بلوچ راجی مچی

 نبشتہ کار:ڈاکٹر شاہ مھمد مری

رجانک کار: سرباز وپا

ڈاکٹر ماہ رنگ ءُ آئی بلوچ یکجھتی کمیٹی ءَ سکا گوں دورچاری ءَ دو گچینیں کار کرتگ۔

اولی: راجی پارست ءَ درسیں بلوچانی یکجاھی ءِ گمان

دومی: پہ اے مچی ءَ گوادر ءِ گچین

بلوچ راجی مچی یا راجی مچی اسل ءَ یوسپ ازیز مگسی ءُ ابدالزیز کرد ءِ نیمگ ءَبرجاہ داشتگیں مچیانی رندگیری اِنت کہ 1932 ءَ ھیدر آباد ءُ 1933 ءَ جیکب آباد ءَ برجم دارگ بوتگ اَنت۔ اے راجی مچی گوستانک ءَ “آل انڈیا بلوچ کانپریس ” ءِ نام ءَ زانگ بیت۔ سد سال ءِ گوزگ ءَ پد ھم ھما کارانی دوبر زندگ کنگ جوانیں گپے۔

مردم چنچو گیش مچ بہ بہ اِنت ھمنچو گھتر اِنت۔ اے پہ بلوچ چاگرد، بلوچ راج ءُ ھواریں سیاست ءَ ھم، اے پمیشکا گچین اِنت کہ سکا مزنیں بلوچستان روکپت، رو درآتک، زربار ءُ گوریچانی بلوچ یک راھبندے ءَ یکجاہ کرتگ اَنت۔ داں مرچی ءَ بلوچ ھندی پارست ءَ  وتی وتی ٹکی ھنداں سرگرمیانی بھر بوتگ اَنت۔  آ یکے دومی ءِ گون ءَ تیوک ءَ  پہ زمینی کچ ءُ کساس ءَ دور   نہ بوتگ اَنت بلکیں سیاسی ءُ مالی پارست ءَ  ھم ھمگرنچی کم بوتگ۔  بلوچ یکجھتی کمیٹی ءَ سرجمیں بلوچ یک راجے ءِ بستار ءَیکجاہ کرتگ اَنت۔ درسیں ٹکی سیمسر پروشتگ اَنت، درسیں ھندی دوری ھلاس کرتگ اَنت ءُ گوں سوبمندی ءَ سرجمیں راج یکجاہ کرتگ۔ پہ اے کار ءَ مردماں شریں وڑے ءَ بھر زرتگ۔

روکپت ءَ کوہ ء سلیمان ءِ بلوچاں دراجکشیں سپرے کرتگ ءُ چہ سرکاری اڑانداں ابید ھزاراں میل دور روکپتی کوہ باتیل ءَ سربوگ ءِ رنج پہ رزا اوپار کرتگ اَنت۔  چہ دور ڈیرہ گازی ھان ءَ بزدار بلوچاں کھیتران ءُمری ھنداں گوستگ ءُ سبی ءُ ڈاڈر ءَ روان ءَ دشت گوازینتگ ءُ شال ءَ سر بوتگ اَنت۔  چہ اود ءَ مستونگ،منگوچر، ھزدار ءُ کیچ ءَ گوستگ ءُ گوادرءَ روگی اِنت۔ یک اوگامے ءِ پارست، جوزگے ءِ سر ءَ یک پجارے ءِ بنیاد ءَ ستا کنگ نہ بیت اے دھک ءِمستریں منانک اِنت۔ اے مزنیں راجی لس مردمی کار ءِ دیم ءَ نہ سردار اڑاند ودی کرت کنت، نہ ٹکی پھرمندانی گون ءَ دارگ بوت ءُ نہ زمینی دوری ءُ کچ ءُ کساساں اے جوزگ ءِ تہ ءَ کمی آورتگ۔ درسیں وتن یک بوت، بلوچ گوں مزنیں بلوچی پجار ءَ یک بوت۔

