اگاں ما مروچیگیں زمانگ ءَ جنگاں چار ایں گڑا سرپد بہ ایں کہ جھان ءَ سلاہ ءِ پڑ ءَ سک دیمروئی کرتگ امریکہ، روس، چین ءُ پرانس ءَ ھرچ وڑیں سلاہ تیار کرتگ اَنت چوش کہ S-500 ، Supersonic Brahmos Cruise Missile ، H-777 ، Attack Drone، Rafale Fighter Jet ءُ دِگہ وڑ وڑیں سِلاہ جوڑ کرتگ اَنت۔ایوک ءَ پہ دو ڈیھانی (ملکانی) میان ءِ جنگاں پہ دژمنے ءِ کارجاہ، بالی پٹ، ملیٹری انسٹالیشن، شھر ءُ دگہ اسٹرائیکنگ آسراتیانی تباہ کنگ ءَ کارمرد بہ اَنت بلے ایشاں چیرجنگی ءِ دارگ ءَ شریں سِلاہ انگت جوڑ نہ کرتگ اَنت بلکیں ایشی ءِ چپ ءَ پہ چیرجنگولاں وڑ وڑیں دگہ کسان کسانیں سلاہ ودی بوتگ اَنت کہ آ پہ یک زورگرے ءِ تباہ کنگ ءَ چیرجنگولاں آسانی ءَ دزکپ اَنت انچوشکہ ڈرون اَنت۔
چوناھا مروچیگیں جنگی زمانگاں تھنا بے ناھدائیں جنگی ڈرونانی سر باز کار بوگ ءَ انت امریکہ، روس، اسرائیل، ترکی، ھندوستان، ایران ءُ چین ءِ وڑ ءَ دگہ بازیں دیمروئی کرتگیں ملکاں وڑ وڑیں آئی ءِ رینج سرویلینس ءُ اٹیک ڈرون تیار کرتگ اَنت کہ اے بے ناھُدائیں ڈرون چہ رن وے ءَ بال گر اَنت ءُ رن وے ءِ سر ءَ ایرکپ اَنت، اے بے ناھدائیں بالیگاں موشک ( میزائیل ) سنج کنگ بہ اَنت پمیشکا اے بالیگانی پہ گْوریلہ گلاں بھا زُورگ ءَ سک گْران اَنت، ایشانی زیرگ ءُ بڈ ءَ کنگ ھم بلائیں آسراتی لوٹ اَنت۔ البت نی روس ءَ ھور ءَ دگہ بازیں ملکاں انچیں کسانیں جنگی ڈرون تیار کرتگ اَنت کہ آ وت میزائیل اَنت اے نوکیں کسانیں جنگی ڈرون ناں بالی پٹے لوٹ ایت ناں کہ میزائیل ءُ دگہ بمب ءُ آسراتی یے لوٹ ایت، ایوک ءَ چہ سند ءَ کش ءُ وتی ٹارگٹ ءِ نیمگ ءَ بال ئِے دئے۔
روس ءِ اے سوئیسائیڈ ڈرون ءِ نام Coyote-1 اِنت کہ نی آئی ءَ نوکیں ماڈل Coyote-2 ھم ھست کہ یک مردمے ایشی ءَ بڈ ءَ کنت، بال ئِے دنت ءُ نشانگ ءَ زوران ءَ دُژمن ءِ ھر وڑیں بیس ءُ کیمپے تباہ کرت کنت چین ءَ ایشی ءِ مَٹ ’’ CH-901 ‘‘ تیار کرتگ ءُ انی دگہ بازیں ملک گوں اے کسانیں وتکشیں بمباںئِے مزنیں شمارے ءَ تیار کنگ ءَ اَنت۔
وھدے کہ 18 جنوری 2022 ءَ یمن ءِ ھوسی جنگولاں یو اے ای ءِ دبی شھر ءِ سر ءَ گوں کسانیں وتکش ڈرونے ءَ ارش کرت ءُ دبی بالی پٹ ءَ بیرانی یے ودی کرت۔ چہ ایشی ءَ جھان ءِ ھما ملک ترس ءِ آماچ بوت اَنت کہ آیاں دگہ راج ایردست کرتگ اَنت یا ایردستیں راجے ءِ گھگیری ءِ آماچ اَنت پرچا کہ اے وڑیں ارزان بھائیں ڈرونے چہ دیر ءَ بال کنت ءُ دُژمن ءِ بلائیں ماڑی، کارجاہ، ملٹری بیس ءُ دگہ ملٹی بلین ڈالر ءِ آسراتیاں آسانی ءَ تباہ کنت۔ اے کسان کسانیں ڈرون مروچاں میڈل ایسٹ ءِ جنگ آماچیں دمگاں ھوار یوکرین ءُ یمن ءَ باز کارمرد بوگ ءَ اَنت کہ آ اود ءَ زورگر پْروش ءِ آماچ اَنت۔
