پہ ھمک ڈیھ ءِ دیمروئی ءِ واستا آئی مال ءُ مڈی بلائیں کردے ادا کن اَنت۔ مرچی جھان ءِ تہ ءَ ھما راج دیم ءَ اَنت کہ آیانی ڈہھ ءِ تہ ءَ بے کساس مال ءُ مڈی ھست۔ آ مال ءُ مڈی زر ، کوہ ، کوچگ ، کور ، زمین ءِ چیر ءَ دراتکگیں سھر ءُ سنگ یا کہ تیل ءُ گیس بہ بہ اَنت۔ مرچی روس ، چین ءُ جاپان ، جرمنی ءُ پرانس ، ارب ڈیھ زندگی ءِ ھر پڑ ءَ وژدل ءُ شادمان اَنت ، پرچا کہ آیانی ڈیھ ءِ تہ ءَ تیل ، گیس ءُ زر ھست۔ ءُ آ وتی درائیں مال ءُ مڈیانی ھدابند وت اَنت ، ءُ ھمے مڈیاں وت کارمرز کن اَنت پہ ڈیھ ءِ وشھال ءُ گھبودی ءِ واستا۔
ھمے وڑ ءَ بلوچ ڈیھ ءِ تہ ءَ ھم بے ھساب مال ءُ مڈی ھست۔ آ مال ءُ مڈی بلوچ زر ، سوئی گیس یا کہ سیندک ءُ ریکوڈک بہ بہ اَنت ، اے مال ءُ مڈی سک باز اَنت۔ اگاں اے پہ بلوچ ڈیھ ءَ کارمرز بہ بہ اَنت ءُ بلوچ ڈیھ جھان ءِ تہ ءَ یک وشھال ءُ دیمشتیں ڈیھے زانگ بیت ، بلے بلوچ ڈیھ گلام ءُ آئی مال ءُ مڈی ھم گلام اَنت۔ ھمے گلامی ءِ نادْراھیں بلوچ وتی مال ءُ مڈیانی ھدابند وت نہ اِنت۔ بلوچ ءِ مال ءُ مڈی بلوچ ءِ رزا ءَ ابید پہ زورگر ءِ نپ ءُ سیتانی واستا کارمرز بوگ ءَ اَنت۔ بلوچ چہ وتی مال ءُ مڈیاں زبھر ءُ چر اے تیزگامیں زمانگ ءَ سک پشت ءَ اِنت۔
مرچی بلوچ گلام ءُ اے گلامی ءِ بگیر ءَ گوں دژمن ءَ جنگ ءَ اِنت۔ بلوچ وتی آجوئی ، پجار ، مال ءُ مڈیانی پھازگ ءِ واستا تنگوھیں سر ءُ ارواھاں نْدر کنگ ءَ اِنت۔
پہ بلوچ ءِ زر ءِ پھریزگ ءَ ” آپریشن زرپھازگ ” ءَ بازیں بلوچ پدائیاں بھر زرتگ ءُ وتی گْرانملیں ھون پہ بلوچ زر ءَ نْدر کرتگ اَنت۔
ھمے بلوچ زرپھازانی تہ ءَ پدائی سنگت نوید بلوچ پنام ء اسلم ھم بلوچ زرپھاز ئِے کہ آئی گْوستگیں سال ءِ سیزدہ اگست ءَ پدائی سنگت مکبول پنام ء کائم جان ءِ ھمراھی ءَ وتی بے بھائیں ارواہ پہ زر ءِ پھازگ ءَ نْدر کت ءُ آپریشن زرپھازگ ءِ سیمی بھر آسر کرت۔
سنگت نوید بلوچ چہ درکسانی ءَ یک راجدوستے بوتگ ، ءُ آئی ءِ ھمے واھگ بوتگ کہ من ھم چو گْوستگیں شھیدانی پیم ءَ پہ وتی ڈیھ ءِ پھازگ ءَ ساہ ءَ سر ءَ نْدر بہ کن آں۔ سنگت نوید بلوچ ءَ وتی ڈیھ ، پجار ءُ گْران کیمتیں مڈی سک دوست بوتگ اَنت۔ آئی ءَ گوں وتی کوہ ءُ کوچگ ، زید ءُ کھچر ، کور ءُ شھجو ، درچک ءُ دار ، نیلیں زر ءِ گوم ءَ سکا مھر ءُ دوستی بوتگ۔ آ مدام گوں وتی بیل ءُ ھمبلاں شتگ کوہ ءُ کوچگانی سر ءَ نشتگ ءُ آیانی بابت ءَ جیڑ اِتگ۔ ھور ءُ جمبرانی وھد ءَ کور ءُ جوہ ، زید ءُ کھچرانی سیل ءُ سواد ءَ شتگ۔ زر ءِ مستیں چولانی گوم ءَ لیب کتگ۔ آئی ءَ مدام سنگتانی دیوان ءَ بلوچ ءِ مال ءُ مڈیانی بابت ءَ گپ ءُ تران کتگ۔ گوں سنگتاں مدام ھمے گْوشتگ کہ ھمے وڑ ءَ کہ ما گلام ، ھمے وڑ ءَ مئے مال ءُ مڈی ھم گلام اَنت۔ پہ آیانی پھازگ ءِ واستا پہ ما ساہ ءُ سرانی نْدر کنگ الم اِنت۔
مروچی ھر ورنا کوہ ءُ کوچگاں ، زید ءُ کھچراں ، کور ءُ جوھاں ، زر ءَ تر اِیت ءُ تیاب ءِ کر ءَ بس نند اِیت ءُ اکس کش اِیت ، تامر جوڑ کنت ءُ رسانکدر ءَ شنگ کنت۔ ءُ آ اے نہ مار اَنت کہ مئے ڈیھ ءِ ھمراھی توامیں مڈی گلام اَنت ، پہ آیانی پھازگ ءَ اکس ءُ تامر الم نہ اِنت ، بلکیں آیانی پھازگ ءِ واستا ساہ ءُ سرانی نْدر کنگ الم اِنت۔
بلے! سنگت نوید بلوچ اے لیکہ ءِ بلوچے نہ اَت ، بلکیں آئی لیکہ گوں استاد اسلم ءَ بندوک اَت۔ آئی لیکہ پدائی ریھان جان ءِ لیکہ اَت۔ آ پدائی سلمان ھمل ءِ پگر ءِ منوگریں بلوچ اَت۔ سنگت نوید بلوچ ءَ تھنا گپ ءُ ھبر نہ کت ، آئی ھمے گپ ءُ ھبرانی پاسداری ءَ وتی کسانسالیں زند پہ بلوچ ءِ زر ءِ پھازگ ءَ نْدر ءُ کربان کت۔ وتی سھریں ھون تیاب ءِ چولانی تہ ءَ ھوار کرت اَنت۔ پمیشکا مروچی بازیں بلوچ ورنا سنگت نوید بلوچ ءِ لیکہ ءَ گوں ھمگرنچ ءُ وتی ساہ ءَ پہ زر ءِ پھازگ ءِ واستا نْدر کنگ ءَ اَنت ، ءُ ھمے لیکہ ءِ پاسداری کنگ ھر بلوچ پسگ ءِ راجی زمہ واری اِنت داں دژمن زوت ءَ چہ زوت مئے ڈگار ءَ یلہ بہ دنت ءُ دیم پہ وتی بندر ءَ بہ روت ، پرے واستا دیمونی دیگ الم اِنت۔
