آیاں وتی کول پیلو کرت اَنت

( شھید پدائی ایوب ازیم پنام دودا ءُ شھید پدائی واجداد پنام نودان )

سال 2014 اَت ، سنگت کمال بلوچ ( بی ایس او ءِ پیشیگیں بنجاھی کمک سرکماش ءُ بی این ایم ءِ انوگیں مستریں کمک کارگشاد ) جاہ ءِ آھو ءَ اتکگ اَت ءُ گوں آئی ءَ دو بی ایس او آزاد ءِ ھمبل ھمراہ اَت۔ چہ آ ھمبلاں یکے شھید پدائی ایوب ازیم پنام دودا ءُ دگرے واجداد پنام نودان اَت۔

نزیک ء ماھے ءَ من گوں اے ھمبلاں یکجاہ بوت آں۔ کندگ مزاک، ادارھانی کار، سیاسی نیاد برجاہ اَت اَنت۔ ماھے ءِ ھم سپر ءُ یکجاھی ءَ ما وت ماں وت انچوش بوت ایں کہ ھریکے ءَ دومی ءِ دل ءِ تہ ءَ جاہ کرتگ۔ چوناھا پگری ھمبل مردم ءَ را سکا دوست بیت ءُ مردم چہ ھمراھیں ھمبلاں بیھال بوت نہ کنت بلے لھتیں انچیں مھروان بہ اَنت ، آ انچیں مھر بکشا اَنت کہ مردم چہ آیاں بھ شموشکار نہ بیت۔

جھدکاریں ھمبلاں آجوئی جز ءِ سپر ءَ راجکاری ءِ لوٹانی بنیاد ءَ تچ ءُ تاگ کنگی اِنت، ھمے داب ءَ سنگت ایوب ازیم ءُ واجداد جاہ ءِ آھو ءَ اتکگ اَت اَنت آیاناں دیم ءَ ھم سپر ھست اَت، آ وتی سپر ءَ رھاگ بوت اَنت۔

چہ آیانی روگ ءَ پد آیانی ترانگ مدام مئے گون ءَ بندوک اَت اَنت۔ ما ھمک وھد ءَ دیوانانی تہ ءَ آیانی ترانگ ءَ کپتگ این ءُ کمی مارتگ۔ سال ءُ ماہ جزان اَت اَنت کہ 2017 ءَ ھمے ناوشیں ھال گوشاں کپت کہ سنگت ایوب ءُ واجداد لشکر ءَ آوار جتگ ءُ بیگواہ کرتگ اَنت۔ اے ناوشیں ھبر ءَ مارا سکا دلپدرد کرت کہ اے وڑیں جپاکش ءُ مھروانیں ھمبلانی زوریں بیگواھی زنڈیں تاوان اَنت۔ بس آجوئی جز ءِ سپر اِنت کہ زوریں بیگواھی ، شھیدی ءُ در پہ دری درس ھمے جنگ ءِ بھر اَنت۔

آ 2019 ءَ چہ ریاست ءِ چیریں آزارجاھاں آجو بوت اَنت بلے من لھتے ماہ ءَ پد سال 2020 ءَ سرپد بوت آں کہ سنگت ایوب ازیم ءُ واجداد چہ دژمن ءِ چیریں آزارجاھاں آجو بوتگ اَنت۔ اے ھبر پہ من سکا وشیں گپے اَت، بلے من وتی زھن ءَ ھمے جیڑگ ءَ اَت آں باریں سنگت آجوئی ءَ پد چون بہ اَنت؟ چی ءَ کہ بازیں ھمبل چہ زوریں بیگواھی ءَ آجو بوگ ءَ پد بے توار بوتگ اَنت ءُ باز چہ آجوئی ءَ رند ھم شھیدانی کاروان ءِ ھم سپر بوتگ اَنت ءُ جھد کنگ ءَ اَنت۔

اگاں من رد مہ بہ آں گڑا اپریل 2020 ءَ وھدے کہ من بلیدہ ءَ پہ تر ءُ گردے ءَ شتگ آں گڑا ھمود ءَ من گوں سنگت ایوب ازیم ءُ واجداد ءَ ڈک وارت۔ آیانی گندگ ءَ من سکا باز وش بوت آں۔ من چار یا پنچ روچ گوں آیاں یکجاہ بوت آں۔ چہ آیانی آجو بوگ ءَ پد آیانی تہ ءَ پہ سنگتاں ھدوناکیں مھرے گندگ بوگ ءَ اَت۔

