نبشتہ کار این آر بلوچ
اگاں ما اِے بابت ءَ بہ جیڑ ایں کِہ مئے زند پرچی ءَ ناسرجم اِنت؟ مئے زند پرچی ءَ پہ واری ءُ بزّگی گْوز ایت مئے زند ءِ تہ ءَ پرچی ءَ ھر روچ وڑ وڑیں گم ءُ جنجال کیت؟ مئے بلوچ راج ءِ جیڑہ جتا اَنت مئے راج ءِ مردُم پہ وانگ ءُ زانگ ءَ ھچ نہ جیڑ اَنت مئے پیر ءُ کماشانی مول ءُ مراد شْوانگی اِنت آ مُدام ھمے گوش اَنت منی چُک مزن بہ بیت پس بہ چارین ایت ما وت بچار اِیں کہ جھان ءِ مھلوک پرچی ءَ دیم ءَ کِنزان انت ما چے ءَ پُشت ءَ کنزان ایں؟ ما بے اِلم ءُ کم زانت ایں۔
گپ چُش اِنت کہ اگاں یک میتگے ءِ تَہ ءَ یک مردمے بہ وان اِیت گُڑا آ دُراھیں میتگ ءِ مردماں بدل کُت کنت اگاں دراھیں راج بہ وان اِیت آ دراھیں راج ءَ بدل کُت کنت مئے نا سرجمی ءِ مستریں سبب مئے راج ءِ تَہ کم زانتی اِنت، آدگہ مُلکاں ھر لوگ ءِ تہ ءَ دُراھیں مردُم وانندگ اَنت بلے مئے راج ءِ تَہ ءَ وانندگانی کساس سک کم اِنت کہ آ وتئی میتگ ءِ مردُماں پہ وانگ ءَ سکّین بہ ین اَنت۔ اگاں یک راجے دیم ءَ روگ لوٹ ایت آ چہ دُرستاں پیسر آ راج ءَ اِلم ءُ زانت در بر لوٹ ایت۔
انچو کہ ڈاکٹر ناگمان گوش ایت راج ءَ زندگ کنگ لوٹ ئے چہ دُرستاں پیسر آئی ءِ زُبان وانگ ءُ زندگ دارگ لوٹ ایت زُبان وت دیم ءَ چوں کنزیت زُبان ھما وھد ءَ دیم ءَ روت کِہ دُراھیں مُردم ھمدست بہ بنت ۔ بلے ما اِے وھد ءَ انگت ءَ اے سرپد نہ ایں مئے زند ناسرجم اِنت۔ مئے زند ءِ تَہ ءَ چَہ نہ وانندگی ءِ سبب ءَ ھر کس نشہ ءِ آماچ اِنت پمیشکا ما پُشت ءَ کنزان ایں،
مئے راجی زُبان بیگواہ کنگ بوئگ ءَ اِنت آئی ءِ جاہ ءَ انگریز ءُ ھندی ھوار کنگ بوئگ ءَ اَنت مئے راج ءِ تَہ ءَ سک باز وانندہ ھست بلے وتی زُبان ءُ وتی راج ءِ دیم ءَ برگ ءَ کس جُھد نہ کنت ما ھمے گُشگ لوٹ ایں ما بوان ایں وتی نہ سرجمیں زند ءَ چَہ جنجالاں بہ کش ایں ءُ وتی پدمنتگیں راج ءَ جوانیں زندمانے بہ دے ایں۔
