نمدی یے سنگت بلوچ ءِ پسو ءَ نبشتہ کار: بشارت درآمد

دْرھباتے!
من امیت کن آں کہ تو گوں وتی ھمراہ ءُ کل بلوچاں وش ءُ سلامت ئے۔ من پاکیں ھاوند ءِ در ءَ مدامی کل بلوچ ءِ سرسلامتی ءُ وشھالی ءِ دوا ءَ لوٹ آں ءُ ھمے ھاتر ءَ جھد کنگ ءَ آں۔ دگہ یک چیزے ایش اِنت کہ بلوچ ءِ زندگی ءُ دژمن ءِ بابت ءَ من شر سرپد ءُ شر زان آں ، من زان آں کہ شمئے زند ءِ اڑ ءُ جنجال چی اَنت ءُ دژمن ءَ شمارا کجا برتگ ءُ سر کتگ۔

منی واجھیں برات سنگت بلوچ اے ساھت ءَ دوشمبے ءِ سھب ءِ سر ءِ شش ءُ چل اِنت کہ پیسرتر ءَ من کوپے چاہ وارتگ ، تلارے ءَ تکہ زرمبش ءِ نبشتانک ءُ ھالاں وانان اِت آں داں تئی نمدی منی دیم ءَ کپت۔ من تئی نمدی” نمدی یے پہ سرمچاراں” کہ ونت ، من ءَ سکا دوست بوت ءُ اے شریں سر ءُ سوجاں تو نبشتہ کرتگ اَنت کہ سرمچار وتی زند ءِ سرگوست ءُ کتہ کاریاں نبشتانک ، آزمانک ءُ کسمانک ء دْروشم ءَ نبشتہ بہ کن اَنت۔

ھو! اے گپ راستے کہ سنگت سک کم نبشتہ کن اَنت، چوش کہ من وت یک سرمچارے ءُ گوں لبزانک ءَ بندوکیں سنگتے آں۔ نہ زان آں آ سنگتانی اڑ ءُ جنجال چی اَنت ، بلے من وتی اڑ ءُ جنجالانی کمیں درانگاز ءَ کن آں۔
ھبر چو اے وڑ ءَ اِنت کہ مئے گور ءَ چوشیں آسراتی نیست کہ ما وتی نبشتہ کتگیں چیزاں اود ءَ یکجاہ بہ کن اِیں۔ پرچا کہ مئے گور ءَ انوگیں دور ءِ آسراتی موبائل ءُ ڈائری اَنت، بلے برے مارا ڈائری دست نہ کپ اِیت ءُ برے کلم ، برے مئے موبائلاں چارج نہ بیت۔

آ ساھت ءَ کہ مارا نبشتہ ءِ اومان بیت ، موبائلانی سر ءَ ھچ بیسہ نیست کہ کجام وھد ءَ ھم مردم ءَ بہ دْروہ اَنت ، ءُ ڈائری انچو تگ ءُ تاچ ءَ بڈ ءُ سر ھم نہ بیت۔ ھیر مجبوری ءَ مردم بڈ ءُ سرے کنت ، بلے مئے دژمن ءِ ھال ءَ ترا گوں ھور سرجمیں دگنیا سرپد اِنت کہ آ بلوچ ءِ ھچ چیز ءَ نہ بکش اِیت۔ گپ ءِ مول ءُ مراد ایش اِنت کہ منی جند ءِ کساس ءَ دو شائری ءِ ڈائری ءُ یک نبشتانک ءُ سرگوستانی ڈائری یے ناپاکیں پوج ءِ دست ءَ کپتگ۔ یک رندے مئے اوتاک ءِ سر ءَ پوج ءَ بیڑ برتگ ءُ یک ڈائری یے ھمد ءَ دست ءَ کپتگے ءُ دگہ دو ڈائری سنگتے ءَ را گون اَت کہ آ سنگت شھید بوت ءُ منی ڈائری بدواہ ءَ چامپ اِت اَنت۔

ھمے رنگ ءَ منی سک باز نبشتانک ، سرگوست ءُ شئیر موبائل ءِ تہ ءَ بوتگ ، دو سے رند ءَ موبائل ھراب بوتگ ءُ منی اے کل شتگ ءُ گار بوتگ اَنت۔ یک ءُ دو رند ءَ منی موبائل پرشتگ ، منی اے چیز ھم شتگ اَنت۔
کول ء تئیگ ءَ بائدیں ھر سنگت وتی سرگوست ءَ نبشتہ بہ کنت، اگاں دگہ چیزے نبشتہ کت نہ کنت۔

گُڈسر ءَ من ترا اے گپ ءَ الم ھال دیگ لوٹ آں کہ ھر سرمچار گوں لبزانک ءَ بندوک اِنت ، اگاں کسے نبشتہ کنت یا نہ کنت بلوچی کتاب وان اِیت۔ اگاں کسے وانگ نہ زانت گڑا الم گوشداریت ، ماہ ءِ سرا یا برے برے مئے دیوان کہ بہ اَنت چیزے سنگت آزمانک وان اِیت ءُ چیزے سنگت شئیر ، چیزے سنگت لبزانک ءِ سر ءَ گپ جنت ءُ دیوان دنت۔ برے برے نبشتہ راھبند ءِ سر ءَ گپ ءُ تران ھم بیت، اگاں تو پسو ءَ رزامند نہ بوت ئے چہ تو پھلی لوٹ آں۔

تئی کستر: بشارت درآمد

7/5/2024 مکران بلوچستان