مردم وھدے ٹکنیکل چیزاں نہ زانت ، زبان ءِ سیاھگ ءُ راھبند ءَ پوہ نہ بیت ، من اتگیں نبشتھی راھبند ءَ ڈالچار کنت ، گڑا جیڑہ ودی بیت۔ چوش کہ ملٹی لینگوئج کی بورڈ ءِ بلوچی کلیتاک ھچ درد نہ وارت ، اردو پہ بلوچی نبیسگ ءَ شرتر ءُ گیگ تر اِنت۔ کلیتاک ءِ جوڑ کنگ چوشیں مزنیں کارے نہ اِنت بلے کلیتاک ءَ دست ءِ ریچ بیگ یا مزنیں کمپنیانی کلیتاکانی تہ ءَ بلوچی ءَ جاہ دیگ ، بلوچی زبان ءِ لوٹانی پد ءَ اے کار شر اَنت۔
چوش کہ پہ ونڈوز ءَ من کلیتاکے جوڑ کرتگ دگہ نوکیں آب مان نہ کرتگ بلکیں ‘ ءِ ، ءُ ، ءَ ، ئِے ، اَنت ، اِنت ، اَت ، اٍت، ئے ‘ چہ ایشاں ھر یکے یک بٹنے ءِ سر ءَ نبیسگ بیت ، اے بلوچی زبان ءَ سک باز کارمرد بہ اَنت۔ ایشانی یکیں بٹن ءَ نبسیگ ءَ آسانی ودی بیت، نبسیگ زیت بیت۔
نی ملٹی لینگوئج کی بورڈ ءَ بہ چار ایشاں کے بلوچی ءَ کارمرد کنت :
ۆ ئ ێ إ ې ۏ
من ایشاں نبشتہ کرت ، ایشاں من ءَ پسو ھم دات، پد ءَ من جیڑ ات کہ من ایشاں مٹ بہ کنائین آں دگرے چست بیت ءُ ایشاں رد کنت ءُ وتی رنگیں کلیتاکے ساز ایت ، اے کار باید ادارھانی نیمگ ءَ چارگ بہ بہ اَنت۔
مئے لھتے مردماں نشتگ ءُ ‘ نوکیں آب ‘ جوڑ کرتگ ، آیاں کس زیرگ ءَ نہ اِنت، منگ نہ بیتگ اَنت ، اوپسالا زانشتجاہ جاھے ایش کہ پہ ما شرتریں راہ بہ گیشین ایت مئے نبشتہ کاراں بھر کنگ ءَ اِنت۔ لھتے توانمندیں مردم ھمے پوڑی ءَ کہ چہ زانشتجاہ ءَ رس ایت وتی واھگ ءِ پد ءَ کارمرد کنگ ءَ اِنت ، چہ آیانی کرتگیں کاراں بلوچ نبشتہ کار ، زبانزانت ایمن نہ اَنت ءُ آ وت ھم روچے رنگے ءَ نبیس اَنت برے رومن برے تازی آباں ٹک جنگ۔
اے انچیں سرھال اَنت کہ ایشانی سر ءَ دلجمی ءَ تْران لوٹ ایت ، کسے وتی ھلک ءُ میتگی گالوار ءَ یلو کنگ ءَ ساڑی مہ بیت آ بلوچی ءَ یکسانیں سیاھگے دات نہ کنت ، کسے مہ زانت کہ چچی زبان نبشتہ نہ بیت آ چوں بلوچی لیکوڑ ءُ سیاھگ ءِ باندات ءَ کارے شر کرت کنت ، منی نز ءَ کمو شاھگان بیگی اِنت۔
من وتی بنرھبندی سوجانی تہ ءَ سیاھگ ءِ یکسان کنگ ءَ نوکیں آبانی سوج داتگ من زان آں کہ خ ءُ ف ءِ زیرگ ءَ بلوچی سیاھگ ءِ جیڑہ نہ گیش ایت۔جیڑہ ایش اِنت : خ ۔ ک ، پ ۔ ف، ش ۔ چ ءُ د۔ ذ ءَ ما جاہ پہ جاھی کارمرد کن ایں یا چہ ایشاں ما یکے یل بہ دے ایں ، چوش کہ انی ما انچوش کرتگ یا پشتو زبان ءِ پیم ءَ انچیں نوکیں کارست / آب بہ ساز ایں کہ ھمک گالوار ءِ مردم اش وتی رنگ ءَ بہ وان اَنت بلے داں ادارہ ، نبشتہ کار ، شنگکار آیاں مہ من اَنت ، آیاں چہ وت دیم ءَ آرگ مردماں بر کنت ، بھر کنت۔ جیڑہ ءِ گیشنگ ءَ جھندم نوکتریں جیڑہ ودی کنت۔
گوں وتمنی ءَ ھچ کار شرنہ بیتگ ءُ ناں کہ بیت ، اوپار ءُ ھم آھنگی لوٹ ایت۔
ھمے پیم گوگل رجانک باید شاھگان بہ بیت کس آئی ءَ پہ وتی نہ من اتگیں نوکیں آب یا راھبندے ءِ زور منارینگ ءَ کارمرد مہ کنت ، چوش کہ بیت گڑا زبان ءَ سیت نہ رس ایت ، مئے تہ ءَ کس کسملیکی مہ کنت ، چوش کنگ ءَ کس باج نہ بارت ما تاوان کن ایں ، بلوچی زبان تاوان کنت۔
