پشت کپتگیں یاد
(شھید ودار جان )
انوگیں وھد ءَ بلوچ ءِ ھرچ تبیں مردم زانت کہ بلوچ ءِ ھمک پسگ جنگ ءِ آماچ ِانت ، کسے ھاموش اِنت ایوک کپتگیں جونانی ندارگ کنگ ءَ اِنت ، وت ءَ وھد ءِ دنزانی تہ ءَ چیر داتگ ئِے ءُ لھتے تمردیں سر ءَ وت ءَ پہ مدامی ابدمان کرتگ۔ زند ءِ ھرچ پڑ ءَ آیانی نام پہ پھر ءُ شان گرگ بیت۔ چہ آ ابدمانیں کارستانی تہ ءَ یکے شھید شئیب پنام ودار اِنت کہ بلوچ ءِ جز ءِ تہ ءَ وتی نام نبشتہ کرت ءُ وت ءَ پہ مدامی زندگ داشت۔ ودار جان ءِ میتگ ءِ مھلوک شھید ءِ نام ءَ ھم روچ پہ پھر گر اَنت۔ شھید ودار جان کسان سالے اَت چہ گیش ءَ گیش 22 سال اَت ئِے کہ وتی گْرانبھائیں سر ئِے پہ بلوچ راج ءَ نْدر کرت۔
منی ءُ شھید ودار ءِ سنگتی چہ کسانی ءَ بندات بوتگ اَت ، ھرچ تبیں جاور ءَ ماں ھوار اَت ایں، سکی ءُ سوری ءَ بہ گر داں وشی ءُ شادمانی ءَ ماں ھرچ وھد یک جاہ اَت ایں۔ کسانی گوں لیب ءُ گوازی، گرد ءُ تر ، پِکنک ءُ شپ گردی ءَ گْوازان بوت۔انچوش گْوش اَنت کہ وشی ءِ ساھت نہ جل اَنت ،گوں اشتاپی ءَ وھد روان کنت ءُ مئے کسانی انچوش روان بوت ماں مزن بوان بوت ایں، وانگ ءُ زانگ پہ ما دوئیناں مشکل اَت۔ شھید پہ وانگ ءَ بی آر سی ءَ شت ءُ من وتی میتگ ءَ وانگ ءَ اَت آں۔ اے وھد ءَ من ءُ شھید ودار ایوک ءَ موکلانی وھد ءَ یک جاہ اَت ایں۔
وھد روان اَت من وتی ھائی اسکول ءِ وانگ سرجم کرت ءُ پہ گیشیں وانگ ءَ شال ءَ شت آں۔
سالے ءَ رند شھید ودار ءَ ھم دہ پاس کرت ءُ من ءَ روچے ءَ ھالے کرت ’’ تئی کمرہ ءَ جاگاہ ھست من بہ یا آں۔‘‘
من پسو دات ’’ ھو پل ، بہ یا پر تو ھر وھد ءَ جاہ ھست ، ایوک تئی ودار اِنت۔‘‘
لھتے روچ گْوست شھید ءَ ھال کرت ’’ باند ءَ مھلہ چہ واب ءَ پاد بہ یا ءُ گوانکو ءَ ھم پچ بہ کن من سر بہ آں ، ترا ھالے کن آں ، من مروچی بیگاہ ءَ در کپ آں۔‘‘
من : ’’ شر جان بے گم بہ ئے ، ھر وھدے کہ سر بہ ئے ، من ءَ ھالے بہ کن۔‘‘
من شپ ءَ وپسگ ءَ پیسر وتی گوانکو ڈاہ ءِ سر ءَ کرت ءُ وپت آں، شھید ودار ءَ من ءَ چہ گوانکو ءِ ڈاہ دیگ پیسر رنگ کرت کہ بہ یا من سر آں ، تئی ودار ءَ نشتگ آں۔ من زوت زوت ءَ وت ءَ گیشینت ءُ دیم پہ بس ءِ اوشتجاہ ءَ راھادگ بوت آں۔ کمیں پند ءَ پد من سر بوت آں، چار آں دکانے ءِ دپ ءَ کرسی ءِ سر ءَ شھید ودار جان نشتگ سگریٹے روک ئِے کرتگ ءُ چادرے مانپوشتگ ئِے۔ من سر بوت آں، سلام ءُ دروت بوت ، نزیک ءَ ھوٹل ءِ ھست اَت ، ما ھوٹل ءَ نشت ءُ ارزبندے کرت، سگریٹے کش اِت ءُ دیم پہ کمرہ ءَ راھادگ بوتیں۔
( روان اِنت…)