بلکیں سد سال ءَ پد دیمروئی کرتگیں جھان ءَ اے گپ ءَ ارزیشت مہ بیت بلے مرچی اے چاگرد ءِ پژدر ءَ اے گپ ارزیشت دار ایت کہ درسیں ٹکی بلوچ، جنیانی سروکی ءِ روگ ءَ جاڑیگ بوتگ اَنت۔  آئی جار ءَ وت زورگرءُ زوراکیں سرکارءِ اوست داروک پہ تیرانی سر کنگ ءَ جاڑیگ بوت اَنت۔

ھما جنیں کہ آیانی امر انگت ءَ چل سال نہ اِنتءُ نہ اے چاگرد ءِھد ءُ بنیاد ھان ءُ سردار زادگ اَنت۔  ھما جنین کہ آیانی پلگاریں سیاسی لیکہ ءَ اسپیت ریش ھمایانی گون ءَ روگ ءَ جاڑیگ کرتگ اَنت۔  تجربہ کار ءُ مزن مزنیں ڈگری  گپتگیں مردم پہ سروکی ءِ منگ ءَ گوں ھندگ ءُ رزا جاڑیگ بوتگ اَنت۔ سیاسی گپانی تہ ءَ ھوار بیت کہ جنین سیاسی کارکنانی سروکی ءَ شرک ءُپالانی تہ ءِمانگیشتگیں بلوچ، پیر ءُورنا، مرد ءُ جنین، ٹکی ءُ شھری، ماھیگیر ءُ مڈل کلاس بلوچ ھمے وڑ ءَچست بوتگیں زرمبشت ءَ وت ماں وت یکجاہ بوتگ اَنت۔  مئے ھمساھگیں راجان اے گمان نہ کرتگ۔

پہ اے مچی ءَ گوادر ءِ گچین کنگ سیاسی چستءُ ایراں یک کمال ءِ گپے اِنت۔ ھما گوادر آ چنچو بر ءَ پہ مدامی بھا بوتگ،سی یا پہ چل سالءَ رھن کنگ بوتگ۔  آ گوادرءِ دوبر دست ءَ کنگ، اے واھند بزاں بلوچ ءِ دیم ءَ آرگ ءُ اے باروا سوڑگ ءِ بودشت بلوچ ءِ کنگ سیاست ءِ تہ ءَ مزنیں کمالے نہ اِنت؟

مچی ءِ جاہ ءَ   گوادر گچین کنگ بزاں گوادر شھر ءِ جیڑہ نہ اِنت، اے سرجمیں بلوچ تیاب ءُدریا ءِ واھندی ءِ جیڑہ اِنت۔ اے وڑیں ارزیشت داریں بلوچ ھند کہ اود ءَ درزنے ءَ گیش بندرگاہ اَنت، اے انگریزاں پہ وتی زورگپتی مول ءِ پارست ءَ چنچو ڈیھانی گون ءَ بھر ءُبانگ کرتگ۔  اے سرجمیں تیاب ءُ زری ھند ءِ سر ءَ سد سال گوزگ ءَ پد  تچکیں وڑے ءَ بلوچ ءِ میراس ءِ اوگام ءِ سر ءَ درسں بلوچانی یکجاہ کنگ سٹریجی ءُ ٹکٹکس ءِ ھنرمندی ءِ آسر اِنت۔

گوادر یک شھر ءُ بندرگاھے نہ اِنت، اے سرجمیں دمگ ءِ جھلیں زر ءِ گچینیں بندرگاہ اِنت۔  اے ” ڈیپ ” سی پورٹ ءَ چہ مزنیں ھرچ ءُ درچ ءَ ابید مزنیں باپاری زری جھاز آتک کن اَنت۔

زِر میان استمان ءِ باپاری،روگ ءُ آھگ ءِ دُرساں مستریں پارست اِنت۔پمیشکا گوادر پہ نوکیں جھان ءَ بلوچ ءِ در اِنت۔

ھمیشی سروکی ءَ بلوچستان ءَ گوں جھان ءَ لین دین کنگی اِنت۔ ھمے وڑ ءَ ماہ رنگ ءَ نوکیں جھان ءَ بلوچ  ءِ گپ بندات کرتگ۔اے چنچو زیبائیں ھیالے!

