آجوئی جنز ءِ پڑ ءَ بی این ایم ءِ کرد

نبشتہ کار: سرباز وپا

چوش کہ راجی آجوئی جنز بہ بیت یا کہ چاگرد ءِ دیمروئی اود ءَ راجمستری گل یا پارٹیانی مزنیں کرد بنت۔ چی ءَ کہ گل ءُ پارٹی ھما راھبند ءِ نام اَنت کہ  یکیں مول ءِ مردماں یکجاہ کن اَنت ءُ آیانی ھیلکاری ءَ کن اَنت۔ راجمستری ادارھانی تہ ءَ درسیں باسک ءُ سروکانی گپ پہ دلجمی گوشدارگ بنت ءُ ادارہ پہ وت ءَ ھمک وھد ءَ نوک نوکیں سروک ودی کن اَنت۔
ھمے پیم ءَ بلوچستان ءَ بلوچ راجی آجوئی جنز ءِ پڑ ءَ بی این ایم یک راجمستری پارٹی یے کہ گوستگیں بیست سال اِنت پہ بلوچستان ءِآجوئی ءَ گوں مھکمی ءَ جھد کنگ ءُ دیم ءَ جنزاں اِنت۔

وھدیکہ چہ بلوچستان نیشنل موومنٹ ءَ درکپگ ءَ شھید واجہ گلام مھمد ءِ سروکی ءَ 30 اپریل 2004 ءَ شال ءَ ایوب اسٹیڈیم ءَ اولی راجمانی پتر بندات بیت ءُ داں 2 مئی ءَ آسر ءَ بیت۔ چہ ھما روچ ءَ پد بی این ایم  پہ بلوچستان ءِ آجوئی ءِ اوگام ءِ سر ءَ یکشل ءَ کار ءَ اِنت۔
پہ بلوچ راجی جنز ءُ بی این ءِ مھکم کنگ ءَ بی این ایم ءِ سروک ءُ باسکانی چونیں ھم کردے بوتگ گڑا مرچی آئی مُز بلوچ راج ءِ دیم ءَ اِنت کہ آیاں گوں چونیں جپاکشی ءُ جاوراں  بلوچ راجی پارٹی گوں مھمکی ءَ برجاہ داشتگ۔

من ءَ چاردہ سال ءَ گیش پانزہ سال نزیک اِنت کہ من گوں بی این ایم ءَ کار کنگ ءَ آں اے میان ءَ من چہ بی این ایم ءِ سروکاں بے مٹیں شری سکا باز  دیستگ ، بلے چہ آیاں من ءَ دو چیز سکا دوست بوتگ۔ یکے ھمک کار اِش چہ پرمائش کنگ ءَ ابید گوں وتی جند ءَ بندات اِش کرتگ ءُ دومی وتی باسکان ءَ ھمے وت ماں وتیں بے نپیں ڈوبارگانی بھر بوگ اِش نہ اِشتگ اَنت۔ آیانی گپ مدام ھمے بوتگ اَنت کہ چہ ٹانگ چکوکائی ءَ گھتر اِنت کہ باسک تھنا وتی کرد ءَ پیش بدار اَنت۔
چہ بی این ایم ءِ بنجاھی رھشون واجہ گلام مھمد، لالا منیر، شھید ڈاکٹر منان جان ءَ بگر دانکہ چئیرمین ھلیل ءُ ڈاکٹر نسیم ءَ بیا ھمک وھد ءَ پہ راجی جنز ءُ بی این ایم ءَ مھکم کنگ ءَ کارانی تہ ءَ یک شیدائی یے گندگ بوتگ۔ پمیشکا پہ راجی آجوئی ءِ جنز ءَ دیم ءَ برگ ءَ بی این ایم ءِ باسکانی تہ ءَ جپاکشی ءِ یک درچے گندگ بیت۔

بی این ایم بلوچ سرڈگار ءِ چہ زوراک ءَ آجوئی لوٹوکیں پارٹی یے، اے گپ مروچی تچک اِنت کہ رورگریں پاکستان ءِ نیمگ ءَ پہ بی این ایم ءِ دارگ ءَ بے جاریں زوراکی یے برجاہ اِنت۔ ھمے درچ ءَ بی این ایم ءِ بنجاھی سروکاں ھوار داں باسکاں سکا باز شھید ءُ زور بیگواہ کنگ بوتگ اَنت۔ پمیشکا بی این ایم مروچی بلوچستان ءِ شھر ءُ میتگاں وتی جند ءِ نام ءَ کار کرت نہ کنت، بلے آئی جھد یک چیریں دابے ءَ شریں وڑے ءَ برجاہ اِنت۔

چہ بلوچستان ءَ ابید جھان ءِ بازیں ڈیھانی تہ ءَ جتائیں زھرشانی سے روچی سرپدی پروگرام  بہ بنت یا گوں جتائیں ڈیھانی واکدار، مردمی ھکانی گل ءُ کارکنانی گون ءَ گند ءُ نند کنگ ءِ ھواری ءَ گوں رسانکدری کاراں شریں وڑے ءَ دلگوش اِنت۔ چہ ھمے جپاکشیانی سوب ءَ اے گپ ءَ کس رد کرت نہ کنت کہ بی این ایم بلو چ آجوئی لوٹوکیں سیاسی پارٹیانی تہ ءَ بلوچ ءِ مستریں پارٹی زانگ بیت۔ مارا انگت چہ بی این ایم ءِ رھشون ءُ باسکاں ھمے اوست اِنت کہ بی این ایم ءَ چد ءُ گیش مھکم ءُ شریں دابے ءَ دیم ءَ بر اَنت۔