نبشتہ; ھلیل بلوچ
دومی بھر
من مُریداں مُدام رھسراں نشتگ آں
بلکیں ھانل منی اچ دوار ءَ گْوز ایت
آئی ءِ جِند سکّ ءَ سنگینیں مردُمے بیت گُڑا سُبکّیں مردُماں چہ وتا گِستا دار ایت۔ آئی ءِ ھم تبکّیں میرو نامی سنگتے بیت کہ مُدام کارچ ءُ کُردمے گون ئِے بیت گُڑا آئی ءِ تَب گوں میرو ءَ ھچ میل نہ وارت۔ بس وتی وانگ ءَ کَنت ءُ گس ءَ رَوت۔
وھد ھمے وڑا گْوزان کَنت گُڑا آئرا شائری ءِ ھُبّ ءُ واھگ زُور اَنت۔ وتی تُنّ ءِ پْروشگ ءَ نسیر کُبدانی لبزانکی دیوان ءِ مجلساں بھر زُور ایت۔ پدا مُدام سُھب ءَ اسکول ءَ وانگ ءَ بیت بیگاہ ءَ الّم لبزانکی دیوان ءَ رَوت۔
یکبرے ھشت ءَ وانگ ءَ بیت اسکول ءِ نیمگ ءَ چہ ھاران ءِ کوھی دمگے ءَ پہ پکنک ءَ رَو اَنت۔ زمین ءِ آشک ءُ مُریدیں میرل گُڑا بلوچستان ءِ کوھاں بوسگ دَنت، دُرائیں اُستاد ءُ نودربر ھبکّہ ءُ ھیران بنت کہ اے چے کنگ ءَ اِنت۔۔ ھمدا اُستادے سوج کَنت کہ چے کنگ ءَ ئے گُڑا آ پسّو دَنت کہ مکّھیں مات ءِ کلاتاں بوسگ دیگ ءَ آں ءُ شئیرے گُشیت
کوہ اَنت بلوچانی کلات
کسّی پِت ءِ میراس نہ اَنت
نسیر کُبدانی لبزانکی دیوان ءَ ھرکسے پہ وتا شائری ءِ نامے زُور ایت کسّے وت ءَ ھسرت کنت، کسّے شاد، کسّے مھر گُڑا آ چہ سباہ دشتیاری سان زُور ایت ءُ وتی شائری ءِ نام ءَ سَباہ کَنت۔ “نسار سَباہ”
من ھندو مھلّہ اسکول ءَ وانگ ءَ اِت آں 2007 ءَ نزاناں چونیں پروگرامے اَت بلے من ءَ ھمینکہ یات کئیت کہ ما لھتیں سنگت بیگاہ ءِ وھد ءَ نسیر کُبدانی لبزانکی دیوان ءَ شُت ایں۔ گُڑا ھمودا من نسار سَباہ را دیست۔ چوناھا منی آدت اِنت کہ من سکّ دیر ءَ گوں مردُماں نزّیک باں بلے سَباہ ءِ ھون پورا گُش ئے دِل ءِ تہ ءَ پُترت۔
سکّ ءَ نرم مزاج اَت، دَپ ئِے چہ کندگ ءَ پُرّ اَت، آئی ءِ گَپّانی تہ ءَ پورا گُش ئے جادو مان اَت، میزان میزان ءَ وتی گَپّاں ئِے جَت ءُ پَدا مکمل بے تواری ءَ دومی ءِ گَپّان ئِے گوش داشت۔
من ھمے اولی گندگ ءَ چہ آئی ءَ سکّ ءَ سانمند بوت آں۔۔
اے وھد ءَ ما چہ پِگر ءُ سَسّا ءَ زبھر اِت ایں پہ وتی شوک ءَ زھیر شاہ ءِ ھمراہ اِت ایں، برائے نام بی ایس او آزاد ءِ ممبر اِت ایں ءُ سَباہ بلوچستان ءِ آزادی ءِ منّوگر بلے بی ایس او مھی الدین ءِ ممبر اَت۔۔ (آئی ءِ بی ایس او (م) ءِ ممبر بُوّگ تنیگتہ منی پھم ءَ نئیت)
2008 ءَ من ھم نسیر کبدانی لبزانکی دیوان ءَ روگ بنا کُرت، بلے تھنا پہ وھدتیلی ءَ چہ لبزانک ءَ من دور اِت آں۔ گُڑا گوں سَباہ ءَ من سکّ نزّیک بوت آں۔۔۔
روان اِنت
