ماہ روش جان!
امیت کن آں وش واب بہ ئے ، اے ساھت ءَ شپ ءِ ھشت ءُ نیم اِنت کہ من ءَ تو سک یات آیگ ءَ ئے یات و ھمک دمان کائے بلے مروچی گْوش ئے گیشتر تئی یاتاں بے چاڑ کرتگ ۔
من وتی سرجمیں بالاد گوں تیران ءُ ٹوھیں سلاھاں مان پوش اتگ کہ من ءَ چوش کھرے ءَ ڈونڈ واریں رسترے ءِ سر ءَ کپگی اِنت ءُ آئی ءِ چمانی واب ءُ دیستگیں شوک ءُ زیبائیں باندات پہ مدامی چہ آئی ءِ چمانی نیام ءَ بیگواہ کنگی اَنت کہ پہ زمین ءُ زر ءَ تھنا بلوچ واب دیست کن اَنت ءُ بس۔۔
مروچی ما اے جاوراں گوں چیر ءُ سر ایں، من نہ لوٹ آں کہ تئی باندات ھم انچوش بہ بیت تو گوں شوکیں ساھتاں لیب کنات ءُ مزن بات ئے ، تو کہ مزن بہ ئے گڑا الم پہ من نمدی یے دیم دئے ءُ وتی شوکیں زر ءُ شاھگانیں زمین ءِ ھالاں من ءَ الم سر کن کہ تی پت ءَ اے سک دوست بہ اَنت۔
اے منی مزنیں واھگے بیتگ کہ بیگاھانی ساھت ءَ گْوادر ءِ زر ءَ من تئی دست ءَ بہ گر آن ءُ ترا چہ اے زر ءِ زیبائی ءَ آژناگ بہ کن آں۔بلے چون کن آں کہ وھد سک اشتاپی اِنت ءُ تو انگت ھچی ءَ سرپد نہ ئے کہ تئی زمین ءُ زر ھردک ڈونڈ واریں رستر ءِ لگتانی چیر ءَ اَنت ءُ اے گپ تئی پت ءَ بھ دوست نہ بیتگ ءُ نہ بیت ھم تو کہ مزن بہ ئے چہ وتی زمین ءُ زر ءِ زیبائی ءَ کہ مار ئے گڑا اے زمین زادگیں پت ءَ سلام کن ئے کہ چی ءَ منی دتکی لیبانی ساھت ءَ اچ من گسر بیتگ۔
تہ واب ءَ تو ءُ تئی لاڑکیں مات پاد کا اِت ، گرا تھنا منی تیراں سپتگیں کنٹ ءَ گند اِت۔درامدیں رستر ئِے ماں رسانکدر ءَ شنگ کن اَنت کہ ما دھشت گردے جتگ بہ گندئے ، تو مہ زان ئے کہ چی بیتگ بلے اے گپ ءَ من جزم آں اے ساھت ءَ تی مات ءِ پِریات ارش ءَ جکسین اَنت۔
تی زمین زادگیں پت
ایوب ازیم پنام دودا