گْوادر ماھیگیرانی بزاں جپاکشانی ھند اِنت۔ اد  ءَ مچی  ءِ برجم دارگ جپاکشانی مزن شانی ءِ منگ ءُ ایشی سروکی ءَ روگ ءِ پیش کنگ اِنت۔ گْوادر ءَ ھچ وڑیں روا دار ساڑی نہ اَنت۔ اے دگہ ھان ءُ سردار ءُ شھزادگے ءِ مالیات ءِ ھند نہ اِنت۔ اے آجوئیں مردمانی ھند اِنت، اد ءَ سیاہ ءُ اسپیت، ھزگار، نیزگار ءُ وتگڑیں اسل ءُ نکل  ءِ پرک ءُ درک نیست۔  ھمے گْوادری چاگرد ھواری ءِ پارست ءَ بلوچ چاگرد ءِ باندات اِنت۔ ایشی راستی  ءَ سرجمیں بلوچستان ءَ آشنا کنگ بلوچ یکجھتی کمیٹی ءِ ساچشتی لیکہ ءِ برورد اِنت۔

اوست ھمیش اَت اے مچی ءِ پہ بے سوب کنگ ءَ بازیں زوراکی کنگ بوت۔ درسیں شھدگ سرکار ءِ نیمگ ءَ بند کنگ بوت اَنت۔ کاروانانی سر ءَ سکا زوراکی کنگ بوت، مچی ءَ ھوار بیوکیں کاروانانی سر ءَ تچکی ءَ تیرگواری ءَ شھید ءُ ٹپی کنگ بوت اَنت۔ پہ آیانی درمان ءَ  نادراھجاہ ءَ برگ ءِ راہ بند کنگ بوت اَنت۔ جولائی ءِ ترندیں گرم ءَ چہ ساھگ ءُ آپ ءَ زبھر کنگ بوت اَنت۔  گوں تیزی ءَ دزگیر کنگ بوت اَنت۔ بے سر ءُ پادیں بھتام جنگ بوت۔

سرا سر ناھکی:

پمیشکا کہ مچی آجوئی یک راھبندی ھکے، چونیں ھم شھری یے ءَ  چہ ایشی  ءَ زبھر کرت نہ کن  ئے۔

گوشتانکی ءُ نبشتھی آجوئی مردم ءِ یک بنیادی  ھکے۔ اے ھک پلگ نہ بیت۔

اے چوشیں چیریں  ءُ زمین  ءِ چیر ءِ سرگرمی یے نہ اِنت۔ ایشی مول ھم چیر نہ اِنت۔ چونیں ھم نیمونے ءَ تو ایشی سرگرمیاں درکانودی لیک اِت نہ کن  ئے۔

چہ درساں ارزیشتداریں گپ ایش اِنت کہ اے جنگی کاروائی یے نہ اِنت، بلکیں پر ایمنیں سیاسی پرکاری یے۔ ایشی تہ ءَ دگہ ھچ وڑیں بمب ءُ بارود ءِ گپ نیست اَت۔ لس مردمانی یک مزنیں مچی یے ایشی لوٹ ھست اَنت، لیکھے ھست۔ اوگام ھست، بینر ءُ پوسٹر ھست اَنت۔ راجی سوت ءُ گوشتانک ھست اَنت۔ ھزارانی کچ  ءَ مرد ءُ جنین ھمے پر ایمنیں زھرشانی ءِ ناھکیں زوراکی ءِ ھچ وڑیں نیمون جوڑ کنگی نہ اَت۔

یک سیاسی جیڑھے گوں سیاسی پارست ءَ گیش ءُ گیوار کنگ بیت۔

سیاسی جیڑہ ءِ گیش ءُ گیوار گوں جنگ ءَ ھچ وڑ ءَ  نہ بیت۔ چونیں جیڑھے ءِ  سیاسی پارست ءَ گیش ءُ گیوار کنگ پہ گپ ءُ تران ءِ راہ ءِ پچ کنگ ءَ بیت۔ گپ ءُ تران  ءَ ابید بلوچستان ءِ جیڑہ ءِ گیش ءُ گیوار ءِ  دگہ  راہ نیست۔ مپت ءُ ناھک ءَ داں ھزار سال  ءَ جنگ بہ کن۔