یک اپریل ھما ناوشیں روچ اِنت کہ زند ءِ اے دردناکیں سپر ءَ ھچ رنگ ءَ بے ھیال کنگ نہ بیت۔ مھروان من بس ترا ھمے گْوشگ لوٹاں کہ ترا چو زوت روگی نہ اَت۔ ترا زان ءَ چہ مارا انچیں مزنیں گلگے ھست اَت کہ تو مدامی چہ مارا دور شت ئِے؟
مھروان اگاں من ترا چو بہ گوشاں کہ تو مارا چو زوت یلہ دات ءُ شت ئے بہ گندئے اد ءَ من رد بہ بہ آں۔ چی ءَ کہ تو مارا ھما روچی یل دات ءُ شت ئِے، پہ ھانلیں گلزمین ءِ بانوری ءَ شے مرید بوت ئے۔
مھروان من ءَ گوں تو ھچ گلگ نیست ، چی ءَ کہ ما یک انچیں اھدے ءَ زندگ اِیں کہ اود ءَ تئی وڑیں شے مرید چہ زورگریں چاکر ءِ دست ءَ پہ وتی ھانل ءِ پچ گرگ ءِ ھاتر ءَ دیمونی دے اَنت۔ انچوش کہ ھانی ءُ شے مرید ءِ مھر یک داستانے چوڑ بوتگ ھمے وڑ ءَ تئی دابیں شے مریدانی پہ وتی ھانلیں سرڈگار ءَ مھر ھم یک داستانے جوڑ بوتگ۔
مھروان اچ ترا پد گْوش ئِے زند گیمرتگ ءُ ھمک لنٹانی سر ءِ بچکند ھامگ اَنت۔ اچ ترا پد مزبند ابیتک اِنت کہ تو وتی گڈی ساہ آئی ءِ دلبند ءِ سرا دات ءُ نمیران بوت ئِے۔ بہ گندئے آ پہ تو پھر ھم بند اِیت کہ آئی ءَ پہ وت ءَ تئی وڑیں بچ پیداک کتگ۔
مھروان بہ یا کہ اچ تو پد تئی گلیں گلزمین مجاں گپت۔ ھو اے راستے کہ کسے ءِ روگ ءَ پد زند نہ اوشت اِیت ، بلے گپے زان ئِے زند ءِ گوازینگ گْران الم بیت۔ گْران بیت پہ ھما دیدگاں کہ آ دیدگاں پہ وت ءَ مھر دیستگ ءُ اے مھر داں ساہ ءِ گڈی دم کشگ ءَ بے ھیال کنگ نہ بہ اَنت۔
مھروان تو پہ ما نہ جیڑ اِت ءُ زوت شت ئِے ، بلے تو کموکیں پہ وتی گلزمین ءَ بہ جیڑ اِتیں۔ تو کموکیں بہ جیڑ اِتیں پہ وتی ھانل ءَ کہ باریں آ وتی شے مرید ءَ ابید چینچو ملور بیت کہ آ شے مرید ءَ وتی ھانل مدام پہ مھرانکیں نگاھے چار اِتگ۔ پہ وتی ھانل ءَ شپ ءُ روچ زوراکیں چاکر ءِ دیم پہ مردی داشتگ۔
شیھل جان مرچی ترا دو سال سرجم بوت کہ تو چہ ما جسدی رنگ ءَ دور ءُ پہ مدامی ابدمان بوت ئِے ، بلے تو مدام گوم ءَ ھوار بوتگ ءُ ھوار ئِے۔ تو مدام مئے ھیالانی توکا زندگ ئِے۔ تو زندگ ئِے ھمک زندگیں بلوچ ءِ دل ءَ ، تو ھست ءُ زندگ ئِے ھمک سرمچارانی دْروشم ءَ۔ تو انگت جھد ءَ ئِے ، سائجی ءُ مزبند ءَ سنگر داشتگ ءُ گوں دژمناں جنگ ءَ ئِے۔ تو شیراز ءِ ھمک کوہ ءُ ھسارانی دْروشم ءَ ھست ءُ ابدمان ئِے۔
مھروان من مدام ترا کہ جیڑاں ، انچو سما بیت تو ھمد ءَ ئِے۔ گوں من گپ ءُ تران کنگ ءَ ئِے ، بچکندگ ءَ ئِے ، ءُ ھمے ھیالانی توکا من کہ جیڑاں تو پرچا مئے میان ءَ ساڑی نہ ئِے؟ نوں تئی دیم پہ دیمی دیدار نہ بیت ، بلے اے بلوچ ءُ بلوچستان ءِ آجوئی ءِ جنگ اِنت اِد ءَ ھرکس ءَ دیمونی دیگی اِنت۔ شیھل آ ھانلیں سرڈگار ءَ کہ تئی وڑیں بچاں دیمونی داتگ ، من جزماں آ روچ دور نہ اِنت چہ زوراکیں چاکر ءِ دست ءَ مئے ھانلیں سرڈگار آجو بیت۔
مھروان من تئی روگ ءَ ھچ بژنیگ نہ آں ، ءُ تئی ھما پش کپتگیں یات ءُ اکس گوم ءَ ھمراہ ءُ مدام تئی ترانگاں گیج اَنت۔ اے راستے کہ مرگ پہ ھر بنی آدم ءَ الم اِنت ، بلے تھنا پہ وت زندگ بوگ زندگی ءِ نام نہ اِنت، بلکیں گْواچن ءُ پرمانائیں زند ھما اِنت کہ تو وتی آیوکیں باندات ءُ گلیں پدریچ ءِ واستا زندگ بہ ئے۔ من پہ پھرے گْوشاں منی براتک یک انچیں کردے ءِ واھند بیتگ داں جھان ھست آ ابدمان اِنت۔
شیھل آیوکیں پدریچ مدام ترا گیر کار اِیت ءُ تئی داتگیں دیمونی مدام مان اِیت۔ تئی وڑیں ورناہ کہ پہ وتی گلزمین ءَ نْدر بیتگ اَنت ، آیاں بلوچستان ءِ راجدپتر مدام یات کنت۔ ءُ اے گپ ءَ بس یک زمین آشکے زانت کہ چون پہ وشیانی منگیراں رسگ ءِ توجیل ءَ بہ ساز اِیت ءُ چہ دائمی ناآسودگی ءَ بہ رک اِیت۔
مھروان منی کِر ءَ انچو لبز نیست کہ من پہ تئی نمیرانیں ارواہ ءِ سر ءَ نبشتہ بہ کن آں ، بلے مھروان من ترا ھمے گْوشاں کہ تئی جھد داں آجوئی ءِ گڈی گام ءَ جزان کنت ءُ من جزماں تئی رتکگیں ھون پہ زمین ءَ الم رنگ کار اَنت۔
مھروان گڈی ءَ من ترا ھمے گْوشاں کہ تئی جاہ وش بات ءُ باگیں بھشت ءَ بات ئِے۔