انچوش گْوش اَنت کہ یک کارے ءِ ٹھینگ گْران اِنت، بزاں کہ کار ءِ پیلو کنگ ءَ جھدے لوٹ ایت بلے کار ءِ ھراب کنگ سک آسان اِنت یک ماڑی یے بہ بیت یا کہ کسانیں گِسے ھم بہ بیت آئی ءِ بندگ ءَ پنچ یا شش ماہ پکار بیت بلے ھمے ماڑی ءُ گس ءِ تباہ کنگ ءَ ساھتے ھم نہ لوٹ ایت۔تیوک آس بہ دئے گڑا آ ماڑی وت سچ ایت ءُ پر بیت یا بمب ئِے بہ جن پد ءَ وت تباہ بیت۔ گند ئے ماڑی ءُ گسے ءِ بندگ ءَ لکانی ھساب ءَ کلدار ھم ھرچ بہ اَنت بلے پہ آئی ءِ تباہ ءُ ھمسگ ءَ بمبے ءِ بھا لوٹ ایت ھمے داب ءَ پہ زورگِرے ءَ نزوریں ھمساھگیں ملکانی سر ءَ ارش کنگ ءُ آ نزوریں راج ءِ ڈیھ ءَ دستیگ کنگ و آسان انت بلے ھمے زورگری ءِ برجاہ دارگ ءُ پرمڑاہءُ زندگیں راجے ءِ ایردست کنگ سک گْران اِنت۔ وھدیکہ زندگیں راجے یک مشت بہ بیت ءُ مردمی بستار پہ وتی بندری لوٹ ، بزانکہ پہ وتی آزاتی ءُ راجی آجوئی ءِ جھد ءَ سلاھبندیں گھگیری بہ کنت گڑا زورگر ھرچ وڑ ءَ زوراک بہ بیت یک روچے الم چک پْروش بیت، یک روچے الم انچیں کئیت کہ ھمے ایردستیں راج آجو بیت بلے بے ایش انت کہ راج وتی ایردستی ءَ بہ مار ایت، راج ءِ تہ ءَ راجدوستی ءُ ڈیھ دوستی ءِ مارشت بہ بہ اَنت۔ راج ءِ نودربر، کواس ءُ زانتکار بزگیں راج ءَ یکمشت کنان ءَ راجی آجوئی ءِ سلاھبندیں گھگیری گلاں کمک بہ کن اَنت۔راج ءَ ڈیھ ءِ سر ءَ بدیں دُژمن ءِ زورگری، دود ءُ رواجانی لگتمالی ءُ ایردستی ءِ بارو ءَ سرپدی دیان ءَ آجوئی ءِ آشوب ءَ مھکم ءُ آجوئی ءِ جھد ءَ برجاہ بہ دار اَنت گُڑا یک ایردستیں راجے ءَ وتی جھد ءِ برورد ءَ آجوئی الم رس ایت۔
چوناھا ماں چیرجنگاں زورگر مدام چک پْروش بیتگ اَنت پرچا کہ زورگر ایردستیں چاگِرد ءِ تہ ءَ کشت ءُ کوش ءِ بدیں ترسے دیان ءَ وتگڑیں ایمنی ودی کنگ ءِ جھد کنت بلے اے زورانسری ایردستیں راج ءِ تہ ءَ دژمن ءِ بگیر ءَ گیشتر کینگ ودی کنت ءُ گھگیر دژمن ءِ ھمے وتگڑیں ایمنی ءَ کانچ ءِ داب ءَ پْروش اَنت چوشکہ گوں یک دو ھزار کلدار ءِ بمبے ءَ دو کروڈ کلدار ءِ ماڑی تباہ بہ اَنت بزاں ماں چیرجنگ ءَ دُژمن ءَ مدام اناگتیں ارشانی ترس، بے آرامی ءُ تکانسری رس ایت۔
گُڑا باید اِنت راجی لشکر بی ایل اے ءُ آئی ءِ دِگہ ھمدست ءُ ھم کوپگیں راجی سرمچارانی گل جھان ءِ آ دگہ راجی گلانی وڑ ءَ وتی جنگ ءِ تہ ءَ ھم بدلی بہ یار اَنت ۔ چہ زوتاں زوت ڈرون ءِ آسراتیاں اِے جنگ ءَ بہ یار اَنت کہ دژمن ءِ کیمپ ءُ بنجاہ ارشانی آماچ بہ بہ اَنت۔
بلوچ راج شالا پہ وتی راجی آجوئی ءَ یک مشت ءُ تپاک بات ، بلوچستان شالا آجو بات۔
