چوڑ برزتر بوت انت ، مرچی گش ئے کہ یکبرے پد ءَ گراناز ءِ ھمل سالونک بوت مرچی پد ءَ زر وتی زرپھازاں پہ پھر نازینگ ءَ اِنت ، مرچی سالونکیں رزوان پہ زمین سالونک اِنت۔
امیت اِنت رزوان ءِ تپنگ چو ھمل مومن پنّام کلمیر ءِ تپنگ ءَ دژمن ءِ سینگ ءَ سک بیت ،داں امبرے ءَ دژمن ءَ بے واب کنت ، شھیدانی داتگیں دیمونی بے مز نه بنت۔
دوا اِنت گوں پاکیں ھاوند ءَ رزوان جان گوں وتی ھمراھاں بھشت ءَ بات۔
26 ، اگست، 2024
