جی ھو اے گپ راست اِنت کہ جھان ءِ مستریں گنج ءُ وژدلی مھر اِنت۔ مھرمے گوں مھرم ءَ بہ نند ایت یا مھرمے مھرم ءَ وتی سرزان ءُ کنک ءَ جاہ بہ دنت، منی ھیال ءَ زندگی ءِ وشتریں ساھت ھمیش اَنت ءُ ھمے بوتگ اَنت اگاں کسے مھر ءِ دیوانگی ءَ را بہ پرس ایت۔‘‘
اے جھان ءِ تہ ءَ منی ھیال ءَ چہ نہ بوتگیں کاراں یکے ھمیش اِنت کہ اے جھان ءِ تہ ءَ وڑ وڑیں زوراک ءُ تمردیں مرد اتکگ اَنت، آھاں اے جھان ءِ رنگ مٹ کرتگ۔ کور ءُ شھکور بستگ ءُ گار کرتگ اَنت۔ ساہ چہ ارواہ ءَ سستگ ءُ ارواہ ماں کوہ ءُ کوچگ یا ویرانگ ءُ لداں سوتکگ اَنت بلے جْوان ءُ دانائیں مردمانی سسا ءُ زانت بست ءُ گار ءُ گور کرت نہ کرتگ اَنت۔ھمے زانتکارانی سر بر اتگ ءُ سر گار ءُ گور کرتگ اَنت بلے آھانی سما ءُ زانت روچ ء مروچی انگت ھست ءُ دانکہ اے جھان ھست اِنت، اے مردمانی گْوشتن ءُ زانت چو روچ ءُ چاردھی ماہ ءَ مان ایت ءُ ابد بیت۔
اے الم نہ انِت کہ کسے ءِ مردم ، پت ءُ پیرک ترسوک ءُ نادر بوتگ اَنت، آھانی چُک ءُ نماسگ ھم ھمایانی وڑیں مردم بہ بہ اَنت، اے وڑ نہ اِنت ءُ اے وڑ نہ بیت ھم۔
مروچی من انچیں ورنایے ءِ بارو ءَ نبشتہ کنگ ءَ آں کہ اے ورنا ءَ را اے زند ءَ ھچ چیز پکار نہ بیتگ ناں وازمندگے بیتگ، بلکیں آئی ءِ ھرچ لوٹ ءُ واھگ سرجم کنگ بوتگ اَنت۔اے ورنا ءِ درسیں مردم چہ آجوئی لوٹوکیں مردم ءُ گلاں سکا سک دور بیتگ اَنت۔
گت ءُ گمان ءَ در اَت کہ چہ اے کھول ءَ یکے آجوئی لوٹوکیں گل ءُ سنگتانی کمک ءِ گپ ءَ بہ کنت۔ بلے مھر ءِ شیدائی ءَ کے داشت کنت ؟ ، ھمے کھول ءِ تہ ءَ پاروک نامیں ورنایے در اتک ءُ پہ گُلزمین ءَ وتی سینگ ءَ بمب ئِے بست ءُ دیمون بوت ۔ اے گپ ءَ مھلوک ءُ جھان ءِ دیم ءَ پدر کرت کہ مھر ءِ شیدائی ءَ کس داشت نہ کنت، ھر کس کہ دل ءُ ستک گوں چیزے ءَ مھر بہ کنت گڑا آئی ءَ را ھچ وڑیں زور پروشت نہ کنت۔اگاں بہ پرشتیں گڑا منی مردماں من ءَپروشتگ اَت۔منی مردماں چینچو رند ءَ من ءَ گْوشتگ کہ بہ یا لگور بہ ئے بلے من ءَ منی گلزمین ءِ مھر ءُ ڈیھ ءِ ورنایانی دیمونیاں لگوری ءَ نہ اشتگ بلکیں من ءَ مدام ھمے سکین اش داتگ کہ ترا ھم پہ گُلزمین ءَ دیمون بوگی اِنت۔
من ءَ چہ وتی مات ءُ پِت ءُ کھولاں گیش گوں وتی ماتیں گلزمین ءَ مھر اَت، من پہ ماتیں گلزمین ءَ نْدر بوت آں، اے بلوچ ءُ بلوچستان ءِ آجوئی ءِ جنگ اِنت ھرکس ءَ را دیمونی دیگی اِنت، کے چہ کچ ءَ دات کنت باید اِنت بہ دنت۔ اد ءَ ھر کس ءَ را وتی کردارانی مز رس ایت۔