شھید پدائی ایوب ازیم ءُ وجداد من ءَ پہ مھر استاد ءِ نام ءَ توار کنگ ءَ اَت اَنت۔ داں اے چار ءُ پنچ روچاں من آیانی مھمان بوت آں ، آیاں من ءَ یک کارے ءَ دست سک کنگ ءَ نہ اشت، چہ ورگی آپ، چاہ ءُ نان ،نگر داں وپسگ ءَ نپادانی چیر کیجگ ءَ، مردنی من آیانی اے مھرانی دیم ءَ سکا ملامت بوگ ءَ اَت آں۔

شپے ءَ من ءَ واجداد ءَ جست کرت ءُ گْوشت استاد تو وھدے مئے بیگواھی ءِ ھال اش کرت گڑا چی جیڑ اِت؟ من گْوشت پل من ھمے سرپد بوتگ آں کہ اے ریاست شمئے لاشاں چگل دنت یا وَ شمارا انچوش کنت ءُ یل دنت کہ شما پد ءَ مردمگری ءِ کار ءَ نہ یا اِت۔ دمانے ءَ ما ٹیٹ کند ات۔

شھید واجداد ءَ گْوشت ’’ استاد انو بہ چار باریں من ریاست ءَ چون ءُ کجام وڑ ءَ وتی بیراں گر آں۔‘‘

چہ شھید واجداد ءِ ھبر ءِ ھلاسی ءَ پد ایوب ازیم ءَ درائینت ءُ گْوشت ’’ استاد اے ریاست ءَ مئے یل کنگ ءَ چوش ڈاکٹر اللہ ءِ نزر ءِ یل کنگ ءِ وڑ ءَ بلائیں ردی یے کرت گند ئے ھاھاھاھا __ اے ریاست نہ زانت کہ راجی جبزگ پہ لٹ شاپ ءُ آزار دیگ ءَ ھلاس نہ بیت بلکیں گیش مھکم بیت۔‘‘

من پہ مزاک گْوشت ’’ اگاں ریاست ءَ بہ زانتیں شما آجوئی ءَ پد آئی ءِ بگیری ءَ جنگ ءِ بھر بہ اِت گڑا باریں آئی ءَ شمئے لاش چینچو ٹکر کرتگ اَت اَنت۔‘‘

سنگت ایوب ءَ گْوشت ’’ ھو یار! آ سرپد بوتیں کہ ما پد ءَ جنگ ءِ بھر بہ ایں گڑا آئی ءَ مارا کشتگ اَت، بلے گپ ایش اِنت کہ شھیدانی لاش ھم آشوب کار اَنت چہ مئے شھیدی ءَ پد مئے پگر ءَ دگہ جھدکار ودی کرتگ اَت۔‘‘

بلے من چوش نہ زانت کہ اے مئے گڈی دیدار بیت، من دیم پہ وتی سپر ءَ راھادگ بوت آں۔ آ ھمک وھد ءَ منی ھیالانی تہ ءَ بوتگ اَنت ءُ گندگ ءِ اوست دل ءَ برجاہ بوتگ۔

وھدے کہ 25 ءُ 26 مارچ 2024 ءِ میانی شپ ءَ تربت ءَ نیول ایئر بیس پی این ایس سدیک ءَ بی ایل اے ( مجید برگیڈ ) ءِ پدائی اُرش ءِ ھال سربوت ما سکا جیڑگ ءَ اَت ایں کہ باریں اے ھمبل کے اَنت۔ دومی روچ ءَ بی ایل اے ءَ زرپھازگ آپریشن پنچمی پدانک ءِ آسری ءِ جار جت آئی ءِ درشان ءَ چار ھمبلانی نام ھوار اَت؛ شھید پدائی ایوب ازیم پنام دودا، واجداد پنام نودان، ھلیپ پنام اسلم ءُ مراد ھاسل پنام پرھاد۔

چہ اے درشان ءِ وانگ ءَ پد من ھما ترانگاں کپت آں کہ شھید دودا ءُ نودان ءَ اے ھبر کرتگ اَنت ءُ ھمے ھبرانی وڑ ءَ وتی کول پیلو کرت اَنت۔