جاوراں چاران ءُ چاگرد ءَ وانان من ءَ استاد سنگت آگا آبد شاہ بلوچ ءِ یات اتک کہ آئی جھد ءُ کارانی سر ءَ کسانیں چمشانکے بہ دئے آں۔ اے درگت ءَ من گْوش آں کہ سنگت آبد شاہ بلوچ پہ دائمی زندگ اِنت ، پرچا کہ آئی پگر زندگ اِنت۔ ءُ آ یک مھروانیں سنگتے اَت ، پہ بلوچ راج ءَ روژنائیں چراگے اَت۔ آگا گوں وتی راجدوستی ءُ زانوگری ءَ کج ءَ کہ بوتیں آئی پگر بلوچ سرڈگار اَت ، راجی ھر جنجال ءُ مشکلے بوتیں آئی وت ءَ را ھور ءُ ھوار کرت۔ رودرآتک بوتیں یا روبرکت ءُ گوریچان شپ ءُ روچ جھد ءَ گلائیش اَت۔ پہ مکھیں وتن ءِ آجوئی ءَ شے مرید ءُ
دیوانگ اَت۔
آگا مدام گوں کامریڈاں پہ آیوکیں روچانی واستا شور ءُ سلاہ اَت کہ چوں وتی ایردستیں راج ءَ چہ زالمیں پاکستان ءِ گلامی ءَ بہ رکیناں۔ شال ءُ نوشکی ، کراچی ءُ پنجگور یا مستونگ ءُ تربت بوتیں آئی توار ، کارانی نشان گندگ ءَ اتک اَنت کہ بلوچستان ءِ ھر ھند ءَ آگا پہ وتی گلامیں راج ءِ کمک ءَ ھم کوپگ ءُ ھمدست اَت۔ پرچا کہ سنگت شھید آگا آبد شاہ گلامی ءِ دردانی مارشت ءَ آشنائیں راجی جھدکارے اَت ، پمیشکا آئی سرکل ءُ دیوان ءِ سر ءُ سوجاں باسکاناں پہ راجی جز ءِ مھکم کنگ ءُ دیمروئی دیگ ءَ آسن ءُ تمرد جوڑ کرتگ اَت۔
مرچی آگاہ آبد شاہ رنگیں سنگتانی کربانیاں بلوچ راج یک جتائیں نام ءُ ارزشتے داتگ ، پرچا کہ اے رتکگیں ھونانی مز راجی آجوئی اِنت۔ بلوچستان ءِ کنڈ کنڈ ءَ اے ھونانی ملپداں بھار سبز اَنت ءُ ڈیھ چو بھشت ءَ سینگار بیت۔
دومی آگا آبد شاہ ءِ زانت بکشیں گوشتانکاں کہ گیر کارئے ، دل پد ءَ گْوست ءِ ترانگاں سر ءُ چیر بیت۔ آئی جھد ءُ جپا ، پہ راجی جز ءَ تگ ءُ تاچ ، ساہ ءُ سر ءِ دیمونی وت یک گْوستانکے کہ مارا وانگ ءُ زانگ لوٹ اِیت۔ پمیشکا دژمن ءَ را اوپار نہ بوت ءُ آئی آبد جان گوں ماسٹر واجہ سپیر ءُ ماسٹر واجہ ستار ءِ ھمراھی ءَ چست کرت اَنت آیانی زانگولیں کنٹ مارا سوگات کرت اَنت ، بلے ھما زانگولیں جونانی وشیں بوہ مرچی ھم پنجگور ءَ ھوار تانسریں بلوچستان ءِ دمک ءُ دراں شنگ ءُ تالان۔
دژمن پرے واستا آسیگ اَت کہ سنگت آگا آبد شاہ بلوچ لیکھی سنگتانی زرد ءَ گوں وتی زانت ءُ زانگ ءَ بلوچ ءِ راجدپتر ءَ نبیسگ اَت۔ ءُ سنگت آبد جان ءَ اے ھبر گوں وتی نمیرانیں سنگتاں سابت کرت کہ گلزمین تو منی مات ءُ من تئی بچ آں ، پہ تئی پاسپانی ءَ سر ءُ ارواہ ءِ دیمونی منی راجی زمہ واری ءُ پرز اِنت ، اے پرز آگا آبد جان ءَ گوں وتی ھونانی ریچگ ءَ پیلو کرت۔
پرچا کہ آشوبی سنگت گلزمین ءَ وتی مات گْوش اَنت ، گوں سرڈگار ءَ اھد ءُ کول کن اَنت کہ ما چوشیں کارے نہ کن اِیں چہ مئے کاراں بلوچ راج تاوان ءُ نکس بہ وارت۔ پمیشکا من گْوش آں کہ شھید آگاہ آبد شاہ ءِ گوشتانک ءُ گپ پہ دژمن ءَ گْرند ءُ تیر اَت اَنت ، ءُ دژمن ءَ وتی بے سوبی ءِ چیر دیگ ءِ ھاتر ءَ سنگت آگاہ ابد شاہ ، ماسٹر واجہ سپیر ءُ ماسٹر واجہ ستار ءِ زانگولیں جون مارا پہ ٹیکی دات اَنت۔
گڈی ءَ من ھمے گْوش آں کہ مروچیگیں مئے کامریڈ ءُ لیکھی سنگت وتی کولیگ بوتگیں سنگتانی ، کماشانی پگر ءَ گوں ھمگرنچ ءُ دیم پہ منزل ءِ پاند ءَ جزان بہ کن اَنت۔ واجھیں کماش ھیر بکش ءِ پنتانی رد ءَ ، شھید واجہ گلام مھمد ءِ لیکہ ءِ رد ءَ ، واجہ اکبر ءِ دیمونی ءِ رد ءَ ، لالہ منیر ءِ داتگیں درونتانی رد ءَ ، ایدگہ ھزاراں بندیگ ءُ نْدر بوتگیں پسگانی دیدانک ءُ پلسپہ ءَ رد ءَ گاماں دیم ءَ شھار بہ دئے اِیں ءُ پہ وتی ھزار مرادیں منزل ءَ ھر وڑیں دیمونی ءِ دیگ ءَ چک ءُ پد مہ بہ اِیں۔ شالا سوب بلوچ ئیگ اِنت۔
بلوچستان آجو بات
