انچوش کہ شما سرپد اِت ما پرچا وانگ ءَ اِیں ، چی ءَ کہ لھتیں گْوش اَنت ما پہ وتی واستا وانگ ءَ اِیں۔ من چو بازیں سنگتے دیستگ ءُ جست کرتگ کہ شما بہ وان اِت پہ وتی بزگیں راج ءَ چے کن اِت ؟ ، گڑا چر اے سنگتاں لھتے ءَ گْوشگ کہ ما وان اِیں ڈاکٹر جوڑ بہ اِیں۔
اے راستے کہ مئے راج ءِ تہ ءَ وانگ ءُ زانگ سک کم اِنت ، بلے کم پرچا ؟ کم پرے واستا کہ لھتیں انچیں سنگت ھست چہ وتی گریبی ءُ لاچاری ءَ دیمتر ءَ وانگجاھاں شت نہ کن اَنت۔ بلے شمئے پت شمارا زر دئے اَنت کہ برو اِت دگہ وانگجاھاں بہ وان اِت۔ چوش نہ اِنت کہ دگہ جاھاں پہ وانگ ءَ شت ئے ءُ وتی ماتی زبان نہ ونت ءُ بے ھیال کت ، مارا وتی ماتی زبان الم وانگی اِنت۔
ھمے رنگ ءَ من لھتیں انچیں سنگت دیستگ کہ پوسٹ ءِ سر ءَ انچیں بلوچی کمنٹ دئے اَنت ، مردم آیانی وانگ ءَ ھم نہ زانت۔ اے نادْراھی پرے ھاتر ءَ کہ وتی ماتی زبان ءِ دربرگ ، وانگ ءُ زانگ ءِ جھد نہ کن اَنت۔ پہ وانگ ءَ دگہ ملکاں رو اَنت ، زر ھرچ کن اَنت ، بلے وتی زبان گوانکو ءِ تہ ءَ ھم وانگ نہ بیت۔ انچو سما بیت کہ وتی زبان اِش شموشتگ ءُ دگرے زبان ءَ کلوہ کن اَنت۔ انوں ما بہ چار اَیں انگریزی مئے ماتی زبان نہ اِنت ، بلے ما ایشی ءِ سر ءَ انچو کپتگ اِیں کہ بینگ مکسک ءَ گز دیست۔ ھمے انگریزی ءِ واستا ما چینچو زر ھرچ کن اِیں ، بائد اِنت کہ ما پیسر ءَ موبائلانی تہ ءَ وتی ماتی زبان ءِ وانگ ءِ جھد ءَ ھم برجاہ بہ کن اِیں۔ پرچا کہ ما بلوچ ءُ مئے زبان بلوچی اِنت ، مئے پوشاک بلوچی اِنت۔
ھما سنگت کہ یونیورسٹی ، کالج ءُ اسکولاں وانگ ءَ اَنت ، گوں ھمایاں منی دزبندی اِنت کہ وتی ماتی زبان ءَ بہ وان اِت۔ نبشتہ بہ کن اِت۔ الم نہ اِنت ایوک ءَ بلوچی کتاب وانگ زانت بس بزاں من وانگ زانت ، ءُ لھتیں سنگت انچوش گْوش ایت کہ من بلوچی وانگ زانت بس اِنت۔ چو نہ زانت کہ بلوچی آب چنکس اَنت ، تھنا وانگ نہ اِنت نبشتہ کنگ ءِ جھد ھم بہ کن اِت۔
انوں انٹرنیٹ ءِ زمانگ اِنت وتی ماتی زبان ءِ وانگ ءُ نبشتہ کنگ ءِ جھد ءَ بہ کن اِت۔ گیشتر نبشتہ بہ کن اِت ، اگاں چینچو وھد ءِ پکار بہ بیت۔ من وت چوشیں زانتکارے نہ آں ، بلے منی کلوھے پہ نودربراں کہ وتی ماتی زبان ءَ بہ وان اِت۔ اگاں ما وتی زبان ءَ مہ وان اِیں دگہ کسے نہ نئیت ءُ مارا نہ گْوش اِیت کہ وتی ماتی زبان ءَ بہ وان اِت ءُ دیمروئی بہ کن اِت۔
بلوچ راج ءُ بلوچی زبان زندگ بات۔
